[Kampucheathmey] - កំពង់ផែពហុបំណង ជាគម្រោងវិនិយោគដ៏ធំបំផុតមិនធ្លាប់មាននៅខេត្តកំពង់ឆ្នាំង
2023-08-23
ទៅកាន់ទំព័រចុះផ្សាយក្នុង Kampucheathmey
ការវិនិយោគសាងសង់កំពង់ផែពហុបំណង និងមជ្ឈមណ្ឌលភស្តុភារកម្មនៅស្រុកកំពង់លែង ជាគម្រោងវិនិយោគដ៏ធំបំផុតនៅខេត្តកំពង់ឆ្នាំង។
លោក ហង្ស ពិសី នាយកទីចាត់ការផែនការនិងវិនិយោគ នៃសាលាខេត្តកំពង់ឆ្នាំងបានឲ្យកម្ពុជាថ្មីដឹងថា ខេត្តកំពង់ឆ្នាំងទទួលបានគម្រោងវិនិយោគធំៗជាច្រើន ខណៈដែលគម្រោងអភិវឌ្ឍកំពង់ផែពហុបំណងជាគម្រោងវិនិយោគធំបំផុតក្នុងខេត្ត។
លោកឲ្យដឹងថា ការវិនិយោគសាងសង់កំពង់ផែពហុបំណង និងមជ្ឈមណ្ឌលភស្តុភារកម្មនៅស្រុកកំពង់លែងជាគម្រោងវិនិយោគដ៏ធំមហាសាល ដែលលោកចាត់ទុកទំហំនៃការវិនិយោគនេះបានជួយលើកមុខមាត់ដល់ខេត្តកំពង់ឆ្នាំងទាំងមូល ក៏ដូចជាបានជួយអភិវឌ្ឍសេដ្ឋកិច្ចខេត្ត ជួយឲ្យប្រជាពលរដ្ឋមានការងារធ្វើ។
លោក ហង្ស ពិសី បន្តថា ក្រៅពីគម្រោងវិនិយោគវិនិយោគសាងសង់កំពង់ផែពហុបំណង និងមជ្ឈមណ្ឌលភស្តុភារកម្ម ខេត្តទទួលបានគម្រោងវិនិយោគផ្សេងទៀតដូចជារោងចក្រ សហគ្រាស ប៉ុន្តែទំហំនៃការវិនិយោគមិនធំដូចគម្រោងអភិវឌ្ឍសាងសង់កំពង់ផែពហុបំណង និងមជ្ឈមណ្ឌលភស្តុភារកម្មនៅស្រុកកំពង់លែង ដែលចាយទុនរយលានដុល្លារ។
សក្តានុពលរបស់ខេត្តកំពង់ឆ្នាំងដែលមានហេដ្ឋារចនាសម្ព័ន្ធតភ្ជាប់មានទាំងផ្លូវទឹក ផ្លូវដែក និងផ្លូវគោក។ លោក ហង្ស ពិសី បានលើកឡើងថា នៅពេលខាងមុខតាមរយៈគម្រោងសាងសង់ស្ពានឆ្លងកាត់ទន្លេ ដែលរដ្ឋាភិបាលប្រកាសគ្រោងបើកការដ្ឋាននៅឆ្នាំ២០២៤ នឹងជំរុញការអភិវឌ្ឍសេដ្ឋកិច្ចខេត្តបន្ថែមទៀត។
គម្រោងវិនិយោគសាងសង់កំពង់ផែពហុបំណង និងមជ្ឈមណ្ឌលភស្តុភារកម្ម ជាគម្រោងវិនិយោគដ៏ធំលើកដំបូងនៅខេត្តកំពង់ឆ្នាំងដែលចាយទុនវិនិយោគជាង ៣០០ លានដុល្លារ។ គម្រោងនេះមានទីតាំងស្ថិតនៅតំបន់ភ្នំទេពី ភូមិកែងតាសុខ ឃុំកំពង់ហាវ ស្រុកកំពង់លែង ខេត្តកំពង់ឆ្នាំងលើផ្ទៃដីទំហំជាង ១០០ហិកតា។
ក្នុងគម្រោងមានការអភិវឌ្ឍកំពង់ផែដឹកជញ្ជូនទំនិញ មណ្ឌលសន្និធិប្រេង រមណីយដ្ឋានទេសចរណ៍ និងតំបន់សេដ្ឋកិច្ចពិសេស។
