កិច្ចប្រជុំផ្ទៃក្នុងបន្តពិភាក្សាលើសេចក្តីព្រាងច្បាប់ស្តីពីប្រព័ន្ធទឹកកខ្វក់ ដើម្បីប្រមូលធាតុចូលបន្ថែម សំដៅធ្វើយ៉ាងណាឱ្យការរៀបចំសេចក្តីព្រាងច្បាប់នេះមានលក្ខណៈគ្រប់ជ្រុងជ្រោយ ទីស្ដីការក្រសួង៖ នាព្រឹកថ្ងៃអង្គារ ១០រោច ខែជេស្ឋ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី១៣ ខែមិថុនា ឆ្នាំ២០២៣ ឯកឧត្តម ប៉ាល់ ចន្ទតារា រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានក្រុមការងារបានអញ្ជើញដឹកនាំកិច្ចប្រជុំផ្ទៃក្នុងបន្តពិភាក្សាលើសេចក្តីព្រាងច្បាប់ស្តីពីប្រព័ន្ធ ទឹកកខ្វក់ (Sewerage Law) ជាមួយនឹងថ្នាក់ដឹកនាំក្រសួងទទួលបន្ទុក និងក្រុមមន្ត្រីជំនាញ ដើម្បី ប្រមូលមតិយោបល់ ក៏ដូចជាធាតុចូលបន្ថែម ដើម្បីឱ្យការរៀបចំសេចក្តីព្រាងច្បាប់នេះមានលក្ខណៈគ្រប់ជ្រុងជ្រោយ អាចទទួលបានពីគ្រប់ភាគីពាក់ព័ន្ធ និងបម្រើឧត្ដមប្រយោជន៍ជាតិ។ កិច្ចប្រជុំនេះ ត្រូវបានរៀបចំឡើងក្នុងគោលបំណងកែសម្រួលអត្ថន័យខ្លឹមសារ និងអក្ខរាវិរុទ្ធនៃមាត្រាមួយចំនួននៃសេចក្ដីព្រាងច្បាប់នេះ សំដៅកំណត់បាននូវក្របខ័ណ្ឌគតិយុត្ត និងដែនសមត្ថកិច្ចច្បាស់លាស់ ដើម្បីអភិវឌ្ឍសាងសង់ ថែទាំ ជួសជុលប្រព័ន្ធទឹកកខ្វក់នៅក្នុងប្រទេសកម្ពុជា ធ្វើឱ្យប្រសើរឡើងនូវសុខុមាលភាពសាធារណៈ ព្រមទាំងរួមចំណែកដល់កិច្ចការពារបរិស្ថានប្រកបដោយចីរភាព។ សូមជម្រាបជូនថា៖ សេចក្ដីព្រាងច្បាប់នេះមានចំនួន១៧ជំពូក និង១២៤មាត្រា ផ្ដោតការយកចិត្តទុកដាក់ជាចម្បងលើសកម្មភាពការងារពាក់ព័ន្ធប្រព័ន្ធទឹកកខ្វក់ ធានាប្រយោជន៍រួម និងលើកកម្ពស់សុខុភាពសាធារណៈ។ នៅពេលច្បាប់នេះចូលជាធរមាន រំពឹងថានឹងអាចចូលរួមដោះស្រាយបញ្ហាទាក់ទងនឹងស្តង់ដារគុណភាពបញ្ចេញទឹកកខ្វក់ពីស្ថានីយប្រព្រឹត្តកម្ម និងពង្រឹងការផ្តល់សេវា ការគ្រប់គ្រងសំណល់ទឹកកខ្វក់ជាដើម៕