វិទ្យាស្ថានបារាំង AgroParisTech គ្រោងរៀបចំវគ្គបណ្ដុះបណ្ដាលលើវិស័យអនាម័យ និងទឹកកខ្វក់ ជូនដល់មន្ត្រី នៃក្រសួងសាធារណការ និងដឹកជញ្ជូន ដើម្បីបង្កើនកិច្ចសហការ និងធនធានមនុស្សក្នុងវិស័យនេះ ទីស្ដីការក្រសួង៖ ថ្ងៃចន្ទ ៩រោច ខែជេស្ឋ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី១២ ខែមិថុនា ឆ្នាំ២០២៣ ឯកឧត្តម សំរ៉ង់ឌី ណាម៉ូ អនុរដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញជួបជាមួយលោក Jean Antoine FABY នាយកវិទ្យាស្ថានបារាំង AgroParisTech ដើម្បីពិភាក្សាការងារអំពីគម្រោងរៀបចំវគ្គបណ្ដុះបណ្ដាលលើវិស័យអនាម័យ និងការងារទឹកកខ្វក់ ដោយមានការអញ្ជើញចូលរួមពីថ្នាក់ដឹកនាំអគ្គនាយកដ្ឋានប្រព័ន្ធចម្រោះទឹកកខ្វក់ វិទ្យាស្ថានតេជោសែន សាធារណការ និងដឹកជញ្ជូន និងមន្ត្រីជំនាញពាក់ព័ន្ធមួយចំនួនផងដែរ។ កិច្ចប្រជុំនេះធ្វើឡើងក្នុងគោលបំណងដើម្បីពិភាក្សាចែករំលែកអំពីទិសដៅការងារ គោលបំណង និងការត្រៀមខ្លួនរបស់ភាគីទាំងពីរក្នុងការរៀបចំវគ្គបណ្ដុះបណ្ដាលស្ដីពីការគ្រប់គ្រងអនាម័យ និងការងារទឹកកខ្វក់ ដើម្បីតម្រង់ទិសឱ្យវគ្គបណ្ដុះបណ្ដាលនេះអាចសម្រេចបានលទ្ធផលល្អប្រសើរ តាមគោលដៅដែលបានគ្រោងទុក។ វគ្គបណ្ដុះបណ្ដាលលើវិស័យអនាម័យ និងការងារទឹកកខ្វក់នេះគ្រោងរៀបចំឡើងរយៈពេល៣ថ្ងៃកន្លះ ចាប់ពីថ្ងៃទី១៣ ដល់ព្រឹកថ្ងៃទី១៦ ខែមិថុនា ឆ្នាំ២០២៣ នៅវិទ្យាស្ថានតេជោសែន សាធារណការ និងដឹកជញ្ជូន។ វគ្គបណ្ដុះបណ្ដាលនេះនឹងផ្ដល់ជូនដល់មន្ត្រីថ្នាក់ជាតិ និងថ្នាក់ក្រោមជាតិ នៃក្រសួងសាធារណការ និងដឹកជញ្ជូន នូវជំនាញការងារបច្ចេកទេស ការងារគ្រប់គ្រងអភិបាលកិច្ច និងការងារសេដ្ឋកិច្ចពាក់ព័ន្ធវិស័យប្រព័ន្ធទឹកកខ្វក់ដោយផ្អែកលើប្រធានបទចំនួន៤ រួមមាន៖ (១) ការគ្រប់គ្រងអនាម័យបែបសមូហភាព និងមិនមែនសមូហភាព (Collective and non-collective Sanitation governance) (២) ជំនាញ និងអ្នកជំនាញក្នុងការគ្រប់គ្រងអនាម័យ (Skills and expertise in sanitation) (៣) ការគ្រប់គ្រងអនាម័យ៖ សេវាកម្មអេកូឡូស៊ីផ្ដោតលើសេដ្ឋកិច្ច និងហិរញ្ញវត្ថុ (Sanitation: an ecological service Economy and finance) (៤) ស្ថិរភាពហិរញ្ញវត្ថុនៃសេវាគ្រប់គ្រងអនាម័យ និងគំរូតម្លៃសម្រាប់ការគ្រប់គ្រងអនាម័យបែបសមូហភាព និងមិនមែនសមូហភាព (Financial stability of a sanitation service and Pricing models for collective and non-collective sanitation)៕