ឯកឧត្តម ប៉េង ពោធិ៍នា សមាជិកគណៈអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា បន្តអញ្ជើញជាអធិបតី ក្នុងពិធីប្រកាសសមាសភាពក្រុមការងារគណបក្សចុះមូលដ្ឋាន “ស្រុកកោះធំ” ក្នុងព្រឹកថ្ងៃដដែល បន្ទាប់ពីអញ្ជើញជាអធិបតីក្នុងពិធី ប្រកាសសមាសភាពក្រុមការងារគណបក្សចុះមូលដ្ឋានស្រុកស្អាង រួចរាល់ ឯកឧត្តម ប៉េង ពោធិ៍នា សមាជិកគណៈអចិន្ត្រៃយ៍គណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណៈអចិន្ត្រៃយ៍ក្រុមការងារគណបក្សចុះមូលដ្ឋានស្រុកកោះធំ បានបន្តដំណើរមកកាន់ទីស្នាក់ការគណបក្សប្រជាជនស្រុកកោះធំ ដើម្បីអញ្ជើញជាអធិបតីក្នុង “ពិធីប្រកាសសមាសភាពក្រុមការងារគណបក្សចុះមូលដ្ឋានស្រុកកោះធំ” បន្តទៀត។ កម្មវិធីបានប្រព្រឹត្តទៅនៅទីស្នាក់ការគណបក្សប្រជាជនកម្ពុជាស្រុកកោះធំ ដោយមានការចូលរួមពី ឯកឧត្តម លោកជំទាវ លោក លោកស្រី ជាអនុប្រធាន សមាជិក សមាជិកាក្រុមការងារគណបក្សចុះមូលដ្ឋានស្រុកស្អាង គណៈកម្មាធិការគណបក្សស្រុក ក្រុមប្រឹក្សាស្រុក និងប្រធានសាខាបក្សភូមិក្នុងស្រុកកោះធំ សរុបប្រមាណ ៣០៣ រូប។ ជាមួយគ្នានេះ ដើម្បីពង្រឹងប្រសិទ្ធភាពការងារមូលដ្ឋានបន្ថែមទៀត ឯកឧត្តមប្រធាន បានស្នើឱ្យ ឯកឧត្តម លោកជំទាវ លោក លោកស្រី ទាំងអស់ មេត្តាយកចិត្តទុកដាក់អនុវត្តនូវតួនាទីភារកិច្ច ដូចមានចែងក្នុងសេចក្តីសម្រេចលេខ ១២/២៤ សរ.កក.កណ ស្តីពី ការចាត់តាំងសមាសភាពក្រុមការងារគណបក្សចុះមូលដ្ឋានស្រុកកោះធំ ខេត្តកណ្តាល ជាមួយភាពបុរេសកម្ម ប្រកបដោយស្មារតីសាមគ្គី និងទំនួលខុសត្រូវខ្ពស់។ ឯកឧត្តមប្រធាន បានបង្ហាញនូវសុឆន្ទៈយ៉ាងមុតមាំថា ថ្នាក់ដឹកនាំ និងសមាជិក សមាជិកានៃក្រុមការងារគណបក្សទាំងអស់ នឹងបន្តបំពេញសេចក្តីត្រូវការរបស់ប្រជាពលរដ្ឋឱ្យបានជាអតិបរមា ពិសេសគឺ បន្តដំណើរតាមមាគ៌ាដ៏ត្រឹមត្រូវរបស់គណបក្សប្រជាជនកម្ពុជាយើងបន្តទៀត ដើម្បីរួមគ្នាថែរក្សាសុខសន្តិភាព និងការអភិវឌ្ឍប្រទេសជាតិឱ្យមានការរីកចម្រើនទាំងក្នុងអាណត្តិទី៧ ក៏ដូចជាអាណត្តិជាបន្តបន្ទាប់ទៀតផងដែរ៕