រដ្ឋាភិបាលបានដាក់ចេញគោលនយោបាយលើកទឹកចិត្តការវិនិយោគឧស្សាហកម្ម ដែលមានសក្ដានុពលខ្ពស់រួមចំណែកដល់ការអភិវឌ្ឍសេដ្ឋកិច្ចជាតិ។ក្នុងនោះគម្រោងវិនិយោគដែលមានលក្ខណៈសម្បត្តិគ្រប់គ្រាន់ផ្នែកឧស្សាហកម្មដែលមានបច្ចេកវិទ្យាខ្ពស់ ត្រូវបានលើកទឹកចិត្តផ្នែកពន្ធជាមូលដ្ឋានរួមទាំងការផ្តល់ការសម្របសម្រួលនិងអនុគ្រោះជាច្រើនទៀត។ ឧស្សាហកម្មបង្គុំ និងតម្លើងរថយន្ត ជាវិស័យមួយស្ថិតនៅក្នុងចំណោមវិស័យអាទិភាពទាំង ១៩ ដែលទទួលបានការលើកទឹកចិត្តសម្រាប់ការវិនិយោគ។ឧស្សាហកម្មផ្គុំដំឡើងរថយន្តថ្មីមានសិទ្ធិទទួលបាននូវការលើកទឹកចិត្ត ក្រោមរូបភាពនៃការបញ្ចុះអត្រាពន្ធគយ អាករពិសេស និងអាករលើតម្លៃបន្ថែម សម្រាប់ការនាំចូលគ្រឿងបង្គុំដំឡើងរថយន្តបម្រើទីផ្សារក្នុងស្រុក។លក្ខណៈវិនិច្ឆ័យអត្រាបញ្ចុះពន្ធសម្រាប់ឧស្សាហកម្មដំឡើងរថយន្ត ត្រូវអនុវត្តតាមលក្ខខណ្ឌដូចខាងក្រោម៖ -ទទួលបានការលើកទឹកចិត្តបញ្ចុះអត្រាពន្ធគយ អាករពិសេស និងអាករលើតម្លៃបន្ថែមចំនួន ៥០ ភាគរយ ចំពោះគម្រោងវិនិយោគដែលមានលក្ខណៈសម្បត្តិគ្រប់គ្រាន់ដែលប្រើប្រាស់គ្រឿងបង្គុំជាផលិតផលសម្រេចដែលមិនតម្រូវឱ្យមានដំណើការកែច្នៃបន្ថែមទៀត មានធាតុផ្សំក្នុងស្រុកយ៉ាងតិច ៣ ភាគរយ ហើយបំពេញបានលក្ខខណ្ឌ ២ ក្នុងចំណោមលក្ខខណ្ឌ ៣ ដូចជា៖ (១) ប្រើប្រាស់គ្រឿងបង្គុំចាប់ពី ៤០០ បំណែកឡើងទៅក្នុងរថយន្តមួយគ្រឿង (២) មានទុនវិនិយោគចាប់ពី ៥.០០០.០០០ (ប្រាំលាន) ដុល្លារអាម៉េរិកឡើងទៅ (៣) ប្រើប្រាស់កម្លាំងពលកម្មចាប់ពី ១៥០ នាក់ឡើង -ទទួលបានការលើកទឹកចិត្តបញ្ចុះអត្រាពន្ធគយ អាករពិសេស និងអាករលើតម្លៃបន្ថែមចំនួន ៧០ ភាគរយ ចំពោះគម្រោងវិនិយោគដែលមានលក្ខណៈសម្បត្តិគ្រប់គ្រាន់ ដែលប្រើប្រាស់គ្រឿងបង្គុំជាផលិតផលសម្រេចមិនទាន់បាញ់ថ្នាំ មានធាតុផ្សំក្នុងស្រុកយ៉ាងតិច ៥ ភាគរយ ហើយបំពេញបានលក្ខខណ្ឌ ២ ក្នុងចំណោម លក្ខខណ្ឌ ៣ មាន៖ (១) ប្រើប្រាស់គ្រឿងបង្គុំចាប់ពី ៥០០ បំណែកឡើងទៅក្នុងរថយន្តមួយគ្រឿង (២) មានទុនវិនិយោគចាប់ពី ១៥.០០០.០០០ (ដប់ប្រាំលាន) ដុល្លារអាម៉េរិកឡើងទៅ ( ៣) ប្រើប្រាស់កម្លាំងពលកម្មចាប់ពី ៣០០ នាក់ឡើងទៅ។ -ទទួលបានការលើកទឹកចិត្តបញ្ចុះអត្រាពន្ធគយ អាករពិសេស និងអាករលើតម្លៃបន្ថែមចំនួន ៨០ ភាគរយ ចំពោះគម្រោងវិនិយោគដែលមានលក្ខណៈសម្បត្តិគ្រប់គ្រាន់ ដែលប្រើប្រាស់គ្រឿងបង្គុំមិនទាន់ផ្សារ និងបាញ់ថ្នាំមានធាតុផ្សំក្នុងស្រុកយ៉ាងតិច ២០ ភាគរយ ហើយបំពេញបានលក្ខខណ្ឌ ២ ក្នុងចំណោមលក្ខខណ្ឌ ៣ មាន៖ (១) ប្រើប្រាស់គ្រឿងបង្គុំចាប់ពី ៦០០ បំណែកឡើងទៅក្នុងរថយន្តមួយគ្រឿង (២) មានទុនវិនិយោគចាប់ពី ៣៥.០០០.០០០ (សាមសិបប្រាំលាន) ដុល្លារអាម៉េរិកឡើងទៅ (៣) ប្រើប្រាស់កម្លាំងពលកម្មចាប់ពី ៥០០នាក់ឡើងទៅ -ទទួលបានការលើកទឹកចិត្តបញ្ចុះអត្រាពន្ធគយ អាករពិសេស និងអាករលើតម្លៃបន្ថែម ចំនួន ៩០ ភាគរយ ចំពោះគម្រោងវិនិយោគដែលមានលក្ខណៈសម្បត្តិគ្រប់គ្រាន់ ដែលប្រើប្រាស់គ្រឿងបង្គុំមិនទាន់សង្កត់ពុម្ព ពត់ ផ្សារ និង បាញ់ថ្នាំ មានធាតុផ្សំក្នុងស្រុកយ៉ាងតិច ៤០ ភាគរយ ហើយបំពេញបានលក្ខខណ្ឌ ២ ក្នុងចំណោមលក្ខខណ្ឌ ៣ មាន៖ (១) ប្រើប្រាស់គ្រឿងបង្គុំចាប់ពី ៧០០ បំណែកឡើងទៅក្នុងរថយន្តមួយគ្រឿង (២) មានទុនវិនិយោគចាប់ពី ៤៥ ០០០ ០០០ (សែសិបប្រាំលាន) ដុល្លារអាម៉េរិកឡើងទៅ (៣) ប្រើប្រាស់កម្លាំងពលកម្មចាប់ពី ៦០០ នាក់ឡើងទៅ កម្ពុជាបានអនុម័តច្បាប់ស្តីពីវិនិយោគនៅថ្ងៃទី ១៥ ខែតុលា ឆ្នាំ២០២១ ក្នុងគោលបំណងបង្កើតក្របខ័ណ្ឌគតិយុត្តដែលបើកចំហ មានតម្លាភាព ដើម្បីទាក់ទាញការវិនិយោគក្នុងស្រុក។ ច្បាប់ស្ដីពីវិនិយោគមានវិសាលភាពអនុវត្តចំពោះរាល់គម្រោងវិនិយោគ ដែលមានលក្ខណៈសម្បត្តិគ្រប់គ្រាន់ “គ. ល. គ.” គម្រោងពង្រីកនៃគម្រោងវិនិយោគមានលក្ខណៈសម្បត្តិគ្រប់គ្រាន់ ” គ. ព. គ. ល. គ.” និងគម្រោងវិនិយោគដែលទទួលបានត្រឹមតែការធានាលើការវិនិយោគ “គ.ធ.វ.” ដែលបានចុះបញ្ជីនៅក្រុមប្រឹក្សាអភិវឌ្ឍន៍កម្ពុជាឬនៅអនុគណ:កម្មាធិការវិនិយោគរាជធានីខេត្ត។ ច្បាប់នេះផ្តល់ការលើកទឹកចិត្តដល់ការវិនិយោគលើវិស័យនិងសកម្មភាពសំខាន់ៗ តាមរយៈយន្តការនៃការលើកទឹកចិត្តផ្នែកពន្ធជាមូលដ្ឋាន ការលើកទឹកចិត្តបន្ថែម និងការលើកទឹកចិត្តពិសេស។ វិស័យនិងសកម្មភាពវិនិយោគចំនួន ១៩ ដែលទទួលបានការលើកទឹកចិត្តសម្រាប់ការវិនិយោគរួមមាន៖ ១/ឧស្សាហកម្មដែលមានបច្ចេកវិទ្យាខ្ពស់ ប្រកបដោយនវានុវត្តន៍ និងការស្រាវជ្រាវ និងអភិវឌ្ឍន៏ ២/ ឧស្សាហកម្ម ឬកម្មន្តសាលថ្មីៗ ផ្តល់តម្លៃបន្ថែមខ្ពស់ មាននវានុវត្តន៍ និងភាពប្រកួតប្រជែងខ្ពស់ ៣/ ឧស្សាហកម្មបម្រើឱ្យខ្សែច្រវាក់ផលិតកម្មតំបន់និងសកលលោក ៤/ ឧស្សាហកម្មគាំទ្រពាក់ព័ន្ធនឹងវិស័យកសិកម្ម ទេសចរណ៍ កម្មន្តសាល ឧស្សាហកម្មបម្រើឱ្យខ្សែច្រវាក់ផលិតកម្មតំបន់និងសកលលោក និងឧស្សាហកម្មតភ្ជាប់បណ្ដាញផ្គត់ផ្គង់ ៥/ ឧស្សាហកម្មគ្រឿងអគ្គិសនីនិងអេឡិចត្រូនិក ៦/ ឧស្សាហកម្មគ្រឿងបន្លាស់ បង្គុំ និងតម្លើង ៧/ ឧស្សាហកម្មមេកានិក និងគ្រឿងម៉ាស៊ីន ៨/ កសិកម្ម កសិឧស្សាហកម្ម ឧស្សាហកម្មកែច្នៃផលិតផលកសិកម្ម ឧស្សាហកម្មកែច្នៃ ចំណីអាហារដែលបម្រើទីផ្សារក្នុងស្រុក ឬការនាំចេញ ៩/ សហគ្រាសធុនតូចនិងមធ្យមក្នុងវិស័យអាទិភាព និងការអភិវឌ្ឍបណ្តំសហគ្រាសធុនតូច និងមធ្យម សួនឧស្សាហកម្ម និងសួនវិទ្យាសាស្ត្រ បច្ចេកវិទ្យា និងនវានុវត្តន៍ ១០/ ឧស្សាហកម្មទេសចរណ៍និងសកម្មភាពពាក់ព័ន្ធទេសចរណ៍ ១១/ ការអភិវឌ្ឍតំបន់សេដ្ឋកិច្ចពិសេស ១២/ ឧស្សាហកម្មឌីជីថល ១៣/ ការវិនិយោគក្នុងវិស័យអប់រំ ការបណ្តុះបណ្តាលវិជ្ជាជីវៈ និងការជំរុញផលិតភាព ១៤/ ការវិនិយោគក្នុងវិស័យសុខាភិបាល ១៥/ ការអភិវឌ្ឍហេដ្ឋារចនាសម្ព័ន្ធរូបវន្ត ១៦/ វិនិយោគក្នុងវិស័យឡូជីស្ទីក ១៧/ ការវិនិយោគក្នុងការគ្រប់គ្រង ការការពារបរិស្ថាន និងការអភិរក្សជីវៈចម្រុះ និងសេដ្ឋកិច្ចចក្រា ១៨/ ការវិនិយោគក្នុងវិស័យថាមពលបៃតង បច្ចេកវិទ្យាដែលរួមចំណែកដល់ការបន្សំ និង ការកាត់បន្ថយការប្រែប្រួលអាកាសធាតុ ១៩/ វិស័យនិងសកម្មភាពវិនិយោគផ្សេងទៀត ដែលមិនមានចែងក្នុងច្បាប់នេះ ក្នុងករណី ដែលរាជរដ្ឋាភិបាលយល់ឃើញថាមានសក្តានុពលដល់ការអភិវឌ្ឍសង្គម-សេដ្ឋកិច្ច។ ក្រៅពីការលើកទឹកចិត្តជាមូលដា្ឋនផ្នែកពន្ធ ច្បាប់វិនិយោគថ្មីក៏ផ្តល់ការលើកសម្របសម្រួលនិងផ្តល់ការលើកទឹកចិត្តបន្ថែមផ្សេងទៀត ដើម្បីបង្កើនសមត្ថភាពប្រកួតប្រជែងនិងភាពទាក់ទាញរបស់កម្ពុជា ក្នុងការធ្វើពិពិធកម្មមូលដ្ឋានសេដ្ឋកិច្ច គាំទ្រនវានុវត្តន៍ និងជំរុញការស្តារសេដ្ឋកិច្ចឡើងវិញ៕