ខេត្តកំពង់ចាម ៖ គ្រោះមហន្តរាយដោយទឹកជំនន់ពីទន្លេមេគង្គ ធ្វើឲ្យផ្លូវបេតុងត្រូវបាក់ប្រវែង១៧០ម៉ែត្រ និងផ្ទាំងថ្មរៀបដូចកាំជណ្ដើរទប់ច្រាំង កុំឲ្យបាក់ស្ថិតនៅភូមិអន្លង់គគីរ ឃុំព្រែកកុយ ស្រុកកងមាស ក៏ត្រូវបានស្រុតចុះទៅក្រោមធ្វើឱ្យមានការព្រួយបារម្ភដល់លំនៅឋានពលរដ្ឋ ។ជាក់ស្ដែង នាព្រឹកថ្ងៃទី២៦ ខែមីនា ឆ្នាំ២០២៤ ឯកឧត្តមអ៊ុន ចាន់ដា អភិបាលខេត្តអមដំណើរដោយសហការីជាច្រើននាក់ បានចុះទៅពិនិត្យ ដោយឱ្យជំនាញស្ថាប័នពាក់ព័ន្ធចុះសិក្សាត្រៀមជួសជុលឡើងវិញឲ្យរួចមុនរដូវវស្ឈានចូលមកដល់ លោកភោគ សាវុធ អភិបាលស្រុកកងមាសបានឱ្យដឹងថា ដោយសារតែគ្រោះមហន្តរាយពីទឹកជំនន់ទន្លេមេគង្គជាហេតុធ្វើឲ្យច្រាំងព្រែកប្រវែង២០០ម៉ែត្រ ត្រូវបានបាក់ស្រុតដោយមកកៀកនិងលំនៅឋានរបស់ប្រជាពលរដ្ឋ ។ ដោយមើលឃើញបញ្ហាបែបនេះ ឯកឧត្តមអភិបាលខេត្តបានយកចិត្តទុកដាក់ហ្នឹងអញ្ជើញចុះពិនិត្យដោយផ្ទាល់ជាមួយស្ថាប័នជំនាញមន្ទីរធនធានទឹកនិងឧតុនិយមខេត្ត ។ជាមួយនោះ ក្រសួងធនធានទឹកក៏បានចុះសិក្សានិងធ្វើរបាំងរៀបថ្មដូចកាំជណ្ដើរដើម្បីទប់ច្រាំងព្រែកកុំឲ្យបាត់នៅក្នុងអំឡុងឆ្នាំ២០២១។ អភិបាលស្រុកកងមាសបានបន្តឲ្យដឹងទៀតថា លុះមកដល់ឆ្នាំ២០២៤ពេលដែលទឹកទន្លេឡើងហូរចូលព្រែកក្នុងរដូវវស្សានិងហូរចេញចូលទៅក្នុងទន្លេវិញ ។ជាហេតុធ្វើឲ្យរបាំងដែលរៀបដាក់ដុំថ្មដូចកាំជណ្ដើរតាមលក្ខណៈបច្ចេកទេសត្រូវបានស្រុតខូចខាតរួមទាំងផ្លូវបេតុងផងដែរ ។ ជាមួយនោះអាជ្ញាធរខេត្តបានដាក់ផែនការឲ្យមន្ទីរធនធានទឹក និងឧតុនិយមខេត្តរួមទាំងក្រសួងធនធានទឹកត្រូវតែប្រញាប់ចុះសិក្សាធ្វើការជួសជុលជាបន្ទាន់ឲ្យបានរួចរាល់មុនរដូវវស្សាឈានចូលមកដល់នាពេលខាងមុខ ។