ស្ពានបេតុងខ្សែកាបភ្ជាប់ពីកោះពេជ្រទៅកោះនរានឹងរៀបចំប្រារព្វពីធីភ្ជាប់នៅថ្ងៃទី១២ ខែកញ្ញា ឆ្នាំ២០២៣ខាងមុខ ក្រោមវត្តមានលោក ឃួង ស្រេង អភិបាលរាជធានីភ្នំពេញ។ នេះបើតាមទំព័រហ្វេសប៊ុករបស់លោក កើត ឆែ អភិបាលរងរាជធានីភ្នំពេញ។ លោក កើត ឆែ បានបញ្ជាក់ថា បច្ចុប្បន្នការសាងសង់ស្ពានបេតុងខ្សែកាបកោះនរា ភ្ជាប់ពីទីក្រុងកោះពេជ្រទៅទីក្រុងកោះនរា បានសម្រេចប្រមាណ៩២ភាគរយហើយ។ ដូច្នេះតាមផែនការស្ពានខ្សែកាបនេះ គ្រោងនឹងបញ្ចប់ការសាងសង់នៅពាក់កណ្តាលខែវិច្ឆិកា ឆ្នាំ២០២៣ មុនព្រះរាជពិធីបុណ្យអុំទូកខាងមុខ។ សូមជម្រាបថា ស្ពានខ្សែកាបកោះនរាភ្ជាប់ទៅកោះពេជ្រនេះ បានបើកការដ្ឋានសាងសង់កាលពីថ្ងៃទី២៦ ខែតុលា ឆ្នាំ២០២០ និងចំណាយទុនវិនិយោគ៣៨លានដុល្លារអាមេរិកក្នុងការសាងសង់ ដោយក្រុមហ៊ុនវិនិយោគទុនអនិកជនកម្ពុជា(OCIC) ក្រោមការគ្រប់គ្រងរបស់រដ្ឋបាលរាជធានីភ្នំពេញ។ ស្ពាននេះមានប្រវែង៨២៤ម៉ែត្រ និងទទឹង២៤,៥០ម៉ែត្រ ហើយមាន៤គន្លង គឺ២គន្លងសម្រាប់រថយន្ត ១គន្លងសម្រាប់ម៉ូតូ និង១គន្លងទៀតសម្រាប់អ្នកថ្មើជើង៕