កិច្ចប្រជុំក្រុមប្រឹក្សាភិបាលលើកទី៧ អាណត្តិទី៥ របស់មន្ទីរពិសោធន៍សំណង់ និងសាធារណការ ដើម្បីពិនិត្យ និងអនុម័តលើរបាយការណ៍អនុវត្តការងារអាជីវកម្ម សេវាកម្ម និងការងារវិនិយោគរយៈពេល ១២ខែ ឆ្នាំ២០២២ និងត្រីមាសទី១ ឆ្នាំ២០២៣ ទីស្ដីការក្រសួង៖ ព្រឹកថ្ងៃអង្គារ ១០រោច ខែជេស្ឋ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី១៣ ខែមិថុនា ឆ្នាំ២០២៣ លោកជំទាវ ឥម នីថារ៉ា រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានក្រុមប្រឹក្សាភិបាលមន្ទីរពិសោធន៍សំណង់ និងសាធារណការ បានអញ្ជើញដឹកនាំកិច្ចប្រជុំក្រុមប្រឹក្សាភិបាលលើកទី៧ អាណត្តិទី៥ របស់មន្ទីរពិសោធន៍សំណង់ និងសាធារណការ ដោយមានការចូលរួមពីសមាជិកសមាជិកាក្រុមប្រឹក្សាភិបាលទាំងអស់។ កិច្ចប្រជុំនេះត្រូវបានរៀបចំឡើងក្នុងគោលបំណងពិនិត្យ និងអនុម័តលើរបៀបវារៈមួយចំនួនរួមមាន៖ របាយការណ៍អនុវត្តការងារអាជីវកម្ម-សេវាកម្ម និងការងារវិនិយោគរយៈពេល១២ខែ ឆ្នាំ២០២២ និង អនុម័តលើរបាយការណ៍អនុវត្តការងារអាជីកម្ម-សេវាកម្ម និងការងារវិនិយោគត្រីមាសទី១ ឆ្នាំ២០២៣។ ថ្លែងក្នុងឱកាសនោះ លោកជំទាវរដ្ឋលេខាធិការ និងជាប្រធានក្រុមប្រឹក្សាភិបាល បានជំរុញលើកទឹកចិត្ត ដល់សមាជិក សមាជិកានៃអង្គប្រជុំក្រុមប្រឹក្សាភិបាលទាំងអស់ផ្តល់មតិយោបល់ក៏ដូចជាធាតុចូល ដើម្បីបំពេញបន្ថែម ចំណុចខ្វះខាត និងតម្រូវការចាំបាច់នានាសំដៅធ្វើយ៉ាងណាឱ្យរបាយការណ៍នេះមានលក្ខណៈគ្រប់ជ្រុងជ្រោយ និងជាចុងបញ្ចប់លោកជំទាវ បានថ្លែងអំណរគុណនិងកោតសរសើរដល់ សមាជិកសមាជិកាអង្គប្រជុំទាំងអស់ ដែលបានចូលរួមជាមតិយោបល់យ៉ាងផុលផុសគ្រប់របៀបវារៈ ដើម្បីជំរុញឱ្យការងារអនុវត្តអាជីវកម្ម-សេវាកម្មរបស់មន្ទីរពិសោធន៍សំណង់ និងសាធារណការទទួលបានលទ្ធផលកាន់តែល្អប្រសើរ៕