គម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់នៅក្រុងតាខ្មៅ (ជំហាន២) ត្រូវបានលើកជាប្រធានបទសម្រាប់ជំនួបពិភាក្សារវាងថ្នាក់ដឹកនាំក្រសួង និងនាយិកាមូលនិធិ​សហប្រតិបត្តិការ​អភិវឌ្ឍ​ន៍សេដ្ឋកិច្ច​ (EDCF)​ របស់​រដ្ឋាភិបាល​សាធារណរដ្ឋកូរ៉េ ទីស្ដីការក្រសួង៖ ថ្ងៃពុធ ១៤កើត ខែស្រាពណ៍ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី៣០ ខែសីហា ឆ្នាំ២០២៣ ឯកឧត្តម រស់ វណ្ណា រដ្ឋលេខាធិការ និងជាប្រធានគ្រប់គ្រង និងសម្របសម្រួលគម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់នៅក្រុងតាខ្មៅ (ជំហាន២) បានអញ្ជើញជួបពិភាក្សាការងារជាមួយលោកស្រី Minnie Chey នាយិកាមូលនិធិ​សហប្រតិបត្តិការ​អភិវឌ្ឍ​ន៍សេដ្ឋកិច្ច​ (EDCF)​ របស់​រដ្ឋាភិបាល​សាធារណរដ្ឋកូរ៉េ​ប្រចាំនៅកម្ពុជា ដោយមានការចូលរួមពីថ្នាក់ដឹកនាំក្រសួងទទួលបន្ទុក មន្ត្រីជំនាញបច្ចេកទេស នៃអគ្គនាយកដ្ឋានប្រព័ន្ធចម្រោះទឹកកខ្វក់ និងសមាជិកគ្រប់គ្រងគម្រោងផងដែរ។ ជំនួបពិភាក្សានេះត្រូវបានរៀបចំឡើងក្នុងគោលបំណងដើម្បីពិនិត្យលើការងារគម្រោងអភិវឌ្ឍន៍ប្រព័ន្ធប្រព្រឹត្តកម្មទឹកកខ្វក់នៅក្រុងតាខ្មៅ (ជំហាន២) ដើម្បីឈានដល់ការចាប់ផ្ដើមសិក្សាសមិទ្ធិលទ្ធភាពគម្រោងនាដើមឆ្នាំ២០២៤ ក្រោមជំនួយឥតសំណង (Grant) របស់មូលនិធិ​សហប្រតិបត្តិការ​អភិវឌ្ឍ​ន៍សេដ្ឋកិច្ច(EDCF)​ កូរ៉េ៕