នៅព្រឹកថ្ងៃព្រហស្បតិ៍ ៤រោច ខែអស្សុជ ឆ្នាំថោះ បញ្ចស័ក ព.ស២៥៦៧ ត្រូវនឹងថ្ងៃទី០២ ខែវិច្ឆិកា ឆ្នាំ២០២៣ ថ្នាក់ដឹកនាំក្រសួងសាធារណការ និងដឹកជញ្ជូន ដឹកនាំដោយឯកឧត្តម លឹម ស៊ីដេនីន រដ្ឋលេខាធិការក្រសួង អមដំណើរដោយឯកឧត្តម អ៊ុន ចាន់ដា អភិបាលខេត្តកំពង់ចាម បានដឹកនាំក្រុមការងារ និងមន្ត្រីជំនាញ ចុះពិនិត្យវឌ្ឍនភាពនៃដំណើរការស្ថាបនាពង្រីកកែលម្អផ្លូវជាតិលេខ៧ ចាប់ពីរង្វង់មូលស្គន់ ដល់រង្វង់មូលស្ពានគីហ្សូណា ខេត្តកំពង់ចាម។ ក្នុងឱកាសនោះ ឯកឧត្តមរដ្ឋលេខាធិការ និងឯកឧត្តមអភិបាលខេត្ត បានធ្វើការណែនាំដល់ក្រុមហ៊ុនសាជីវកម្មសាងសង់ផ្លូវថ្នល់ ត្រូវធ្វើយ៉ាងណាឱ្យត្រឹមត្រូវតាមបទដ្ឋានបច្ចេកទេសនៃការសាងសង់ឱ្យធានាបាននូវគុណភាពខ្ពស់ តាមលក្ខណៈបច្ចេកទេសរបស់ក្រុមហ៊ុនសាងសង់ ដោយយកដីធ្វើពិសោធន៍ ដើម្បីកសាងគ្រឹះរបស់ស្ពានថ្នល់ជាប់បានយូរអង្វែង។ ទន្ទឹមនឹងនោះឯកឧត្តមក៏បានជំរុញក្រុមការងារឱ្យសម្របសម្រួលផលប៉ះពាល់ ជាមួយបងប្អូនប្រជាពលរដ្ឋ ធ្វើយ៉ាងណាត្រូវដោះស្រាយផលប៉ះពាល់ឱ្យបានឆាប់រហ័ស ដើម្បីដំណើរការសាងសង់ផ្លូវ និងស្ពាន តាមផែនការដែលបានកំណត់។ ចំពោះគម្រោងពង្រីកផ្លូវជាតិលេខ៧ ជា៤គន្លង ចាប់ពីរង្វង់មូលស្គន់ ក្នុងស្រុកជើងព្រៃ រហូតដល់រង្វង់មូលស្ពានគីហ្សូណា ខេត្តកំពង់ចាម ជំហានដំបូងគឺចាប់ផ្តើមសាងសង់ស្ពានជាមុនសិន បន្ទាប់មកធ្វើការពង្រីកតួផ្លូវ បន្ទាប់ពីដោះស្រាយផលប៉ះពាល់ដូចជា ខ្សែកាបអុបទិក ក្រោមដី ប្រព័ន្ធទឹកស្អាត និងបង្គោលអគ្គិសនីរួចរាល់ហើយនោះ៕