សិក្ខាសាលាផ្សព្វផ្សាយអនុក្រឹត្យស្តីពីប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ (Port EDI)និងលិខិតបទដ្ឋានគតិយុត្តពាក់ព័ន្ធដែលជាយន្តការក្នុងការធ្វើបែបបទនាវាចូលចេញតាមកំពង់ផែនៃព្រះរាជាណាចក្រកម្ពុជា ព្រះសីហនុ៖ ថ្ងៃអង្គារ ១៤រោច ខែទុតិយាសាឍ ឆ្នាំថោះ បញ្ចស័ក ព.ស ២៥៦៧ ត្រូវនឹង ថ្ងៃទី១៥ ខែសីហា ឆ្នាំ២០២៣ លោកអគ្គនាយករង ប៉ុង វុទ្ធី តំណាងឯកឧត្តម ម៉ក់ ស៊ីដេត អគ្គនាយក នៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ និងកំពង់ផែ ក្រសួងសាធារណការ និងដឹកជញ្ជូន និងលោក ថោង វីរ៉ូ អគ្គនាយករងកំពង់ផែស្វយ័ត្នក្រុងព្រះសីហនុ បានអញ្ជើញជាអធិបតីក្នុងពិធីបើកសិក្ខាសាលាផ្សព្វផ្សាយអនុក្រឹត្យស្តីពីប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ និងលិខិតបទដ្ឋានគតិយុត្តពាក់ព័ន្ធមួយចំនួនទៀតដែលជាយន្តការក្នុងការធ្វើបែបបទនាវាចូលចេញតាមកំពង់ផែនៃព្រះរាជាណាចក្រកម្ពុជា។ សិក្ខាសាលានេះរៀបចំឡើងដោយអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ និងកំពង់ផែ ក្រសួងសាធារណការ និងដឹកជញ្ជូន និងកំពង់ផែស្វយ័តក្រុងព្រះសីហនុ ក្នុងគោលបំណងផ្សព្វផ្សាយខ្លឹមសារនៃអនុក្រឹត្យ និងការងារពាក់ព័ន្ធជាមួយក្រសួងស្ថាប័ន ក្រុមហ៊ុននាវា និងក្រុមហ៊ុនភ្នាក់ងារនាវា ដោយមានសិក្ខាកាមចូលរួមជាតំណាងមកពីអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ​ និងកំពង់ផែ​ កំពង់ផែស្វយ័តក្រុងព្រះសីហនុ អគ្គនាយកដ្ឋានគយ និងរដ្ឋាករ អគ្គនាយកដ្ឋានអន្តោប្រវេសន៍ អគ្គនាយកដ្ឋានបច្ចេកទេសសុខាភិបាល គណៈកម្មការជាតិសន្តិសុខលម្ហសមុទ្រ នាយកដ្ឋាននគរបាលការពារព្រំដែនទឹក សាលាខេត្តព្រះសីហនុ សាលាខេត្តកំពត សាលាខេត្តកោះកុង សាលាខេត្តកែប មន្ទីរសាធារណៈការ និងដឹកជញ្ជូន ខេត្តជាប់តំបន់ឆ្នេរ ក្រុមហ៊ុននាវា និងក្រុមហ៊ុនភ្នាក់ងារនាវា សរុបប្រមាណ១០០រូប។ ថ្លែងនៅក្នុងកម្មវិធីបើកនាឱកាសនោះ លោកអគ្គនាយករង បានគូសបញ្ជាក់ពីភាពជោគជ័យ និងដំណើរការយ៉ាងរលូន របស់ក្រសួងសាធារណការ និងដឹកជញ្ជូន ក្នុងការដាក់ឱ្យដំណើរការសាកល្បង ប្រព័ន្ធផ្លាស់ប្តូរទិន្នន័យអេឡិចត្រូនិកកំពង់ផែ ចាប់តាំងពីថ្ងៃទី ១៧ ខែសីហា ឆ្នាំ២០២២ រហូតមកដល់ពេលបច្ចុប្បន្ននេះ។ លោក ក៏បានជំរុញលើកទឹកចិត្តឱ្យសិក្ខាកាមទាំងអស់ស្វែងយល់កាន់តែច្បាស់នូវខ្លឹមសារបទបង្ហាញនានានៅក្នុងសិក្ខាសាលា ក៏ដូចជាជួយផ្សព្វផ្សាយបន្តឱ្យកាន់តែទូលំទូលាយ ដើម្បីអនុវត្តប្រកបដោយប្រសិទ្ធភាពខ្ពស់តាមខ្លឹមសារនៃអនុក្រឹត្យនេះ និងលិខិតបទដ្ឋានគតិយុត្តពាក់ព័ន្ធទាំងអស់។ គួររំលឹកផងដែរថា៖ ប្រព័ន្ធPort EDI ត្រូវបានអភិវឌ្ឍឡើងក្រោមជំនួយហិរញ្ញប្បទានឥតសំណង របស់រដ្ឋាភិបាលជប៉ុន និងប្រជាជនជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុន(JICA) ហើយក្រសួងសាធារណការ និងដឹកជញ្ជូន រួមជាមួយក្រសួងស្ថាប័ន ពាក់ព័ន្ធនៃគណៈកម្មការធ្វើបែបបទនាវា ក៏បានរៀបចំសេចក្តីព្រាងអនុក្រឹត្យស្តីពីប្រព័ន្ធផ្លាស់ប្តូរទិន្នន័យនេះឡើង ដើម្បីជាគតិយុត្តសម្រាប់គ្រប់គ្រងប្រព័ន្ធ Port EDI នេះ។ នេះជាការយកចិត្តទុកដាក់របស់រាជរដ្ឋាភិបាល ក៏ដូចជាក្រសួងសាធារណការ និងដឹកជញ្ជូន និងស្ថាប័នពាក់ព័ន្ធរួបរួមគ្នាធ្វើឱ្យចេញនូវប្រព័ន្ធនេះដើម្បីជួយសម្រួលដល់វិស័យឯកជនពេលនាវា ចូលចេញនៅកម្ពុជា កាត់បន្ថយភាពស្មុគស្មាញ កាត់បន្ថយការប្រើប្រាស់ពេលវេលាយូរ ក្នុងការស្នើសុំ នាវាចូលចេញនៅកម្ពុជា និងជាការបង្ហាញអំពីការយកចិត្តទុកដាក់លើការផ្តល់សេវាសាធារណៈជូនវិស័យឯកជន ធ្វើឱ្យមានប្រសិទ្ធភាព ធ្វើឱ្យមានតម្លាភាព និងធ្វើឱ្យបានលឿន តាមអនុសាសន៍ណែនាំដ៏ខ្ពង់ខ្ពស់ របស់សម្ដេចតេជោនាយករដ្ឋមន្ត្រី៕