ផ្លូវដ៏លំបាកមួយកន្លែង ដែលមានរណ្តៅជង្ហុកដូចរន្ធបាយខុម ត្រូវបានមន្ទីរសាធារណការខេត្ត​បាត់ដំបង​​ធ្វើការក្រាលកៅស៊ូសម្រួល​ដល់​ការ​ធ្វើ​ដំណើរឆ្លើយតប​តាម​សំណូមពរពីប្រជាពលរដ្ឋ។ ផ្លូវដែលពិបាកក្នុងការធ្វើដំណើរ ដោយសារតែមានជង្ហុកច្រើននេះ ស្ថិតក្នុងភូមិវត្តតាមិម ឃុំអូរដំបង១ ស្រុកសង្កែ ខេត្តបាត់ដំបង។ កំណាត់ផ្លូវនេះ​ត្រូវ​បាន​ក្រុមហ៊ុនម៉ៅការបាន​ចាក់បេតុងបាន​ពាក់កណ្តាលទី និងមិនបានចាក់​ឲ្យ​ដល់ផ្លូវកៅស៊ូក្បាល​ស្ពានវត្តគរ ដែលបន្សល់​ឲ្យ​មានរណ្តៅជង្ហុកជាច្រើន។ កាលពីរសៀលថ្ងៃទី១០ ខែធ្នូ ឆ្នាំ២០២៣ ក្រោយពីទទួលបាននូវសំណូមពរពីពលរដ្ឋ លោក ព្រួញ រិទ្ធថា ប្រធានមន្ទីរសាធារណការ និងដឹកជញ្ជូនខេត្តបាត់ដំបង បានដាក់កម្លាំងជំនាញចុះពិនិត្យនិងសិក្សាហើយក៏បានចាត់ចែងធ្វើការក្រាលកៅស៊ូតែម្តងដើម្បីបំពេញតម្រូវការរបស់ប្រជាពលរដ្ឋ។ បច្ចុប្បន្នលោកប្រធានមន្ទីរ​បានចាត់​ឲ្យ​ក្រុមជំនាញធ្វើការតភ្ជាប់ពីកំណាត់ផ្លូវបេតុង​ទៅក្បាលស្ពានវត្តគរ ដោយក្រាលកៅស៊ូរួចរាល់មួយរយភាគរយ៕