សិក្ខាសាលាថ្នាក់ជាតិ ស្ដីពីការទទួលបានសេវាគ្រប់គ្រងអនាម័យប្រកបដោយសុវត្ថិភាព និងនិរន្តរភាព ជាសកល (National Workshop on Universal Access to Sustainable and Safety Managed Sanitation) ភ្នំពេញ៖ ថ្ងៃពុធ ៥កើត ខែជេស្ឋ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី២៤ ខែឧសភា ឆ្នាំ២០២៣  ឯកឧត្តម សួន ភារិទ្ធ អគ្គនាយក នៃអគ្គនាយកដ្ឋានប្រព័ន្ធចម្រោះទឹកកខ្វក់ ក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកសិក្ខាសាលាថ្នាក់ជាតិស្ដីពីការទទួលបានសេវាគ្រប់គ្រងអនាម័យប្រកបដោយសុវត្ថិភាព និងនិរន្តរភាព ជាសកល (National Workshop on Universal Access to Sustainable and Safety Managed Sanitation) ដោយមានការចូលរួមពីមន្ត្រីមកពីក្រសួង ស្ថាប័នពាក់ព័ន្ធ អង្គការនានា ផ្នែកឯកជន ស្ថាប័នអប់រំ និងមន្ទីរសាធារណការ និងដឹកជញ្ជូន មន្ទីរអភិវឌ្ឍន៍ជនបទ មន្ទីរបរិស្ថាន ក្រោមការសហការៀបចំពីអង្គការ អង្គការUNICEF និង WaterAid។ សិក្ខាសាលានេះ ធ្វើឡើងជាលើកទី១ ចាប់ថ្ងៃទី ២៤-២៦ ខែឧសភា ឆ្នាំ២០២៣ ក្រោមការផ្ដួចផ្ដើមរវាងអង្គការUNICEF និងWaterAid  ដើម្បីគោលបំណងអនុវត្តសកម្មភាពដែលបានកំណត់ ក្នុងការសម្រេចបាននូវការគ្រប់គ្រងអនាម័យប្រកបដោយសុវត្ថិភាព និងនិរន្តរភាព នៅក្នុងប្រទេសកម្ពុជា។ ថ្លែងក្នុងសុន្ទរកថាប័ើក ឯកឧត្ដមអគ្គនាយក បានមានប្រសាសន៍ថា ក្រោយពីមានកំណែទម្រង់រចនាសម្ព័ន្ធគ្រប់គ្រងចុងឆ្នាំ២០១៦ ឆ្លើយតបទៅនឹងគោលនយោបាយកំណែទម្រង់របស់រាជរដ្ឋាភិបាល និងក្នុងគោលបំណងសម្រេចឱ្យបានផែនការយុទ្ឋសាស្រ្ត គោលដៅអភិវឌ្ឍន៍នានាពាក់ព័ន្ធនឹងប្រព័ន្ធទឹកកខ្វក់ អគ្គនាយកដ្ឋានប្រព័ន្ធចម្រោះទឹកកខ្វក់ បំពេញមុខងារជាសេនាធិការឱ្យក្រសួងសាធារណការ និងដឹកជញ្ជូន មានបេសកកម្ម និងភារកិច្ច រៀបចំបទដ្ឋាន និងគោលការណ៍ណែនាំបច្ចេកទេស ពាក់ព័ន្ធនឹងប្រព័ន្ធទឹកកខ្វក់ បានខិតខំប្រឹងប្រែងអនុវត្តភារកិច្ច សហការជាមួយក្រសួង-ស្ថាប័ន វិស័យឯកជន អង្គការសង្គមស៊ីវិល ដៃគូអភិវឌ្ឍន៍នានាយ៉ាងសកម្ម ដែលកន្លងមកក្រសួងសាធារណការ និងដឹកជញ្ជូន ក្រោមកិច្ចសហការពីដៃគូអភិវឌ្ឍន៍ពាក់ព័ន្ធ បានចងក្រងបង្កើតនូវឯកសារបទដ្ឋានគតិយុត្តជាបន្តបន្ទាប់។ ដោយការអភិវឌ្ឍនៅក្នុងប្រទេសកម្ពុជា កំពុងមានវឌ្ឍនភាពល្អ គួរឱ្យកត់សម្គាល់ នាំឱ្យវិស័យទឹក និងអនាម័យដើរតួនាទីយ៉ាងសំខាន់ក្នុងការលើកកម្ពស់សុខភាពសាធារណៈ និងសុខុមាលភាពរបស់ប្រជាពលរដ្ឋ។ លទ្ធភាពកាន់តែប្រសើរក្នុងការទទួលបានទឹកស្អាត និងសេវាមូលដ្ឋានផ្សេងៗ និងការទទួលបានអនាម័យជាមូលដ្ឋានរបស់ប្រជាជននៅតាមទីប្រជុំជន និងជនបទ កំពុងតែមានវឌ្ឍនភាពល្អ។ ឯកឧត្ដមអគ្គនាយកបានថ្លែងអំណរគុណយ៉ាងជ្រាលជ្រៅចំពោះក្រសួង-ស្ថាប័ន អង្គការនានា និងដៃគូអភិវឌ្ឍន៍ទាំងអស់ដែលបានសហការ និងផ្ដល់ការគាំទ្រ ព្រមទាំងបានជំរុញឱ្យសិក្ខាកាមចូលរួមពិភាក្សាឱ្យបានផុលផុស បញ្ចេញមតិយោបល់ ទស្សនៈ និងចែករំលែកបទពិសោធន៍ដែលខ្លួនមាន ដើម្បីលើកកម្ពស់វិស័យនេះឱ្យកាន់តែមានការរីកចម្រើន សម្រេចបានគោលដៅ និងគោលបំណងរបស់យើង៕