កាលពីថ្ងៃទី១៨ ខែតុលា ឆ្នាំ២០២៣ ឯកឧត្តម ឡាវ វ៉ាន់ អនុប្រធានសមាគមមិត្តភាពកម្ពុជា-ចិន បានចូលរួមក្នុងវេទិកាកំពូល«ខ្សែក្រវាត់និងផ្លូវ»សម្រាប់កិច្ចសហប្រតិបត្តិការអន្តរជាតិលើកទី៣។ ឯកឧត្តម បានយល់ឃើញថាកិច្ចសហប្រតិបត្តិការរយៈពេល ១ទសវត្សរ៍ក្រោមគំនិតផ្តួចផ្តើមខ្សែក្រវាត់ និងផ្លូវ ដែលមិនត្រឹមចូលរួមផ្តល់ផលប្រយោជន៍ក្នុងក្របខណ្ឌទ្វេភាគីរវាងកម្ពុជា និងចិនប៉ុណ្ណោះទេ ប៉ុន្តែថែមទាំងចូលរួមបំពេញបាននូវវេទិកាពហុភាគីក្នុងគោលបំណងផ្តល់ប្រយោជន៍កាន់តែច្រើន ដល់ប្រជាជាតិតាមបណ្តោយផ្លូវសូត្រ។ បន្ថែមពីលើនេះ ក្នុងចំណោមសកម្មភាពទាំង៨ដែលឯកឧត្តម Xi Jinping ប្រធានរដ្ឋចិនបានប្រកាសគាំទ្រការរួមគ្នាកសាង «ខ្សែក្រវាត់និងផ្លូវ» ប្រកបដោយគុណភាពខ្ពស់ ឯកឧត្តម ឡាវ វ៉ាន់បានកត់សម្គាល់ថា កិច្ចគាំទ្រការផ្លាស់ប្តូររវាងប្រជាជននិងប្រជាជនក្រោមទម្រនៃគំនិតផ្តួចផ្តើម«ខ្សែក្រវាត់និងផ្លូវ»នេះពិតជាបានផ្តល់ជាវេទិកាដ៏សំខាន់នៃកិច្ចសហប្រតិបត្តិការឈ្នះ-ឈ្នះដោយឈរលើគោលការណ៍សមភាព និងគោរពគ្នាទៅវិញទៅមក ដោយបង្កើនចំណងមិត្តភាពកាន់តែសកម្ម និងកាន់តែស្វាហាប់នូវទំនាក់ទំនង រវាងប្រទេស និងប្រទេស ហើយជាពិសេសបន្ថែមចំណងកាន់តែរឹងមាំលើទំនាក់ទំនងដួងចិត្តរវាងប្រជាជន និងប្រជាជន ហើយតាមរយៈចំណងនេះ ឯកឧត្តមបានទទួលឱកាសច្រើនក្នុងទំនាក់ទំនងជាមួយបណ្តាដៃគូអភិវឌ្ឍ និងសាកលវិទ្យាល័យនានា ក្នុងប្រទេសចិន ដែលផ្តល់លទ្ធភាពបន្ថែមក្នុងការផ្តល់អាហារូបករណ៍ ដល់សិស្ស-និស្សិតកម្ពុជា និងពង្រីកឱកាសសម្រាប់កម្មវិធីផ្លាស់ប្តូរទស្សនកិច្ចសិក្សានានា។ ជាមួយគ្នានេះផងដែរ តាមរយៈកិច្ចពិភាក្សានៅក្នុងវេទិកាប្រជាជន និងប្រជាជន បណ្តាសាកលវិទ្យាល័យជាច្រើន នៅក្នុងប្រទេសចិនមានចំណាប់អារម្មណ៍ខ្លាំង លើកិច្ចសហការជាមួយឯកឧត្តម ក្នុងនាមជាក្នុងនាមប្រធានក្រុមការងារគ្រប់គ្រងនិស្សិតក្រៅប្រទេស ប្រចាំសាធារណរដ្ឋប្រជាមានិតចិន ដើម្បីចូលរួមបង្កើនទំហំអង្កត់ផ្ចិតកាន់តែធំ ក្នុងការផ្តល់ឱកាសដល់សិស្ស-និស្សិតកម្ពុជា មកបន្តការសិក្សា នៅក្នុងប្រទេសចិន ដែលនេះជាការគូសបញ្ជាក់កាន់តែច្បាស់ ពីបេសកកម្មការងាររបស់ក្រុមការងារគ្រប់គ្រងនិស្សិតក្រៅប្រទេស ប្រចាំសាធារណរដ្ឋប្រជាមានិតចិន ក្នុងការចូលរួមចំណែកយ៉ាងសកម្ម ក្នុងរង្វង់នៃការអភិវឌ្ឍមូលធនមនុស្ស នៃយុទ្ធសាស្រ្តបញ្ចកោណដំណាក់កាលទី១ របស់រាជរដ្ឋាភិបាលកម្ពុជា ក្រោមការដឹកនាំប្រកបដោយភាពវាងវៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ៕