រាជធានីភ្នំពេញ ៖ កន្លងមក អតីតរដ្ឋមន្ត្រីក្រសួងសាធារណការ និងដឹកជញ្ជូន ធ្លាប់បានអំពាវនាវដល់ប្រជាពលរដ្ឋ ឱ្យយកយានយន្តទៅឆៀកឱ្យបានទាន់ពេលវេលា ចៀសវាងការខាតបង់ ឬប្រឈមមុខ នឹងការផាកពិន័យ និងដើម្បីធានាការធ្វើ ដំណើរប្រកបដោយសុវត្ថិភាព ។ ពាក់ព័ន្ធនឹងការផាកពិន័យលើឆៀកផុតកំណត់នេះដែរ តាមរយៈការខម្មិនរបស់គណនីហ្វេសប៊ុក «Sada Sopheak» បានឆាតសួរទៅកាន់ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ពាក់ព័ន្ធរថយន្តរបស់លោក បានផុតកំណត់ឆៀកចំនួន២ខែ (៦០ថ្ងៃ) ហើយលោកក៏បានទទួលស្គាល់កំហុសថា ពិតជាលើសថ្ងៃមែន។ ដោយលោកសួរថា តើការផាកពិន័យចំនួន ១៨០,០០០រៀល ស្របតាមច្បាប់ រឺទេ ? ទោះជាយ៉ាងណា សំណួរនេះនៅមិនទាន់ឃើញសមត្ថកិច្ចឆ្លើយតបនៅឡើយគិតត្រឹមល្ងាចថ្ងៃទី០២ ខែកុម្ភៈ ឆ្នាំ២០២៤នេះ ។យោងតាមគេហទំព័ររបស់ក្រសួងសាធារណការ និងដឹកជញ្ជូន បានបញ្ជាក់ថា រថយន្ត ដែលផុតកំណត់ការត្រួតពិនិត្យលក្ខណៈបច្ចេកទេសយានជំនិះ លើសពី៣០ថ្ងៃឡើងទៅ នឹងមានការពិន័យ។ ក្នុងការផាកពិន័យនោះ គឺរថយន្តធុនតូច ឬធុនស្រាល ពិន័យ ៥០០រៀល ក្នុង១ថ្ងៃ ចំណែករថយន្តធុនធំ ឬធុនធ្ងន់ ពិន័យ ២,០០០រៀល ក្នុង១ថ្ងៃ ។ដោយតម្រូវមានឯកសារ រួមមាន ៖ ពាក្យសុំត្រួតពិនិត្យលក្ខណៈបច្ចេកទេសយានយន្ត (បោះពុម្ពចេញពីប្រព័ន្ធ), បណ្ណសម្គាល់យានយន្ត (ថតចម្លង), វិញ្ញាបនបត្រត្រួតពិនិត្យលក្ខណៈបច្ចេកទេសយានជំនិះ(ចាស់) និងបង្កាន់បង់ប្រាក់ ។ សូមបញ្ជាក់ថា ការពិន័យចំពោះឆៀករថយន្ត គឺដាច់ដោយឡែកពីគ្នា គឺដោយការផាកពិន័យរបស់សមត្ថកិច្ច ទៅលើរថយន្ត ដែលហួសសុពលភាពឆៀក និងមិនព្រមទៅធ្វើឆៀក ចំពោះរថយន្តធុនស្រាលចំនួន ១៨ម៉ឺនរៀល និងរថយន្តធុនធ្ងន់ចំនួន ៣៧ម៉ឺន ៥ពាន់រៀល។ ដោយឡែក ការពិន័យចំពោះឆៀករថយន្ត ដោយក្រសួងសាធារណការ និងដឹកជញ្ជូន គឺគិតតាមថ្ងៃ ដោយក្នុងមួយថ្ងៃ ចំនួន៥០០រៀល សម្រាប់រថយន្តធុនតូច ឬស្រាល និងរថយន្តធុនធំ ឬធ្ងន់ ក្នុងតម្លៃ ២,០០០រៀល ក្នុងមួយថ្ងៃ បន្ថែមទៀត ៕