រតនគិរី ៖ លោក គៀង តុលា អភិបាលស្រុកអូរជុំបានមានប្រសាសន៍ថា៖ ការជួសជុលស្ថាបនាផ្លូវជូនប្រជាពលរដ្ឋដែលជាតម្រូវការចាំបាច់មិនរង់ចាំគម្រោងនោះទេ។ ប្រសាសន៍បែបនេះរបស់លោកអភិបាលស្រុកគឺបានលើកឡើងនៅក្នុងឱកាសដែលលោក បានដឹកនាំ មន្ត្រីក្រោមឱវាទចុះពិនិត្យ ការ ជួសជុល កែសម្រួលផ្លូវលំមួយខ្សែមានប្រវែង ៨ គីឡូម៉ែត្រ ក្រាលគ្រោះក្រហមបំបែកចេញពីផ្លូវជាតិលេខ ៧៨ ឆ្លងកាត់ឃុំចំនួន ៣គឺក្នុងស្រុកអូរជុំមានឃុំចំនួន ២ និងស្រុកបរកែវមានឃុំចំនួន ១ ដែលមានដែលមានប្រជាពលរដ្ឋធ្វើដំណើរនៅលើដងផ្លូវនេះប្រមាណជាង ១០០០គ្រួសារ។ លោកថា ដោយមើលឃើញការរងទុក្ខលំបាកក្នុងការធ្វើដំណើររបស់បងប្អូនប្រជាពលរដ្ឋប្រកបមុខរបរប្រចាំថ្ងៃ ក៏ដូចជា សិស្សសាលាទៅសាលារៀន ឬ ទៅមន្ទីរពេទ្យទាំងរដូវប្រាំងនិងរដូវវស្សានាពេលកន្លងមក ។ ក្នុងនាម អាជ្ញាធរ ធ្វើការបម្រើជូនប្រជាពលរដ្ឋមិនអាចឈរអោបដៃមើលពីទុក្ខលំបាកទាំងអស់នេះបាននោះទេ។ ហេតុដូចនេះហើយ លោកបានគៀងគរប្រមូលរកថវិកាអ្នកដែលមានជីវភាពធូរធារឬម្ចាស់ចំការដែលមានចំការធំៗនៅក្នុងតំបន់នោះដើម្បីជាបដិភាកជាមួយថវិការបស់លោកអភិបាលស្រុកផ្ទាល់បានប្រមាណជិត ៥០០០ដុល្លារ ដើម្បីជួលគ្រឿងចក្រ និង ទិញដីថ្មចាក់កន្លែងដែលពិបាកក្នុងការធ្វើដំណើរខ្លាំងឲ្យមានភាពល្អប្រសើរឡើងវិញ។ លោកអភិបាលស្រុករូបនេះបានឲ្យដឹងទៀតថាផ្លូវមួយខ្សែនេះកាលពីរ ដូវវស្សា គឺ លោកបានគៀងគរថវិកាប្រជាពលរដ្ឋក៏ដូចជាមន្ត្រី រាជការក្រោមឱវាទ មេភូមិ មេឃុំ ប្រជាការពារ ទិញថ្មចាក់លុបជំហុកជ្រៅជ្រៅរួចមួយដងមកហើយ។ដោយឡែកមកដល់រដូវ ប្រាំង ផ្លូវនោះត្រូវរងការគ្រប់គ្រងខូចខាតទៅវិញ។ធ្វើឲ្យប៉ះពាល់ដល់ការធ្វើដំណើរប្រជាពលរដ្ឋ សិស្សានុសិស្សនិងការដឹកកសិផលចេញចូលពិបាកខ្លាំង ទើបលោកសម្រេចចិត្តមិនរង់ចាំគម្រោងទេ ។ លោកអភិបាលស្រុកបានបន្ថែមថាផ្លូវនេះគឺជាគម្រោងរបស់ក្រសួងអភិវឌ្ឍន៍ជនបទ ដែលគ្រប់គ្រងជួសជុលនិងថែរក្សាដោយមន្ទីរអភិវឌ្ឍន៍ជនបទខេត្ត ប៉ុន្តែបច្ចុប្បន្នត្រូវរងការខូចខាតយ៉ាងធ្ងន់ធ្ងរ វាពិបាកក្នុងការធ្វើដំណើរប្រកបមុខរបរប្រចាំថ្ងៃរបស់ប្រជាពលរដ្ឋនៅក្នុងតំបន់នេះ។ បន្ថែមពីនេះលោកអភិបាលស្រុកក៏បានសំណូមពរដល់បងប្អូនប្រជាពលរដ្ឋ ឬម្ចាស់ចម្ការ ដែលអ្នកមានរថយន្តធុនតូចឬធំដែលចូលដឹកទំនិញកសិផលនានានៅក្នុងតំបន់នេះសូមជួយថែរក្សានិងកុំដឹកឲ្យលើសទម្ងន់ ព្រោះផ្លូវនេះគឺជាផ្លូវដីវាមិនអាចធានានិរន្តភាពបានយូរអង្វែងនោះទេ បើបងប្អូនទាំងអស់មិនគោរពតាមការណែនាំរបស់អាជ្ញាធរមូលដ្ឋាន៕