សិក្ខាសាលាស្ដីពីការកសាងផែនការសកម្មភាពរួមលើសេវាទឹកកខ្វក់ ក្នុងក្របខណ្ឌគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ សៀមរាប៖ ថ្ងៃសុក្រ ៦ កើត ខែបឋមាសាឍ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី២៣ ខែមិថុនា ឆ្នាំ២០២៣ លោក ចៅ សុភ:ភិបាល អគ្គនាយករង តំណាងឯកឧត្តម សួន ភារិទ្ធ អគ្គនាយក នៃអគ្គនាយកដ្ឋានប្រព័ន្ធចម្រោះទឹកកខ្វក់ ក្រសួងសាធារណការ និងដឹកជញ្ជូន និងជានាយកគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ បានអញ្ជើញជាអធិបតីក្នុងពិធីបើក-បិទសិក្ខាសាលាស្ដីពីការកសាងផែនការសកម្មភាពរួមលើសេវាទឹកកខ្វក់ ក្នុងក្របខណ្ឌគម្រោងលើកកម្ពស់ការផ្គត់ផ្គង់ទឹកស្អាត និងអនាម័យ។ សិក្ខាសាលានេះ បានប្រារព្ធឡើងក្នុងគោលបំណង​​ ១) ​ពិនិត្យលើលទ្ធផលនៃប័ណ្ណពិន្ទុសហគមន៍​ ប្រៀបធៀបជាមួយលទ្ធផលដាក់ពិន្ទុវាយតម្លៃដោយអង្គភាពលូទឹក និងស្ថានីយប្រព្រឹត្តកម្ម​ខេត្តសៀមរាប ២) ពិភាក្សា និងបកស្រាយការខ្វះចន្លោះដែលបានរកឃើញ រវាងតំណាងអង្គភាពលូទឹកកខ្វក់ និងតំណាងប្រជាពលរដ្ឋ ដើម្បីកំណត់រកសកម្មភាពចម្បង​យកទៅអនុវត្តសំដៅលើកកម្ពស់គុណភាពសេវាទឹកកខ្វក់ ៣) ព្រមព្រៀង​​ក្នុងការបង្កើតផែនការសកម្មភាពរួមស្តីពីសេវាទឹកកខ្វក់ ដែលហៅកាត់ថា JAP និង ៤) ចងក្រងគណៈកម្មាធិការគ្រប់គ្រងផែនការសកម្មភាពរួម ដែលហៅកាត់ថា JAP មានសមាសភាពចូលពីតំណាងអគ្គនាយកដ្ឋានប្រព័ន្ឋចម្រោះទឹកកខ្វក់ អភិបាលរងក្រុងសៀមរាប ប្រធាន -អនុប្រធានមន្ទីរសាធារណការ និងដឹកជញ្ជូន ប្រធានអង្គភាពលូទឹក និងស្ថានីយច្រោះសម្អាតទឹកសំណល់ខេត្តសៀមរាប ប្រធានការិយាល័យប្រជាពលរដ្ឋក្រុងសៀមរាប មន្ត្រីបង្គោលគណនេយ្យភាពសង្គមក្រុងសៀមរាប លោកចៅសង្កាត់ ចៅសង្កាត់រងទាំង៣ សង្កាត់ស្លក្រាម សង្កាត់សាលាកំរើក សង្កាត់ស្វាយដង្គំ តំណាងប្រជាពលរដ្ឋពីសង្កាត់នីមួយៗ អ្នកស្ម័គ្រចិត្តសម្របសម្រួលសហគមន៍ និងមន្ត្រីពាក់ព័ន្ឋសរុបចំនួន៥៣នាក់មនុស្សស្ត្រីមានចំនួន២២​នាក់។​ ជាលទ្ធផល អង្គសិក្ខាសាលា បានព្រមព្រៀងបង្កើតផែនការសកម្មភាពរួម (JAP) ដែលមានសកម្មភាពសរុបចំនួន​ ១៧ សកម្មភាព​ ផ្តោតជាចម្បងលើការពង្រឹកគុណភាពនៃការបំពេញការងាររបស់អង្គភាពលូទឹក និងស្ថានីយប្រព្រឹត្តកម្មទឹកកខ្វក់ ពង្រឹង និងពង្រីកវិសាលភាពនៃការកសាងប្រព័ន្ធលូទឹកកខ្វក់ លើកកម្ពស់ភាពងាយទទួលបានព័ត៌មានលើសេវាទឹកកខ្វក់ ការកសាងសមត្ថភាពដល់ក្រុមការងារអង្គភាពលូទឹក និងស្ថានីយប្រព្រឹត្តកម្មទឹកកខ្វក់ និង​កៀរគរការចូលរួមការគាំទ្រពីសំណាក់អាជ្ញាធរក្រុង អាជ្ញាធរសង្កាត់ដើម្បីបង្កើតឱ្យមានយន្តការនៃការត្រួតពិនិត្យតាមដានលើការអនុវត្តផែនការសកម្មភាពរួមដែលហៅកាត់ថាJAPនេះ​។ បន្ថែមពីលើនេះ អង្គសិក្ខាសាលាក៏បានព្រមព្រៀងផងដែរក្នុងការចងក្រងគណៈកម្មាធិការគ្រប់គ្រងផែនការសកម្មភាពរួមនេះដែលមានសមាជិកភាពចំនួន២១​រូប ជាថ្នាក់ដឹកនាំក្រុង ថ្នាក់ដឹកនាំមន្ទីរសាធារណការ និងដឹកជញ្ជូនខេត្តសៀមរាប អង្គភាពលូទឹកនិងស្ថានីយប្រព្រឹត្តកម្មខេត្តសៀមរាបចៅសង្កាត់ស្លក្រាម ចៅសង្កាត់ស្វាយដង្គំ ចៅសង្កាត់សាលាកំរើក តំណាងអ្នកសម្របសម្រួលសហគមន៍ និងតំណាងប្រជាពលរដ្ឋ។ សូមជម្រាបជូនថា៖ “ការផ្សារភ្ជាប់ប្រជាពលរដ្ឋ ក្នុងក្របខ័ណ្ឌ​គម្រោងលើកកម្ពស់ការផ្គត់ផ្គង់ទឹកស្អាត និងអនាម័យ គឺជាយន្តការកៀរគរការចូលរួម​របស់ប្រជាពលរដ្ឋក្នុងការត្រួតពិនិត្យតាមដានការបំពេញការងាររបស់អង្គភាពលូទឹក និងស្ថានីយប្រព្រឹត្តកម្មទឹកកខ្វក់ ខេត្តសៀមរាប”៕