កម្មវិធីបាឋកថាស្តីពីការអភិវឌ្ឍវិស័យនៅកម្ពុជា ទីស្ដីការក្រសួង៖ ថ្ងៃពុធ ៦កើត ខែភទ្របទ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី២០ ខែកញ្ញា ឆ្នាំ២០២៣ លោក ប្រាងហង្ស សេរីរិទ្ធ នាយកស្តីទី នៃវិទ្យាស្ថានតេជោ សែន សាធារណការ បានអញ្ជើញជាអធិបតីក្នុងពិធីបើកកម្មវិធីបាឋកថាមួយស្តីពីការអភិវឌ្ឍវិស័យនៅកម្ពុជា ដោយមានការចូលរួមពីថ្នាក់ដឹកនាំវិទ្យាស្ថាន តំណាងទីភ្នាក់ងារសហប្រតិបត្តិការអន្តរជាតិជប៉ុន (JICA) មន្រ្តីរាជការ និងនិស្សិតនៃវិទ្យាស្ថាន ប្រមាណ២០០នាក់។ កម្មវិធីនេះរៀបចំឡើងដោយវិទ្យាស្ថានតេជោ សែន សាធារណការ សហការជាមួយទីភ្នាក់ងារសហប្រតិបត្តិការអន្តរជាតិជប៉ុន (JICA) ក្នុងគោលបំណងដើម្បីចែករំលែកចំណេះដឹង និងបទពិសោធន៍នានា ដោយអ្នកជំនាញការទីភ្នាក់ងារJICAចំនួន ៣រូបមកពីប្រទេសជប៉ុនលើប្រធានបទចំនួន៣រួមមាន៖ ជំនួយអភិវឌ្ឍន៍របស់ប្រទេសជប៉ុននៅកម្ពុជា ការអភិវឌ្ឍហេដ្ឋារចនាសម្ព័ន្ធផែនៅប្រទេសជប៉ុន និងនៅកម្ពុជា និងការយល់ដឹងអំពីការបច្ចេកវិទ្យាក្នុងការរចនាប្លង់រចនាសម្ព័ន្ធផែ និងអាកាសយានដ្ឋាន។ គួរបញ្ជាក់ផងដែរថា៖ ក្រៅពីការសិក្សានៅក្នុងថ្នាក់ ការពិសោធន៍នៅមន្ទីរពិសោធន៍ និងការអនុវត្ដទ្រឹស្ដីនៅកន្លែងការងារជាក់ស្ដែង វិទ្យាស្ថានក៏មានកម្មវិធីបាឋកថា ចែករំលែកបទពិសោធន៍ពីអ្នកជំនាញជាតិ និងអន្ដរជាតិ ដើម្បីផ្ដល់ចំណេះដឹងបន្ថែមដល់និស្សិតផងដែរ៕