(បន្ទាយមានជ័យ)៖ ផ្លូវបេតុង១ខ្សែ មានប្រវែង៥៤០ម៉ែត្រ និងសមិទ្ធផលនានាក្នុងសាលាអនុវិទ្យាល័យបត់ត្រង់កើត ស្ថិតក្នុងភូមិ អន្លង់ថ្ងាន់លិច ឃុំបត់ត្រង់ ស្រុកមង្គលបូរី ខេត្តបន្ទាយមានជ័យ ដែលជាកឬពួតដៃគ្នារវាងសប្បុរសជន ប្រជាពលរដ្ឋ និងព្រះសង្ឃ ដែលមានតម្លៃរាប់ម៉ឺនដុល្លារ ត្រូវសម្ពោធដាក់ឱ្យប្រើប្រាស់ជាផ្លូវការ។ ពិធីសម្ពោធសមិទ្ធផលនេះបានធ្វើឡើងនៅថ្ងៃទី២១ ខែមករា ឆ្នាំ២០២៤នេះ ក្រោមអធិបតីភាពលោក ឈូ ប៊ុនរឿង ប្រធានមន្ទីរអប់រំ យុវជន និងកីឡា ខេត្តបន្ទាយមានជ័យ, លោក រ័ត្ន ដាសុីណង់ អភិបាលស្រុកមង្គលបូរី, លោក លឿង លី និងភរិយា ជាសប្បុរសជន នៅខេត្តបាត់ដំបង អ្នកភូមិរស់ក្នុងឃុំបត់ត្រង់ ព្រះសង្ឃជិត៥០០អង្គ/នាក់។ លោក ឈូ ប៊ុនរឿង អានរបាយការណ៍ក្នុងការសាងសង់សមិទ្ធផលនានាក្នុងអនុវិទ្យាល័យ បានឱ្យដឹងដា អនុវិទ្យាល័យបត់ត្រង់ខាងកើត កសាងនៅឆ្នាំ២០០៤ បានផ្ញើខ្លួនជាមួយសាលាបឋមសិក្សាអន្លង់ថ្ងាន់ អនុវិទ្យាល័យនេះកសាងនៅខាងកើតផ្លូវធំមានចំងាយប្រហែល ៥០០ម៉ែត្រ នៅកណ្តាលវាលស្រែព័ទ្ធជុំវិញ បច្ចុប្បន្នមានបុគ្គលិកសរុប ចំនួន៦នាក់ ស្រី ៣នាក់ និងសិស្សានុសិស្ស ចំនួន ១៦៣នាក់ ស្រី ៧៦នាក់ ត្រូវជា៣ថ្នាក់ សាលា១នេះមានផ្ទៃដីសរុប ២៥,១៣៨ម៉ែត្រ។ ដោយចាប់ផ្តើមកកើតសាលាបានធ្វើការកសាងដល់បច្ចុប្បន្ននេះមាន ចាក់ដីបំពេញបរិវេណសាលា ចាក់ផ្លូវចូលសាលា និងជាវិញទីធ្លាសាលា សាលាក្នុងនោះមានផ្លូវបេតុង មានអគារ២ខ្នង មាន១១បន្ទប់ បង្គន់អនាម័យ មាន១ខ្នង ៤បន្ទប់ អណ្តូងស្នប់១ កសាងខ្លោងទ្វារ ខាងក្នុងជីកស្រះទឹក១កន្លែង មានរូបសំណាក៣ព្រះអង្គ ក្នុងនោះមានរូបព្រះបាទជ័យវរ័្មនទី៧ មានរូបសំណាកសម្តេចសង្ឃ ជួនណាត ធ្វើដងទង់ជាតិ១ សមិទ្ធិផលទាំងអស់នេះ អ្នកដែលចូលរួមកសាងច្រើនជាងគេគឺលោក លឿង លី និងភរិយាជាសប្បុរសជនធ្លាប់មានអនុស្សាវរីយ៍ក្នុងសាលានេះ តាមរយៈលោកមេឃុំ ចុង សឿន ក្រៅពីនោះប្រជាពលរដ្ឋឃុំបត់ត្រង់ សប្បុរសជននៅបាត់ដំបង និងព្រះសង្ឃ។ ក្នុងនោះលោក រ័ត្ន ដាសុីណង់ បានអគុណដល់លោក លឿង លី និងភរិយា សប្បុរសជនរស់នៅក្នុងខេត្តបាត់ដំបង ប្រជាពលរដ្ឋរស់ក្នុងឃុំបត់ត្រង់ ព្រះសង្ឃ ដែលបានចំណាយ កំលាំងកាយកម្លាំងចិត្ត និងថវិកាផ្ទាល់ខ្លួនបានកសាងផ្លូវបេតុង១ខ្សែ មានប្រវែង៥៤០ម៉ែត្រ និងសមិទ្ធផលនានាក្នុងសាលាអនុវិទ្យាល័យបត់ត្រង់កើត ឱ្យបានរលូនព្រោះនេះ គឺផលប្រយោជន៍រួមទាំងអស់គ្នា។ លោក រ័ត្ន ដាសុីណង់ បានផ្តាំផ្ញើរដល់ប្រជាពលរដ្ឋ និងអ្នកគ្រូ លោកគ្រូ សិស្សានុសិស្សទាំងអស់ដែលទទួលបានផ្លូវចាក់បេតុងថ្មីហើយសមិទ្ធផលនានាក្នុងសាលានេះត្រូវចេះជួយថែរក្សាឲ្យបានគង់វង់យូរអង្វែងសម្រាប់កូនចៅជំនាន់ក្រោយទៅសាលារៀនបានធ្វើដំណើរបន្ត ព្រោះផ្លូវចាក់បេតុងនេះវាមានតម្លៃថ្លៃណាស់ក្នុងការស្ថាបនាផ្លួវអស់១ខ្សែៗនោះហើយវាមានសារសំខាន់ទៀតសម្រាប់ប្រជាពលរដ្ឋ និងសិស្សសាលាទៀត ចប់កម្មវិធីធ្វើការរាប់បាត្រដល់ព្រះសង្ឃចំនួនជាង ៣០០អង្គផងដែរ៕