បាត់ដំបង៖ ដើម្បីឆ្លើយតបតាមតម្រូវការ និងសំណូមពររបស់ប្រជាពលរដ្ឋ ខណៈការដឹកជញ្ជូនកសិផលរបស់ប្រជាពលរដ្ឋមានជួបបញ្ហាប្រឈមនោះ មន្ទីរសាធារណៈការនិងដឹកជញ្ជូនខេត្តបាត់ដំបង ក្នុងឆ្នាំ២០២៤នេះ បានទទួលគម្រោងចំនួន៦គម្រោង ដើម្បីធ្វើការស្ថាបនាផ្លូវជូនប្រជាពលរដ្ឋប្រើប្រាស់ក្នុងការដឹកជញ្ជូនក្នុងការបម្រើឲ្យវិស័យសេដ្ឋកិច្ចសង្គម និងការអភិវឌ្ឍវិស័យទេសចរណ៍នៅខេត្តបាត់ដំបងផងដែរ ។ ប្រធានមន្ទីរសាធារណៈការនិងដឹកជញ្ជូនខេត្តបាត់ដំបង លោក ព្រួញ រិទ្ធថា បានបញ្ជាក់ថា គម្រោងទាំង៦នេះដែលកំពុងតែធ្វើការអនុវត្ត ទី១ គឺផ្លូវលេខ១៥៧A ពីឃុំរាំងកេសី នៃស្រុកសង្កែ ភ្ជាប់មកមុខប្រាសាទបាណន់ នៃឃុំកន្ទឺ២ ស្រុកបាណន់ ខេត្តបាត់ដំបង មានប្រវែងជាង២០គ.ម ដែលការងារនេះគឺជាការងារដែលត្រូវធ្វើបង្ហើយតមកពីឆ្នាំ២០២៣ ដែលមានប្រវែងជាង៣គ.ម ដើម្បីឲ្យរួចរាល់ជាស្ថាពរនាពេលខាងមុខនេះ បន្ទាប់មកគឺផ្លូវជាតិលេខ៥ ដែលក្រុមការងារបច្ចេកទេសរបស់មន្ទីរ កំពុងតែស្ថាបនាពង្រីកដូចគ្នានេះដែរមានប្រវែង១៤៥០ម ដែលត្រូវពង្រីកទទឹងផ្លូវរហូតដល់១៩ម ហើយនៅជំហានទី២នឹងមានប្រព័ន្ធលូមួយខ្សែទៀតផងដែរ ។ សម្រាប់ស្រុកបាណន់ មន្ទីរទទួលបានរហូត៣គម្រោង គឺគម្រោងនេះ១គម្រោង និងគម្រោងពង្រីកផ្លូវពីស្តុបបាណន់ តាមផែនការរបស់មន្ទីរគឺលើស១៩គ.ម តែឆ្នាំនេះថវិកាយើងគឺអាចទទួលបានតែជិត៥គ.ម ប៉ុណ្ណោះ ដែលនឹងត្រូវអនុវត្តនៅក្នុងខែមីនា ឆ្នាំ២០២៤នេះ ។ លោក ប្រធានមន្ទីរសាធារណៈការនិងដឹកជញ្ជូនខេត្តបាត់ដំបង បានបញ្ជាក់ដែរថា ក្រោយពីបានបញ្ចប់ការងារស្ថាបនាផ្លូវនេះរួចរាល់ ផ្លូវដ៏សំខាន់នេះនឹងក្លាយជាផ្លូវដែលបម្រើឲ្យផលប្រយោជន៍របស់ប្រជាពលរដ្ឋ ជាពិសេសធ្វើឲ្យមានកំណើនសេដ្ឋកិច្ចយ៉ាងពិតប្រាកដ ហើយជីវភាពរស់នៅរបស់ពួកគាត់ គឺពិតជាមានការរីកចម្រើន ដោយសារតែយើងមានផ្លូវល្អងាយស្រួលធ្វើដំណើរ កាត់បន្ថយការចំណាយ ងាយស្រួលក្នុងការដឹកភោគផលកសិកម្ម ដែលប្រជាពលរដ្ឋផលិតបាន ដើម្បីនាំទៅលក់នៅទីផ្សារ ហើយផ្លូវនេះក៏ជាមធ្យោបាយ ក្នុងការទាក់ទាញភ្ញៀវទេសចរមកកាន់ខេត្តបាត់ដំបង ក៏ដូចជាតំបន់រមណីយដ្ឋានប្រាសាទបាណន់ កាន់តែមានការកើនឡើង ធ្វើឱ្យប្រជាពលរដ្ឋ ដែលប្រកបរបរក្នុងវិស័យទេសចរណ៍ អាចទទួលបានប្រាក់ចំណូលបន្ថែមទៀត ពីវិស័យនេះថែមទៀតផង ។ តាមរយៈនេះផងដែរ លោក ព្រួញ រិទ្ធថា បានធ្វើការអំពាវនាវដល់ប្រជាពលរដ្ឋ ក៏ដូចជាអ្នកប្រកបរបរលក់ដូរគ្រឿងសំណង់ ក្រោយការស្ថាបនាផ្លូវកៅស៊ូ ប្រភេទ BDST នេះរួចរាល់ហើយ សូមកុំបើកបរលឿនហួសការកំណត់នៃច្បាប់ ព្រមជាមួយគ្នានេះ ក៏មិនត្រូវដឹកលើសទម្ងន់កំណត់ផងដែរ ដើម្បីកុំឲ្យកើតមានគ្រោះថ្នាក់ចរាចរណ៍ និងការរងនូវការខូចខាតផ្លូវ សម្រាប់ទុកឲ្យការប្រើប្រាស់បានយូរអង្វែង ដើម្បីផលប្រយោជន៍រួមរបស់យើងទាំងអស់គ្នា ៕