ភ្នំពេញ៖ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន កាលពីព្រឹកថ្ងៃទី១៨ ខែមិថុនា ឆ្នាំ២០១៨ បានចូលរួមជាកិត្តិយស ត្បាញក្រមា ប្រវែង១ពាន់ម៉ែត្រនៅវាលព្រះមេរុ ដើម្បីចូលរួមលើកតម្កើងអត្តសញ្ញាណជាតិ និងដើម្បីបំបែកឯតទគ្គកម្ម “ក្រមាវែងជាងគេលើពិភពលោក” ។ គោលបំណងនៃការត្បាញក្រមាប្រវែង១ពាន់ម៉ែត្រនេះ គឺដើម្បីបំបែកឯតទគ្គកម្ម ក្រមាវែងជាង គេលើពិភពលោក ។ ជាមួយគ្នានេះក៏បានផ្តល់ជូនប្រជាជនខ្មែរទាំងអស់ក្នុងគោលបំណងធំៗបី រួមមានទី១ លើកកម្ពស់មោទនភាពជាតិ និងកិត្យានុភាពជាតិនៅលើឆាកអន្តរជាតិ ។ ទី២ បង្កើតការចូលរួម ចំណែក ពីប្រជាជនកម្ពុជាគ្រប់មជ្ឍដ្ឋានទាំងអស់ ដើម្បីរួមគ្នាថែរក្សា និងលើកស្ទួយមត៌កវប្បធម៌ ប្រពៃណីខ្មែរ។ ទី៣ ជំរុញឲ្យមានសាមគ្គីភាពនិងឯកភាពជាតិតាមរយៈការរួម គ្នាបង្កើតស្នាដៃដ៏ធំ សម្រាប់ជាតិ ។​ សូមរំឭកថា យុវជនកម្ពុជាដឹកនាំដោយសហភាពសហព័ន្ធកម្ពុជាក្រោមចលនា «GOGO CAMBODIA» បានរួមគ្នាបង្កើតព្រឹត្តិការណ៍ត្បាញ់ក្រមាវែងជាងគេនៅលើពិភពលោកប្រវែង ១០០០ពាន់ ក្រោមប្រធានបទថា «ជឿថាខ្ញុំធ្វើបាន ជឿថាយើងធ្វើបាន ជឿថាខ្មែរធ្វើបាន»។ ព្រឹត្តិការណ៍ត្បាញក្រមាប្រវែង ១០០០ម៉ែត្រ ដើម្បីឈានទៅ «បំបែកឯតទកគ្គកម្ម ក្រមាវែងជាងគេលើពិភពលោក» ត្រូវបានបើកធ្វើឡើងជាផ្លូវការកាលពីថ្ងៃទី១៤ ខែកុម្ភៈ ឆ្នាំ២០១៨ នៅលើសួនច្បារព្រះមេរុមុខសារៈមន្ទីរជាតិ ជាប់ព្រះបរមរាជវាំង ៕