ជំនួបរវាងថ្នាក់ដឹកនាំក្រសួង និងគណៈអភិបាលខេត្តបាត់ដំបង ដើម្បីពិនិត្យលើកិច្ចសហការពន្លឿនដោះស្រាយផលប៉ះពាល់គម្រោងជីកស្ដារប្រឡាយកំពង់សីមា ក្រុងបាត់ដំបង កិច្ចប្រជុំពិភាក្សាស្ដីអំពីវឌ្ឍនភាពការងារ និងផ្ដល់កិច្ចសហការក្នុងការជួយពន្លឿនដោះស្រាយផលប៉ះពាល់គម្រោងជីកស្ដារប្រឡាយកំពង់សីមា ក្រុងបាត់ដំបង មានការអញ្ជើញដឹកនាំដោយ ឯកឧត្តម រស់ វណ្ណា រដ្ឋលេខាធិការក្រសួងសាធារណការ និងដឹកជញ្ជូន និងឯកឧត្តម សុខ លូ អភិបាល នៃគណៈអភិបាលខេត្តបាត់ដំបង នៅព្រឹកថ្ងៃចន្ទ ៥កើត ខែស្រាពណ៌ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២១ ខែសីហា ឆ្នាំ២០២៣ កន្លងទៅ។ ក្រុងបាត់ដំបងបានទទួលគម្រោងរបស់ក្រសួងសាធារណការ និងដឹកជញ្ជូន លើគម្រោងស្ដារប្រឡាយមេកំពង់សីមា ប្រវែង៥,០០០ម៉ែត្រ និងស្ថាបនាលូប្រអប់ កម្ពស់២ម៉ែត្រ ទទឹង២ម៉ែត្រ ចំនួន១៥កន្លែង សម្រាប់ធ្វើការរំដោះទឹកលិចក្រុងបាត់ដំបង ប៉ែកខាងលិចស្ទឹង ដែលប្រឡាយមេ១ខ្សែនេះឆ្លងកាត់សង្កាត់ចំនួន៦គឺ សង្កាត់ទួលតាឯក សង្កាត់ចំការសំរោង សង្កាត់ស្លាកែត សង្កាត់អូរម៉ាល់ សង្កាត់វត្តគរ និងសង្កាត់អូរចារ។ ក្នុងដំណាក់កាលនៃការអនុវត្តគម្រោងស្ដារប្រឡាយមេរំដោះទឹកលិចនេះ ក៏បានជួបប្រឈមនឹងបញ្ហាមួយចំនួនពាក់ព័ន្ធទៅនឹងបញ្ហាសំណង់របស់ប្រជាពលរដ្ឋដែលកំពុងរំលោភលើដីចំណីប្រឡាយដោយប្រជាពលរដ្ឋមួយចំនួនបានធ្វើសំណង់ផ្ទះពីលើប្រឡាយ និងមួយចំនួនចាក់ដីបំពេញបិទប្រឡាយតែម្ដង ដែលក្រុមការងារទាមទារឱ្យមានការរុះរើចំពោះសំណង់ដែលមិនមានរបៀបរៀបរយ សំណង់លើខ្នងប្រឡាយ និងសំណូមពរឱ្យប្រជាពលរដ្ឋធ្វើស្ពាន ឬដាក់លូទៅតាមទំហំ និងលំហូរ តាមបច្ចេកទេសរបស់ក្រុមការងារ។ ឯកឧត្តមរដ្ឋលេខាធិការបានស្នើដល់រដ្ឋបាលខេត្តបាត់ដំបង សូមជួយធ្វើយ៉ាងណាសម្របសម្រួលការងារផលប៉ះពាល់ក្នុងការជីកស្តារប្រឡាយនេះឱ្យដំណើរការរលូន និងតាមផែនការដែលបានគ្រោងទុក។ ហើយតបតាមសំណូមពររបស់ឯកឧត្តមរដ្ឋលេខាធិការ ឯកឧត្តម សុខ លូ អភិបាលខេត្តបាត់ដំបង ក៏បានមានប្រសាសន៍ណែនាំដល់រដ្ឋបាលក្រុងបាត់ដំបង និងចៅសង្កាត់ដែលពាក់ព័ន្ធទាំងអស់ ត្រូវធ្វើការដោះស្រាយជាបន្ទាន់ចំពោះប្រជាពលរដ្ឋណាដែលបានសាងសង់សំណង់លើខ្នងប្រឡាយ ឬរំលោភលើចំណីប្រឡាយទាំងនោះ និងត្រូវធ្វើការរុះរើជាបន្ទាន់ ដើម្បីពន្លឿនដល់ការស្ដារប្រឡាយកំពង់សីមាឱ្យមានភាពរលូន៕