វគ្គបណ្ដុះបណ្ដាលបច្ចេកទេសស្ដីពី វិធីសាស្ត្រគណនាកម្រាលផ្លូវ “Pavement Design” ដើម្បីពង្រឹងគុណភាពការងារសាងសង់ហេដ្ឋារចនាសម្ព័ន្ធផ្លូវថ្នល់ និងធានាការប្រើប្រាស់ឱ្យបានគង់វង្ស យូរអង្វែង មណ្ឌលបច្ចេកទេស និងបណ្ដុះបណ្ដាល៖ នៅថ្ងៃទី៣០-៣១ តុលា ២០២៣ អគ្គនាយកដ្ឋានបច្ចេកទេស នៃក្រសួងសាធារណការ និងដឹកជញ្ជូន បានបន្តបញ្ចប់បើកវគ្គបណ្ដុះបច្ចេកទេសស្ដីពី វិធីសាស្ត្រគណនា កម្រាលផ្លូវ ជូនដល់វិស្វករ និងមន្ត្រីបច្ចេកទេស នៃមន្ទីរសាធារណការ និងដឹកជញ្ជូន នៅតាមបណ្ដា មណ្ឌលបច្ចេកទេស និងបណ្ដុះបណ្ដាល ចំនួន ២ទីតាំង រួមមាន៖ ១. ខេត្តក្រចេះ៖ ដឹកនាំដោយ ឯកឧត្តម ហុង ស៊ីណារា អនុរដ្ឋលេខាធិការ អមដោយ លោក អៀង រដ្ឋា អគ្គនាយករងបច្ចេកទេស ថ្នាក់ដឹកនាំ និងគ្រូបង្គោល នៃនាយកដ្ឋានផ្លូវថ្នល់ ដោយមានការចូលរួមពីមន្ត្រី បច្ចេកទេស នៃមន្ទីរសាធារណការ និងដឹកជញ្ជូន ស្ថិតក្នុងភូមិសាស្ត្រខេត្តក្រចេះ ខេត្តស្ទឹងត្រែង ខេត្តរតនគិរី និងខេត្តមណ្ឌលគិរី។ ២. រាជធានីភ្នំពេញ៖ ដឹកនាំដោយ ឯកឧត្តម គឹម ប៉ុណ្ណា អនុរដ្ឋលេខាធិការ អមដោយ លោក គូន ប៊ុនធឿន អគ្គនាយករងបច្ចេកទេស ថ្នាក់ដឹកនាំ និងគ្រូបង្គោល នៃនាយកដ្ឋានហេដ្ឋារចនាសម្ព័ន្ធសាធារណៈ ដោយមាន ការចូលរួមពីមន្ត្រីបច្ចេកទេស នៃមន្ទីរសាធារណការ និងដឹកជញ្ជូន ស្ថិតក្នុងភូមិសាស្ត្ររាជធានីភ្នំពេញ ខេត្តកណ្ដាល ខេត្តកំពង់ស្ពឺ និងខេត្តកំពង់ឆ្នាំង។ វគ្គបណ្ដុះបណ្ដាលនេះរៀបចំឡើង ក្នុងគោលបំណងផ្តល់ឱ្យអ្នកជំនាញ និងផ្នែកពាក់ព័ន្ធ ស្វែងយល់បន្ថែម នូវស្តង់ដារឌីហ្សាញ ដែលត្រូវបានរៀបចំកែសម្រួល និងធ្វើបច្ចុប្បន្នភាព ក្រោមជំនួយបច្ចេកទេសពីរដ្ឋាភិបាល អូស្ត្រាលី លើបទដ្ឋានសិក្សាគម្រោងផ្លូវថ្នល់ ឆ្នាំ១៩៩៩ ដើម្បីទទួលបានធាតុចូលសំខាន់ៗក្នុងការឌីហ្សាញ កម្រាលផ្លូវ ឆ្លើយតបទៅនឹងស្ថានភាពជាក់ស្តែង។ វគ្គបណ្ដុះបណ្ដាលស្ដីពី វិធីសាស្ត្រគណនាកម្រាលផ្លូវ “Pavement Design” ត្រូវបានរៀបចំនួន ៦លើក នៅតាមបណ្ដាមណ្ឌលបច្ចេកទេស និងបណ្ដុះបណ្ដាលរបស់ក្រសួងសាធារណការ និងដឹកជញ្ជូន ក្នុងក្របខណ្ឌ ទូទាំងប្រទេស ជូនដល់វិស្វករ និងមន្ត្រីបច្ចេកទេស អង្គភាពថ្នាក់កណ្ដាលរបស់ក្រសួង និងមន្ត្រីបច្ចេកទេស ពាក់ព័ន្ធនៃមន្ទីរសាធារណការ និងដឹកជញ្ជូន ទាំង២៥ រាជធានី-ខេត្ត ព្រមទាំងគ្រប់កងវិស្វកម្ម ដែលអនុវត្ត ការងារសាងសង់ផ្លូវថ្នល់ ស្ថិតក្រោមអាណាប័កក្រសួងសាធារណការ និងដឹកជញ្ជូន ដើម្បីបំពេញប្រសិទ្ធភាព ក្នុងសិក្សាស្វែងយល់ ផ្សព្វផ្សាយ និងអនុវត្ត៕