ភ្នំពេញ៖ ការគ្រប់គ្រងទឹកកខ្វក់ និងការគ្រប់គ្រងសំណល់រឹង បានក្លាយជារបៀបវារៈ នៃកិច្ចពិភាក្សា រវាងក្រសួងសាធារណការ និងដឹកជញ្ជូន និងធនាគារអភិវឌ្ឍន៍អាស៊ី (ADB) ។ លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងគណៈប្រតិភូធនាគារ អភិវឌ្ឍន៍អាស៊ី (ADB) ដឹកនាំដោយលោកស្រី Jyotsana Varma នាយិកាប្រចាំ​នៅកម្ពុជា ចូលជួបសម្តែងការគួរសម និងពិភាក្សាការងារ នារសៀលថ្ងៃអង្គារ ទី៣១ ខែតុលា ឆ្នាំ២០២៣ នៅទីស្តីការក្រសួង។ បើយោងតាមប្រភពពី ក្រសួងសាធារណការ បានឱ្យដឹងថា ជំនួបនេះ ផ្តោតសំខាន់លើ ការពិភាក្សាពិគ្រោះយោបល់ ទាក់ទងនឹងគម្រោងអភិវឌ្ឍការគ្រប់គ្រងទឹកកខ្វក់ ការគ្រប់គ្រងសំណល់រឹង និងការងារផ្សេងៗទៀត ដូចជា ការរៀបចំគោលនយោបាយ យុទ្ធសាស្ត្រ បទដ្ឋានបច្ចេកទេស និងឯកសារគតិយុត្តនានា ដែលពាក់ព័ន្ធនឹងការគ្រប់គ្រង ទឹកកខ្វក់ និងលើកកម្ពស់​អនាម័យ នៅក្នុងព្រះរាជាណាចក្រកម្ពុជា ផងដែរ៕