កណ្តាល៖ បើយើងគ្មានសុខសន្តិភាព យើងគ្មានការអភិវឌ្ឍន៍នោះទេ, បើយើងគ្មានសុខសន្តិភាព យើងមិនអាចនាំយកកសិផលយើងទៅលក់នៅបរទេសបានទេ, បើយើងគ្មានសុខសន្តិភាព យើងមិនអាចទាក់ទាញអ្នកវិនិយោគឲ្យមកវិនិយោគទុនរាប់ពាន់លានដុល្លារដើម្បីកសាងផ្លូវ ផ្លូវល្បឿនលឿន កំពង់ផែ និងគម្រោងព្រែកជីកហ្វូណនតេជោបានទេ, បើយើងគ្មានសុខសន្តិភាព យើងមិនអាចគៀរគរសប្បុរសជនឲ្យមកជួយសាង់សង់មន្ទីរពេទ្យតេជោសែនកោះធំបានទេ ដូច្នេះកត្តាសុខសន្តិភាពនេះសំខាន់ណាស់ យើងត្រូវនាំគ្នាការពារសុខសន្តិភាពប្រទេសយើងឲ្យបានគង់វង្សជាដាច់ខាត។នេះជាការថ្លែងបញ្ជាក់របស់ឯកឧត្តមទេសរដ្ឋមន្ត្រី ស៊ុន ចាន់ថុល ប្រធានគណៈអចិន្ត្រៃយ៍ក្រុមការងារគណបក្សចុះមូលដ្ឋានស្រុកកោះធំ និងក្រុងសំពៅពូន ខេត្តកណ្តាល នាថ្ងៃសៅរ៍ ទី១៥ ខែកក្កដា ឆ្នាំ២០២៣ ដែលជាថ្ងៃទី១៥ នៃយុទ្ធនាការឃោសនាបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣នេះ ក្នុងពិធីសំណេះសំណាលជាមួយបងប្អូនប្រជាពលរដ្ឋជាសមាជិកគណបក្សក្នុងមូលដ្ឋានសង្កាត់សំពៅពូន និងសង្កាត់ជ្រោយតាកែវ នៃក្រុងសំពៅពូន សរុបប្រមាណ ១៨០០នាក់។ នាឱកាសនោះ ឯកឧត្ដមទេសរដ្ឋមន្ត្រី ស៊ុន ចាន់ថុល បានអំពាវនាវដល់បងប្អូនប្រជាពលរដ្ឋ សូមបោះឆ្នោតជូនគណបក្សប្រជាជនកម្ពុជា លេខរៀងទី១៨ ដើម្បីបន្តថែរក្សាការពារសុខសន្តិភាព។ បោះឆ្នោតជូនគណបក្សប្រជាជនកម្ពុជាគឺបោះឲ្យខ្លួនយើង។ ឯកឧត្តមទេសរដ្ឋមន្ត្រីបានថ្លែងបន្ថែមថា ប្រទេសជាតិយើងមានការរីកចំរើនលើគ្រប់វិស័យទាំងអស់ ដែលបានធ្វើឲ្យយើងរស់នៅបានយូរជាងមិន ព្រោះយើងមានមន្ទីរពេទ្យល្អ សម្ភារៈ ឧបករណ៍បច្ចេកទេសល្អ គ្រូពេទ្យមានជំនាញ វិជ្ជា ជីវៈច្បាស់លាស់ ត្រឹមត្រូវ យើងមានទឹកស្អាតបរិភោគ មានអាហារហូបចុកមានអនាម័យគ្រប់គ្រាន់ មានបរិស្ថានល្អ មានសណ្តាប់ធ្នាប់ល្អ និងមានការគិតយ៉ាងល្អិតល្អន់ពីថ្នាក់ដឹកនាំជាពិសេសពីសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជាដែលសម្ដេចបានមានប្រសាសន៍ថា យើងជាអ្នកបម្រើរាស្ត្រ យើងមិនមែនជាចៅហ្វាយរាស្ត្រទេ ដូច្នេះយើងត្រូវបម្រើរាស្ត្រឲ្យបានល្អប្រសើរបំផុត តាមរយៈបង្ខិតសេវាសាធារណៈឲ្យមកជិតប្រជាពលរដ្ឋ ដូចជាការធ្វើសំបុត្រកំណើត បញ្ជីជាតិ អត្តសញ្ញាណបណ្ណ សំបុត្រអាពាហ៍ពិពាហ៍ សៀវភៅគ្រួសារ សៀវភៅស្នាក់នៅ។ល។ ជាមួយគ្នានោះ ឯកឧត្តមបានរំលឹកពីសម័យអាណាចក្រហ្វូណន ជាង១៥០០ឆ្មាំមកហើយ ដែលប្រទេសកម្ពុជាបានបោះបង់ព្រែកមួយចំនួនចោល ដូចជាព្រែកអំបិល នៅស្រុកស្អាងដែលកាលសម័យនោះ ប្រជាពលរដ្ឋបានដឹកអំបិលពីកែប ពីកំពតមកលក់នៅទីនោះ ប៉ុន្តែបច្ចុប្បន្ននៅសម័យតេជោសែន យើងនឹងស្ដារព្រែកជីកហ្វូណនតេជោដែលតភ្ជាប់ពីទន្លេមេគង្គ មកព្រែកតាឯក មកទន្លេបាសាក់ មកព្រែកតាហ៊ីងក្នុង ស្រុកកោះធំ ទៅតាកែវ ទៅកែប និងកំពតតែម្ដង។ បើតាមលោកពូម្នាក់ជាប្រជាពលរដ្ឋដែលបានឆ្លងកាត់របប ប៉ុល ពត បានថ្លែងថា សម័យ ប៉ុល ពត ពិតជាមានការធ្វើទារុណកម្ម បង្អត់អាហារ កាប់សម្លាប់ឥតត្រាប្រណីយ៉ាងសាហាវព្រៃផ្សៃ។ ប៉ុន្តែបច្ចុប្បន្នយើងមានសុខសន្តិភាពហើយដោយសារមានសម្ដេចតេជោ ហ៊ុន សែន ជានាយករដ្ឋមន្ត្រីនៃកម្ពុជាដ៏ល្អ សម្ដេចស្រឡាញ់ប្រទេសជាតិ ស្រឡាញ់ប្រជាជន ស្រឡាញ់សន្តិភាព ទើបយើងបានសុខសប្បាយជារៀងរហូតមកដល់សព្វថ្ងៃនេះ។ ដូច្នេះយើងត្រូវតបស្នងសងគុណសម្ដេចតេជោគឺយើងត្រូវតែនាំគ្នាទៅបោះឆ្មោតគាំទ្រសម្ដេចតេជោ បោះជូនគណបក្សប្រជាជនកម្ពុជា លេខរៀងទី១៨។ ទន្ទឹមគ្នានោះឯកឧត្តមទេសរដ្ឋមន្ត្រី ស៊ុន ចាន់ថុល បន្តអំពាវនាវសូមឲ្យបងប្អូនប្រជាពលរដ្ឋអញ្ជើញទៅបោះឆ្នោតជ្រើសតាំងតំណាងរាស្ត្រនីតិកាលទី៧ នាថ្ងៃអាទិត្យ ទី២៣ ខែកក្កដា ឆ្នាំ២០២៣ ខាងមុខឱ្យបានគ្រប់ៗគ្នា ដើម្បីបំពេញតួនាទីជាពលរដ្ឋល្អ។ ជ្រើសរើសគណបក្សដែលនាំនូវសុខសន្តិភាព និងការអភិវឌ្ឍពិតប្រាកដជូនប្រទេសជាតិ សូមបោះឆ្នោតជូនគណបក្សប្រជាជនកម្ពុជា ដែលមានលេខរៀងទី១៨។ បោះឆ្នោតជូនគណបក្សប្រជាជនកម្ពុជាដើម្បីគាំទ្រ សម្តេចអគ្គមហាសេនាបតីតេជោ ហ៊ុន សែន ជាបេក្ខភាពនាយករដ្ឋមន្រ្តី អាណត្តិទី៧ ដឹកនាំមាតុភូមិកម្ពុជាឱ្យកាន់តែរីកចម្រើន រុងរឿងទៅមុខបន្តទៀត និងគាំទ្រឯកឧត្ដមបណ្ឌិត ហ៊ុន ម៉ាណែត ជាបេក្ខជននាយករដ្ឋមន្ត្រីសម្រាប់អនាគត គួរជម្រាបថា គណៈកម្មាធិការជាតិរៀបចំការបោះឆ្នោត ហៅកាត់ថា គ.ជ.ប បានឲ្យដឹងថា ការឃោសនាបោះឆ្នោតត្រូវប្រព្រឹត្តទៅចាប់ពីថ្ងៃទី១ រហូតដល់ថ្ងៃទី២១ ខែកក្កដា ឆ្នាំ២០២៣ សរុបមានរយៈពេល២១ថ្ងៃ។ គួរបញ្ជាក់ផងដែរថា គណបក្សនយោបាយដែលត្រូវបានទទួលស្គាល់ជាផ្លូវការដោយ គណៈកម្មាធិការជាតិរៀបចំការបោះឆ្នោតចំនួន១៨ មានសិទ្ធិធ្វើការឃោសនារកសំឡេងឆ្នោត ដោយគោរពទៅតាមច្បាប់ បទបញ្ជា និងនីតិវិធីនៃការបោះឆ្នោត សេចក្តីណែនាំស្តីពីការឃោសនាបោះឆ្នោតក្នុងស្មារតីទទួលខុសត្រូវ និងត្រូវមានការយោគយល់ អធ្យាស្រ័យគ្នាទៅវិញទៅមក៕