ភ្នំពេញ៖ គណៈកម្មការគ្រប់គ្រងគម្រោងកសាងផែនការមេ សម្រាប់សញ្ញាជំនួយនាវាចរណ៍ នៅក្នុងព្រះរាជាណាចក្រកម្ពុជា ដឹកនាំដោយ លោក រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានគណៈ កម្មការគ្រប់គ្រងគម្រោង បានប្រជុំ ដើម្បីពិនិត្យ​មើលលទ្ធផលវឌ្ឍនភាពការងារ និងលើកទិសដៅការងារបន្ត សម្រាប់ក្រុមការងារ កាលពីព្រឹកថ្ងៃទី២៨ ខែសីហា ឆ្នាំ២០២៣ កន្លងទៅថ្មីៗនេះ។ ក្នុងកិច្ចប្រជុំនេះ មានការចូលរួមពីសមាជិកគណៈកម្មការ ក្រុមអ្នកជំនាញការ នៃវិទ្យាស្ថានសញ្ញាជំនួយនាវាចរណ៍កូរ៉េ និងមន្រ្តីជំនា​​ញ នៃអគ្គនាយកដ្ឋានដឹកជញ្ជូន ផ្លូវទឹក ផ្លូវសមុទ្រ និងកំពង់ផែ ផងដែរ។ កិច្ចប្រជុំនេះ ត្រូវបានរៀបចំឡើង ដើម្បីពិនិត្យមើលសកម្មភាព លទ្ធផលការងារ កន្លងមក និងលើកទិសដៅការងារបន្ត សម្រាប់ក្រុមការងារទាំងមូល និងជាលទ្ធផល ភាគីកូរ៉េ នឹងបន្តផ្តល់គម្រោងជំហានទី២ ដែលគ្រោងនឹងចាប់ផ្តើមអនុវត្ត​នៅដើមឆ្នាំ ២០២៥ ខាងមុខ ហើយចំពោះ​សេចក្តីព្រាងផែនការមេ សម្រាប់សញ្ញាជំនួយ នាវាចរណ៍នេះ ភាគីកូរ៉េ នឹងឱ្យភាគីកម្ពុជា ធ្វើការត្រួតពិនិត្យផ្តល់ធាតុចូលបន្ថែម។ ជាមួយគ្នានេះ ភាគីកូរ៉េក៏ នឹងបន្តផ្តល់នូវឧបករណ៍សម្ភារបច្ចេកទេស សម្រាប់ដំឡើង សញ្ញាជំនួយនាវាចរណ៍ និងវគ្គបណ្តុះបណ្តាលជំនាញ ទាំងនៅក្នុងប្រទេសកម្ពុជា និងការសិក្សាយកបទពិសោធន៍ នៅសាធារណរដ្ឋកូរ៉េ ជូនដល់មន្រ្តីបច្ចេកទេសកម្ពុជា ផងដែរ៕