ភ្នំពេញ៖ លោក ស៊ុន ចាន់ថុល ទេសរដ្ឋមន្រ្តី រដ្ឋមន្ត្រីក្រសួងសាធារណការ និងដឹកជញ្ជូន នឹងចូលរួមកម្មវិធី “រួមគ្នាដើម្បីលើកកម្ពស់ជីវភាព អ្នកប្រកបរបរដឹកជញ្ជូនក្រៅប្រព័ន្ធ ជាពិសេសអ្នកប្រកបមុខរបរ ដឹកជញ្ជូនដោយប្រើម៉ូតូកង់បី ឬរ៉ឺម៉ក់ខ្មែរ” ដោយមានការអញ្ជើញ ចូលរួមពីប្រធានសហភាព សហព័ន្ធយុវជនកម្ពុជា ប្រធានសមាគមរួមគ្នា ដើម្បីអភិវឌ្ឍន៍កម្ពុជា ក្រុមហ៊ុនសូគីមិច ក្រុមហ៊ុន Grab អង្គការកម្មវិធីអភិវឌ្ឍន៍ សហប្រជាជាតិ(UNDP) និងអ្នកបើកបរម៉ូតូរ៉ឺម៉ក់កង់បីខ្មែរជាង ៥០០០នាក់ផងដែរ ។ ពិធីនេះ នឹងប្រព្រឹត្តិទៅនៅថ្ងៃទី២៧ ខែមិថុនា ឆ្នាំ២០១៨ វេលាម៉ោង ០៣:៣០នាទី រសៀល នៅទីស្នាក់ការ អគារខេមរានី សហភាពសហព័ន្ធយុវជនកម្ពុជា រាជធានីភ្នំពេញ ដែលមានទីតាំងស្ថិតនៅភូមិព្រែកលាប សង្កាត់ព្រែកលាប ខណ្ឌជ្រោយចង្វារ រាជធានីភ្នំពេញ ។ កម្មវិធីនេះ រៀបចំឡើងដើម្បីចូលរួមចំណែក ជួយលើកកម្ពស់ជីវភាព បងប្អូនប្រកបរបររ៉ឺម៉ក់កង់បីខ្មែរ ជាង២០០០០ នាក់ នៅរាជធានីភ្នំពេញ ជាពិសេសសមាជិក សមាជិកា នៃសមាគមរួមគ្នាដើម្បីអភិវឌ្ឍន៍កម្ពុជា ដោយនឹងបំពាក់នូវ Application Technology របស់ក្រុមហ៊ុនGRAB ដែលជាមធ្យោបាយដឹកជញ្ជូន មួយប្រើបច្ចេកវិទ្យា និងការបញ្ចុះតម្លៃ ៥% ក្នុងរយៈពេល ៦ខែដំបូង ។ ជាងនេះទៅទៀត ពលរដ្ឋប្រកបរបររត់រ៉ឺម៉ក់កង់បីខ្មែរ នៃសមាគមរួមគ្នាដើម្បីអភិវឌ្ឍន៍កម្ពុជា នឹងទទួលបានការបញ្ចុះតម្លៃសាំងធម្មតា និងសាំងស៊ុបពែ ទាបជាងតម្លៃទីផ្សារ ៣០០រៀល (ក្នុង១លីត្រ) ពីក្រុមហ៊ុនសូគីមិច ដែលចាប់អនុវត្តពីថ្ងៃទី១៥ ខែមិថុនា ឆ្នាំ២០១៨ នេះតទៅ ៕