ទស្សនកិច្ចសិក្សា និងជំនួបប្រជុំផ្លាស់ប្តូរចំណេះដឹង លើគម្រោងអភិវឌ្ឍក្នុងក្របខណ្ឌភាពជាដៃគូរវាងរដ្ឋនិងឯកជន នៅសាធារណរដ្ឋកូរ៉េ សាធារណរដ្ឋកូរ៉េ៖ ថ្ងៃទី១៨ និងទី១៩ ខែមីនា ឆ្នាំ២០២៤ ឯកឧត្តម ហេង ណន រដ្ឋលេខាធិការក្រសួងសាធារណការ និងដឹកជញ្ជូន បានដឹកនាំគណៈប្រតិភូក្រសួងធ្វើទស្សនកិច្ចសិក្សា និងជួបប្រជុំផ្លាស់ប្តូរចំណេះដឹង លើគម្រោងអភិវឌ្ឍក្នុងក្របខណ្ឌភាពជាដៃគូរវាងរដ្ឋ និងឯកជន ដោយមានការអញ្ជើញចូលរួមពីសំណាក់ ឯកឧត្តម លោកជំទាវ ជាថ្នាក់ដឹកនាំ និងមន្រ្តីជាន់ខ្ពស់ពី ក្រសួងសាធារណការ និងដឹកជញ្ជូន ក្រសួងសេដ្ឋកិច្ច និងហិរញ្ញវត្ថុ ក្រសួងរៀបចំដែនដី នគរូបនីយកម្ម និងសំណង់ និងក្រុមប្រឹក្សាអភិវឌ្ឍន៍កម្ពុជាផងដែរ។ ដំណើរទស្សនកិច្ចសិក្សា និងកិច្ចប្រជុំពាក់ព័ន្ធនេះ ត្រូវបានសហការរៀបចំដោយ រាជរដ្ឋាភិបាលកម្ពុជា រួមជាមួយនឹង សាជីវកម្មហិរញ្ញវត្ថុអន្តរជាតិ (IFC - International Financial Corporation) ក្នុងគោលបំណងដើម្បី ពង្រឹងសមត្ថភាព បង្កើនចំណេះដឹង ផ្តល់ទស្សនទានគន្លឹះ និងផ្លាស់ប្តូរបទពិសោធន៍ល្អៗ ដល់មន្ត្រីរាជរដ្ឋាភិបាល លើគម្រោងអភិវឌ្ឍន៍ក្នុងក្របខណ្ឌភាពជាដៃគូរវាងរដ្ឋនិងឯកជន (PPP - Public-Private Partnership) ដែលបាននឹងកំពុងអនុវត្តដោយរដ្ឋាភិបាល និងវិស័យឯកជន នៃសាធារណរដ្ឋកូរ៉េ ក្នុងវិស័យហេដ្ឋារចនាសម្ព័ន្ធដឹកជញ្ជូន កំពង់ផែ មជ្ឈមណ្ឌលភស្តុភារកម្ម មជ្ឈមណ្ឌលពាណិជ្ជកម្ម និងតំបន់លំនៅដ្ឋានសាធារណៈ។ មួយផ្នែកទៀត កម្មវិធីនេះបានរួមចំណែកក្នុងការជំរុញ និងលើកកម្ពស់ ការចូលរួមរបស់វិស័យឯកជនទាំងក្នុង និងក្រៅប្រទេស ដើម្បីចូលរួមអភិវឌ្ឍគម្រោងហេដ្ឋារចនាសម្ព័ន្ធរូបវន្តនានា ក្នុងក្របខណ្ឌ PPP សំដៅលើកកម្ពស់ការអភិវឌ្ឍសេដ្ឋកិច្ច-សង្គម ប្រកបដោយនិរន្តរភាព និងបរិយាបន្ន៕