ភ្នំពេញ៖រាជរដ្ឋាភិបាលកម្ពុជាសម្រេចបង្កើតគណៈកម្មការអន្តរក្រសួងជាផ្លូវការ ដើម្បីជំរុញដំណើរការអនុវត្ត​គម្រោងហេដ្ឋារចនាសម្ព័ន្ធផ្លូវល្បឿនលឿនតភ្ជាប់ពីរាជធានីភ្នំពេញ ទៅខេត្តសៀមរាប។នេះបើយោងតាមសេចក្តីសម្រេចរបស់រាជរដ្ឋាភិបាល ចុះហត្ថលេខាដោយសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាកាលពីថ្ងៃទី១១ ខែកក្កដា​ឆ្នាំ២០២១៣ ហើយត្រូវបានផ្សព្វផ្សាយនៅថ្ងៃទី ១៣ ខែកក្កដានេះ។ សេចក្តីសម្រេចបញ្ជាក់ថា ការបង្កើតគណៈកម្មការអន្តរក្រសួងនេះ គឺដើម្បីជំរុញការអនុវត្តគម្រោងហេដ្ឋារចនាសម្ព័ន្ធផ្លូវល្បឿនលឿន (Expressway) តភ្ជាប់ពីរាជធានីភ្នំពេញ ទៅខេត្តសៀមរាប ដែលស្នើសុំវិនិយោគដោយក្រុមហ៊ុន China Road and Bridge Corporation (CRBC) ក្រោមទម្រង់វិនិយោគ សាងសង់-ធ្វើអាជីវកម្ម-ផ្ទេរ (BOT: Build-Operate-Transfer)។ គណៈកម្មការអន្តរក្រសួងនេះ គឺមានសមាសភាពចំនួន២៦រូប ដោយមាន លោក ស៊ុន ចាន់ថុល ទេសរដ្ឋមន្រ្តី និងជា​រដ្ឋមន្រ្តីក្រសួង​សារធារណការ និងដឹកជញ្ជូន ជាប្រធាន និងមានអនុប្រធានចំនួន៣រូបទៀត គឺលោក សុខ ចិន្តាសោភា រដ្ឋមន្រ្តីប្រតិភូអម នាយករដ្ឋមន្រ្តី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា, លោក វង្សី វិស្សុត រដ្ឋមន្រ្តីប្រតិភូអម នាយករដ្ឋមន្រ្តី និងជារដ្ឋលេខាធិការប្រចាំការ​ក្រសួងសេដ្ឋកិច្ច និងហិរញ្ញវត្ថុ និងលោក សួង ហេង រដ្ឋមន្រ្តីប្រតិភូអម នាយករដ្ឋមន្រ្តី និងជារដ្ឋលេខាធិការក្រសួងសារធារណការ និងដឹកជញ្ជូន។ សេចក្តីសម្រេចបានបញ្ជាក់ថា គណៈកម្មការអន្តរក្រសួងនេះ គឺមានភារកិច្ចរួមមាន ពិនិត្យ ផ្តល់យោបល់អំពីនីតិក្របខណ្ឌគតិយុត្ត និង​រូបភាពនៃការវិនិយោគលើគម្រោងហេដ្ឋារចនាសម្ព័ន្ធផ្លូវ ល្បឿនលឿនតភ្ជាប់ពីរាជធានីភ្នំពេញ ទៅខេត្តសៀមរាប។ ជំរុញគម្រោង​ហេដ្ឋា​រចនាសម្ព័ន្ធផ្លូវល្បឿនលឿនខាងលើឱ្យបានសម្រេចជាស្ថាពរ ដើម្បីរួមចំណែកពន្លឿនការអភិវឌ្ឍច្រករបៀងរាជធានីភ្នំពេញ-ខេត្តសៀមរាប និងធ្វើរបាយការណ៍ស្តីពីលទ្ធផលការងារជូនប្រមុខរាជរដ្ឋាភិបាល តាមរយៈទីស្ដីការគណៈរដ្ឋមន្ត្រីជាដើម។ គណៈកម្មការនេះ អាចបង្កើតអនុគណៈកម្មការមួយចំនួនតាមការចាំបាច់ ចំពោះអនុប្រធាននិងសមាជិកនៃគណៈកម្មការនេះ ត្រូវចូលរួម​ប្រជុំតាមការអញ្ជើញរបស់ប្រធានហើយប្រធានគណៈកម្មការ មានសិទ្ធិអញ្ជើញតំណាងពីក្រសួង ស្ថាប័ននានាឱ្យចូលរួមដើម្បីពិនិត្យ និងផ្តល់យោបល់ តាមការចាំបាច់។ លើសពីនេះ គណៈកម្មការនេះ មានសិទ្ធិប្រើប្រាស់ត្រារបស់ក្រសួងសាធារណការ និងដឹកជញ្ជូន ហើយចំពោះបទប្បញ្ញត្តិទាំងឡាយណាដែលផ្ទុយនឹងសេចក្តីសម្រេចនេះ គឺត្រូវទុកជានិរាករណ៍»។ សេចក្តីសម្រេចដដែលបានបញ្ជាក់ថា រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី រដ្ឋមន្ត្រីក្រសួងមហាផ្ទៃ រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ រដ្ឋមន្ត្រីក្រសួងសាធារណការ និងដឹកជញ្ជូន រដ្ឋមន្ត្រីគ្រប់ក្រសួងនិងប្រធានគ្រប់ស្ថាប័នដែលពាក់ព័ន្ធ និងសាមីខ្លួនត្រូវទទួល បន្ទុកអនុវត្តសេចក្តីសម្រេចនេះ តាមភារកិច្ចរៀងៗខ្លួន ចាប់ពីថ្ងៃចុះហត្ថលេខាតទៅ៕ គួររំលឹកថាក្នុងពិធីចុះហត្ថលេខាលើកិច្ចព្រមព្រៀងក្របខ័ណ្ឌគម្រោងផ្លូវល្បឿនលឿនតភ្ជាប់ពីរាជធានីភ្នំពេញ-សៀមរាប-ប៉ោយប៉ែត​ជាមួយក្រុមហ៊ុនសាជីវកម្មស្ពាន និងថ្នល់ចិន កាលថ្ងៃទី៧ ខែមិថុនា ឆ្នាំ២០២៣ លោកទេសរដ្ឋមន្រ្តី ស៊ុន ចាន់ថុល បានឱ្យដឹងថា គម្រោងផ្លូវល្បឿនលឿនភ្នំពេញ-សៀមរាប -ប៉ោយប៉ែត បានបញ្ចប់ការសិក្សាបឋមកាលពីចុងខែឧសភាកន្លងទៅ។តាមការ​​ប៉ាន់​ស្មាន​គម្រោងនេះ នឹងចំណាយទឹកប្រាក់ប្រមាណបួនពាន់លានដុល្លារ។តាមការវាយតម្លៃបឋមគម្រោងផ្លូវល្បឿនលឿននេះ មានប្រវែង​សរុប​៤០០គីឡូម៉ែត្រ ដោយចេញពីភ្នំពេញទៅសៀមរាបមានប្រវែង២៥០គីឡូម៉ែត្រ និងពីសៀមរាបទៅប៉ោយប៉ែតមានប្រវែង១៥០គីឡូម៉ែត្រ។គម្រោងផ្លូវល្បឿនលឿនទី៣របស់កម្ពុជានេះ អាចនឹងបើកការដ្ឋានសាងសង់យ៉ាងយូរបំផុតត្រឹមចុងឆ្នាំ២០២៤ ប្រសិនជាពុំមានអ្វីរាំង​ស្ទះទេ៕