[VAYO FM] - ផ្លូវល្បឿនលឿនភ្នំពេញ-សៀមរាបនិងប៉ោយប៉ែត នឹងត្រូវចុះហត្ថលេខាអំពីការសិក្សានៅថ្ងៃនេះ
2023-06-07
ទៅកាន់ទំព័រចុះផ្សាយក្នុង VAYO FM
លោកនាយករដ្ឋមន្ត្រី ហ៊ុន សែន ថ្លែងបញ្ជាក់ថា គម្រោងសាងសង់ផ្លូវល្បឿនលឿនពីរាជធានីភ្នំពេញទៅខេត្តសៀមរាប និងពីរាជធានីភ្នំពេញទៅក្រុងប៉ោយប៉ែត ខេត្តបន្ទាយមានជ័យ នឹងត្រូវចុះហត្ថលេខាអំពីការសិក្សានៅល្ងាចថ្ងៃទី០៧ ខែមិថុនា ឆ្នាំ២០២៣នេះ។ ការបញ្ជាក់របស់ប្រមុខរាជរដ្ឋាភិបាលនេះ ធ្វើឡើងនៅក្នុងពិធីបើកការដ្ឋានសាងសង់ ផ្លូវល្បឿនលឿនភ្នំពេញ-បាវិត និង បើកការដ្ឋានសាងសង់ស្ពានឆ្លងកាត់ទន្លេមេគង្គ និងផ្លូវតភ្ជាប់ក្បាលស្ពាន នៅថ្ងៃទី០៧មិថុនា។ សូមស្ដាប់ប្រសាសន៍លោកនាយករដ្ឋមន្ត្រី...
គួរជម្រាបថា បច្ចុប្បន្នកម្ពុជាមានផ្លូវល្បឿនលឿនមួយខ្សែដែលតភ្ជាប់ពីរាជធានីភ្នំពេញទៅកាន់ខេត្តព្រះសីហនុ ដោយផ្លូវនេះកំពុងដើរតួនាទីយ៉ាងសំខាន់វិស័យដឹកជញ្ជូន និងសម្រួលដល់ការធ្វើដំណើររបស់ប្រជាពលរដ្ឋឱ្យកាន់តែចំណេញពេលវេលា និងកាត់បន្ថយការចំណាយ។ បន្ទាប់ពីផ្លូវល្បឿនលឿនភ្នំពេញ-ព្រះសីហនុដែលជាផ្លូវល្បឿនលឿនដំបូងគេ រាជរដ្ឋាភិបាលក៏បានបើកការដ្ឋានសាងសង់ផ្លូវល្បឿនលឿនខ្សែទីពីរពីរាជធានីភ្នំពេញទៅកាន់ក្រុងបាវិត ខេត្តស្វាយរៀង ដើម្បីសម្រួលដល់ការធ្វើដំណើររបស់ប្រជាពលរដ្ឋ និងការដឹកជញ្ជូនបន្ថែមទៀត ខណៈផ្លូវល្បឿនលឿនខ្សែទីបីពីរាជធានីភ្នំពេញទៅខេត្តសៀមរាប និងក្រុងប៉ោយប៉ែតក៏ត្រូវចុះហត្ថលេខាអំពីការសិក្សាផងដែរ៕
