កម្មវិធីបើកវគ្គបណ្ដុះបណ្ដាល ស្ដីពីបច្ចេកទេសសាងសង់ ជួសជុល និងថែទាំស្ពាន ទីស្ដីការក្រសួង៖ ថ្ងៃអង្គារ ១០កើត ខែបឋមាសាឍ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី២៧ ខែមិថុនា ឆ្នាំ២០២៣ ឯកឧត្តម សូ វ៉ិចទ័រ រដ្ឋលេខាធិការក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកវគ្គបណ្ដុះបណ្ដាល ស្ដីពីបច្ចេកទេសសាងសង់ ជួសជុល និងថែទាំស្ពាន ក្រោមកម្មវិធីផ្ទេរបច្ចេកវិទ្យា(Technology Transfer Program) សហការរៀបចំដោយក្រសួងសាធារណការ និងដឹកជញ្ជូន ទីភ្នាក់ងារជំរុញការវិនិយោគកូរ៉េ (KOTRA) ក្រុមហ៊ុន Soosung Engineering & Consulting របស់សាធារណរដ្ឋកូរ៉េ ដោយមានការអញ្ជើញចូលរួមពីថ្នាក់ដឹកនាំក្រសួង ឯកឧត្តមអនុរដ្ឋលេខាធិការ ឯកឧត្តមអគ្គនាយក/អគ្គនាយករង និងមន្រ្តីជំនាញមកពីបណ្តាអង្គភាពពាក់ព័ន្ធចំណុះក្រសួងសាធារណការ និងដឹកជញ្ជូន។ វគ្គបណ្ដុះបណ្ដាលនេះរៀបចំឡើងក្នុងគោលបំណងដើម្បីចែករំលែកចំណេះដឹង និងជំនាញសំខាន់ៗពាក់ព័ន្ធនឹងការសាងសង់ ជួសជុល និងថែទាំស្ពាន ទាំងការប្រើប្រាស់បច្ចេកវិទ្យាថ្មីៗ ស្របតាមការវិវត្តក្នុងសម័យបដិវត្តន៍ឧស្សាហកម្ម ៤.០ ដើម្បីចូលរួមចំណែកក្នុងការអភិវឌ្ឍន៍ធនធានមនុស្ស ជាពិសេសដើម្បីពង្រីកចំណេះដឹង និងពង្រឹងសមត្ថភាព ដល់មន្ត្រីវិស្វករជំនាញរបស់ក្រសួងសាធារណការ និងដឹកជញ្ជូន។ ថ្លែងទៅកាន់អង្គពិធីនាឱកាសនោះ ឯកឧត្តមរដ្ឋលេខាធិការ បានគូសបញ្ជាក់ពីគោលនយោបាយ និងយុទ្ធសាស្រ្តនានារបស់រាជរដ្ឋាភិបាលក្នុងការជំរុញការអភិវឌ្ឍធនធានមនុស្ស ស្របតាមការរីកចម្រើនរបស់ប្រទេសជាតិ ដែលតម្រូវឱ្យមានការសាងសង់នូវហេដ្ឋារចនាសម័្ពន្ធ ប្រកបដោយគុណភាព និងចីរភាព ពិសេសការប្រើប្រាស់បចេ្ចកវិទ្យាថ្មីៗ។ បន្ថែមពីលើនេះ ឯកឧត្តមក៏បានលើកឡើងពីសមិទ្ធផល និងសកម្មភាពក្នុងការចូលរួមជំរុញការអភិវឌ្ឍសមត្ថភាព និងជំនាញរបស់មន្រ្តីក្រសួងផងដែរ។ ក្នុងនោះក្រសួងបានបង្កើតនូវវិទ្យាស្ថានតេជោសែន សាធារណការ និងដឹកជញ្ជូន ជាដើម។ ឯកឧត្តមបានបន្ថែមថា ការអភិវឌ្ឍធនធានមនុស្សគឺជាកត្តាចាំបាច់ក្នុងការជួយគាំទ្រដល់កំណើនសេដ្ឋកិច្ចរបស់ប្រទេស និងភាពប្រកួតប្រជែងធនធានមនុស្សប្រកបដោយគុណភាព សមត្ថភាព និងផលិតភាព ដើម្បីឆ្លើយតបទៅនឹងការអភិវឌ្ឍសេដ្ឋកិច្ចសង្គមក្នុងប្រទេស និងក្នុងតំបន់។ ជាចុងក្រោយ ឯកឧត្តមរដ្ឋលេខាធិការ បានជំរុញលើកទឹកចិត្តឱ្យសិក្ខាកាមទាំងអស់ ព្យាយាមត្រងត្រាប់ស្តាប់ការពន្យល់ ក្រេបយកចំណេះដឹង បទពិសោធន៍ជំនាញ និងពិភាក្សាឱ្យបានផុសផុល ក្នុងន័យដើម្បីអាចពង្រីក និងពង្រឹងសមត្ថភាពបន្ថែម ក្នុងការបំពេញការងាររបស់ខ្លួនជូនអង្គភាព និងប្រទេសជាតិ ប្រកបដោយគុណភាព ប្រសិទ្ធភាព និងការទទួលខុសត្រូវខ្ពស់៕