ឯកឧត្តមបណ្ឌិត រស់ វណ្ណា រដ្ឋលេខាធិការ និង ឯកឧត្តម ឡាវ វ៉ាន់ រដ្ឋលេខាធិការ បានអញ្ជើញដឹកនាំកិច្ចប្រជុំពិភាក្សាលើការរៀបចំផែនការវិនិយោគហេដ្ឋារចនាសម្ព័ន្ធលូ និងប្រព័ន្ធរំដោះទឹក សម្រាប់បញ្ចៀសការជន់លិចភូមិសាស្ត្ររាជធានីភ្នំពេញ កាលពីព្រឹកថ្ងៃទី០៥ ខែតុលា ឆ្នាំ២០២៣ នៅទីស្តីការក្រសួង។ កិច្ចប្រជុំនេះមានការចូលរួមពីសំណាក់ថ្នាក់ដឹកនាំអគ្គនាយកដ្ឋានសាធារណការ អគ្គនាយកដ្ឋានប្រព័ន្ធចម្រោះទឹកកខ្វក់ តំណាងមន្ទីរសាធារណការ និងដឹកជញ្ជូន រាជធានីភ្នំពេញ និងមន្ត្រីជំនាញពាក់ព័ន្ធជាច្រើនរូបផងដែរ។ គោលបំណងសំខាន់នៃកិច្ចប្រជុំនេះ គឺការប្រមូលមតិយោបល់ ក៏ដូចជាធាតុចូលក្នុងការរៀបចំផែនការមេរំដោះទឹកនៅក្នុងរាជធានីភ្នំពេញ ដោយរំពឹងថានៅរយៈពេល៥ឆ្នាំក្រោយនឹងមិនឱ្យមានការជន់លិចបន្តទៀត ស្របតាមអនុសាសន៍ណែនាំដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក៏ដូចជាត្រៀមរៀបចំផែនការវិនិយោគហេដ្ឋារចនាសម្ព័ន្ធលូ និងប្រព័ន្ធរំដោះទឹក ដើម្បីបន្តកិច្ចប្រជុំនៅក្រសួងសេដ្ឋកិច្ច និងហិរញ្ញវត្ថុ នាពេលបន្ទាប់។