ចាប់តាំងពីការបើកដំណើរការវិទ្យាស្ថានតេជោសែនសាធារណការ និងដឹកជញ្ជូននៅក្នុងឆ្នាំ ២០២១ រហូតដល់បច្ចុប្បន្ននេះ វិទ្យាស្ថានបានបណ្ដុះបណ្ដាលនិស្សិតបាន​ ៣ ជំនាន់ ពាក់ព័ន្ធនឹងវិស័យសាធារណការ និងដឹកជញ្ជូន។ លោក ស៊ុន ចាន់ថុល រដ្ឋមន្រ្តីក្រសួង​សាធារណការ និងដឹកជញ្ជូន​​ថ្លែងនៅ​​​ក្នុងពិធី​សម្ពោធ​ “សាលសហសិក្សាតេជោ​សែន” កាលពីម្សិលមិញនេះថា រាជរដ្ឋាភិបាលបានចាត់ទុកការអភិវឌ្ឍធនធានមនុស្ស គឺជាវិស័យអាទិភាពមួយ​នៅក្នុងចំណោមវិស័យអាទិភាពចម្បងៗនិងសំខាន់ៗ ក្នុងនោះការអភិវឌ្ឍធនធានមនុស្ស ពាក់ព័ន្ធនឹងវិស័យសាធារណការ និងដឹកជញ្ជូន គឺជាតម្រូវការចាំបាច់ដែលត្រូវយកចិត្តទុកដាក់ខ្ពស់។ ការបង្កើនសមត្ថភាពធនធានមនុស្សនៅក្នុងវិស័យមួយនេះ គឺជាកិច្ចការអាទិភាពដ៏ចម្បងមួយរបស់ក្រសួង ដែលថ្នាក់ដឹកនាំគ្រប់រូប ចង់ឃើញកូនខ្មែរមានសមត្ថភាពអាចសាងសង់ ផ្លូវថ្នល់ ស្ពានធំៗ និងបណ្តាញហេដ្ឋារចនាសម្ព័ន្ធដឹកជញ្ជូនគ្រប់ប្រភេទបានដោយខ្លួនឯងនាពេលអនាគត។ លោក​រដ្ឋមន្រ្តី​បាន​បន្ត​ថា ចាប់តាំងពីការបើកដំណើរការវិទ្យាស្ថានតេជោសែន សាធារណការ និងដឹកជញ្ជូន រហូតដល់បច្ចុប្បន្ននេះ វិទ្យាស្ថានបានបណ្ដុះបណ្ដាលនិស្សិតទាំង ៣ ជំនាន់ ចំនួន ៤៣៧ នាក់ (ស្រី ១៧៧នាក់) បានផ្ដល់អាហារូបករណ៍​ ១០០% ដល់និស្សិតឆ្នើមចំនួន ១០១ នាក់ និងអាហារូបករណ៍​ ៥០% ដល់និស្សិតជានារីចំនួន ១៣៣​នាក់ និងបានបើកថ្នាក់បំប៉នភាសាអង់គ្លេសជូននិស្សិតដោយឥតគិតថ្លៃ។ បន្ថែមពីលើនេះ វិទ្យាស្ថានក៏បានពង្រីកភាពជាដៃគូជាមួយស្ថាប័នអប់រំ បណ្តុះបណ្តាល និងស្រាវជ្រាវ ទាំងថ្នាក់ជាតិ និងអន្តរជាតិ ព្រមទាំងដៃគូផ្សេងៗ តាមរយៈការចុះអនុស្សរណៈនៃការយោគយល់ ក្នុងគោលបំណងផ្តល់កិច្ចសហការ និងការផ្លាស់ប្តូរបទពិសោធន៍និងកម្មវិធីសិក្សាទៅវិញទៅមក។ វិទ្យាស្ថានតេជោសែន សាធារណការ និងដឹកជញ្ជូន បានដាក់ចេញកម្មវិធីបណ្តុះបណ្តាលចំនួន ៣ កម្រិត រួមមាន៖ (១) កម្រិតវិស្វករ និងបណ្ឌិត (២) កម្រិតអ្នកជំនាញមធ្យមបច្ចេកទេសជាន់ខ្ពស់ និងការបណ្ដុះបណ្តាលជំនាញខ្លីៗ និង (៣) ការបណ្តុះបណ្តាលជំនាញផ្នែកទន់។កាលពីថ្ងៃ ២៨ មិថុនា ២០២៣ ក្រសួង​សាធារណការ​និង​ដឹកជញ្ជូនបាន​បើក​សម្កោធ​ “សាលសហសិក្សាតេជោសែន” ទំនើបថ្មី បំពាក់ដោយបច្ចេកវិទ្យាទាន់សម័យ ដែលនឹង​ចូលរួមលើកស្ទួយការអប់រំ និងបណ្តុះបណ្តាលធនធានមនុស្ស ក្នុងវិស័យសាធារណការ និងដឹកជញ្ជូន។ សាលសហសិក្សាតេជោសែន គឺជាសមិទ្ធផលថ្មីមួយបន្ថែមទៀតរបស់ ក្រសួងសាធារណការ និងដឹកជញ្ជូន ដែលបង្កើតឡើង​ក្នុងគោលបំណងប្រើប្រាស់ សម្រាប់រៀបចំវគ្គបណ្តុះបណ្តាលបន្ថែមលើជំនាញបច្ចេកទេស និងជំនាញពាក់ព័ន្ធផ្សេងៗជូនដល់ថ្នាក់ដឹកនាំ និងបុគ្គលិកមន្ត្រីរាជការ ព្រមទាំងនិស្សិតនៃវិទ្យាស្ថានតេជោសែនសាធារណការ និងដឹកជញ្ជូន។ សាលនេះមានបណ្តោយ ៣១,៣ម៉ែត្រ និងទទឹង ១៨ម៉ែត្រ មានលទ្ធភាពអាចផ្ទុកអ្នកចូលរួមបានប្រមាណ ២៣០ នាក់។ នៅចំកណ្តាលស្លាបជញ្ជាំងផ្នែកខាងកើតនៃសាល បំពាក់ទៅដោយឧបករណ៍បច្ចេកវិទ្យាទំនើបៗមានការតម្លើងនូវ LED Screen ដែលមានបណ្ដោយ ៧ម៉ែត្រ និងទទឹង ៤ម៉ែត្រ (ស្មើនឹង ៣២៥អ៊ីញ)។ ការសាងសង់សាលសហសិក្សានេះ បានចំណាយថវិកាអស់ប្រមាណជាង ៦៥ ម៉ឺនដុល្លារអាមេរិក ដែលជាប្រភពមូលនិធិចូលរួមពីសប្បុរសជននានា។ នៅក្នុងឱកាសនៃពិធីសម្ពោធ “សាលសហសិក្សាតេជោសែន” សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្រ្តីក្រសួង​ការពារ​ជាតិ​បានបង្ហាញការសង្ឃឹមជឿជាក់ថា សាលសហសិក្សាដ៏ទំនើបមួយខ្នងនេះ នឹងចូលរួមចំណែកជួយដល់ការអភិវឌ្ឍធនធានមនុស្ស ការបណ្តុះបណ្តាលសមត្ថភាព និងការពង្រឹងគុណភាពនិស្សិត និងមន្ត្រីរាជការ របស់ក្រសួងសាធារណការ និងដឹកជញ្ជូន យ៉ាងពិតប្រាកដ៕