ភ្នំពេញៈ លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានដឹកនាំគណៈប្រតិភូក្រសួង ចុះត្រួតពិនិត្យគម្រោងកែលម្អបរិស្ថាន និងសណ្តាប់ធ្នាប់ លើដីចំណីផ្លូវ មុខសាលារៀនជ្រៃបាក់ ក្នុងខេត្តកំពង់ឆ្នាំង ដែលជាគម្រោងសាកល្បង (Pilot Project) របស់ទីភ្នាក់ងារសហប្រតិបត្តិការ អន្តរជាតិជប៉ុន ប្រចាំនៅកម្ពុជា (JICA) បានបញ្ចប់ការសាងសង់ ក្នុងឆ្នាំ២០១៩។ បេសកកម្មការងារនេះ បានប្រព្រឹត្តទៅ នៅថ្ងៃពុធ ទី១៣ ខែកញ្ញា ឆ្នាំ២០២៣ ដោយមានការអញ្ជើញចូលរួម អមដំណើរពីសំណាក់ រដ្ឋលេខាធិការ អនុរដ្ឋលេខាធិការ អភិបាលរង នៃគណៈភិបាលខេត្តកំពង់ឆ្នាំង អគ្គនាយក និងមន្ត្រីពាក់ព័ន្ធ ជាច្រើនរូប។ ការបំពេញបេសសកកម្មការងារ តាមខ្សែផ្លូវជាតិលេខ៥នេះ លោករដ្ឋមន្ត្រី និងគណៈប្រតិភូអមដំណើរ បានចុះពិនិត្យគម្រោងធ្វើឱ្យប្រសើរឡើងវិញ កំណាត់ផ្លូវជាតិលេខ៥ ភាគខាងត្បូង (ព្រែកក្តាម-ធ្លាម្អម) និងគម្រោងស្ថាបនាស្ពានវាង ក្រុងពោធិ៍សាត់ ខេត្តពោធិ៍សាត់ ។ គម្រោងធ្វើឱ្យប្រសើរឡើងវិញ កំណាត់ផ្លូវជាតិលេខ៥ ភាគខាងត្បូង​បច្ចុប្បន្ន សម្រេចលទ្ធផលបានជាង ៩០% ហើយ ខណៈដែលគម្រោងស្ថាបនាស្ពានវាង ក្រុងពោធិ៍សាត់ ដែលជាស្ពានធំ មានរហូតដល់ទៅ ៤គន្លង (២គន្លងទៅ និង២ គន្លងមក) កំពុងត្រូវបានយកចិត្តទុកដាក់ពន្លឿនការស្ថាបនា ដោយរំពឹងថា នឹងរួចរាល់ ដំណាលគ្នា ជាមួយនឹងគម្រោងពង្រីក និងលើកកម្រិតកំណាត់ផ្លូវជាតិលេខ៥ ខាងលើ ដើម្បីសម្រួលដល់ការធ្វើចរាចរណ៍ របស់បងប្អូនប្រជាពលរដ្ឋ និងទេសចរណ៍​ ពិសេសកាត់បន្ថយការកកស្ទះ នៅទីប្រជុំជន ក្រុងពោធិ៍សាត់។ គម្រោងធ្វេីឱ្យប្រសេីរឡេីងផ្លូវជាតិលេខ៥ (ផ្លូវអាស៊ានហាយវេលេខ១)៖ ប្រវែងផ្លូវ ៣៦៦ គីឡូម៉ែត្រ ឆ្លងកាត់ខេត្តកណ្តាល កំពង់ឆ្នាំង ពោធិ៍សាត់ បាត់ដំបង និងបន្ទាយមានជ័យ។ ចំណុចចាប់ផ្ដើម ព្រែកក្តាម និងចំណុចបញ្ចប់ ក្រុងប៉ោយប៉ែត ខេត្តបន្ទាយមានជ័យ។ ផ្លូវនេះ បែងចែកចេញជា ៣ កំណាត់៖ កំណាត់ទី១ ភាគខាងជើង (បាត់ដំបង-សិរីសោភ័ណ) កំណាត់ទី២ ភាគខាងត្បូង (ព្រែកក្តាម-ធ្លាម្អម) និងកំណាត់ទី៣ ភាគកណ្តាល (ធ្លាម្អម-បាត់ដំបង និងសិរីសោភ័ណ-ប៉ោយប៉ែត)។ ផ្លូវជាតិលេខ៥នេះ ជាប្រភេទផ្លូវបេតុងកៅស៊ូ (AC) ហើយទំហំទឹកប្រាក់គម្រោង ប្រមាណ ៥០០ លានដុល្លារសហរដ្ឋអាមេរិក។ គម្រោងធ្វើឱ្យប្រសើរឡើងផ្លូវជាតិលេខ៥នេះ នឹងផ្តល់អត្ថប្រយោជន៍យ៉ាងធំធេង ដូចជា អាចបង្កើនការនាំចេញ-នាំចូល និងជាផ្លូវមួយប្រកបដោយសក្តានុពលខ្ពស់សម្រាប់បម្រើ វិស័យសេដ្ឋកិច្ចកម្ពុជា ពិសេសអាចកាត់ បន្ថយគ្រោះថ្នាក់ និងការកកស្ទះចរាចរណ៍ បានយ៉ាងច្រើន។ លើសពីនេះទៅទៀត ប្រជាពលរដ្ឋតាមដងផ្លូវនេះ នឹងមានជីវភាព កាន់តែល្អប្រសើរ តាមរយៈកំណើននៃការអភិវឌ្ឍ វិនិយោគ និងទេសចរណ៍៕