ទន្ទឹមនឹងការអភិវឌ្ឍលើហេដ្ឋារចនាសម្ព័ន្ធផ្លូវថ្នល់-ស្ពាន ក្រសួងកំពុងខិតខំប្រឹងប្រែងពង្រីកការអភិវឌ្ឍលើការគ្រប់គ្រងនៃវិស័យប្រព័ន្ធចម្រោះទឹកកខ្វក់ ដើម្បីឱ្យសមស្របដំណាក់កាលប្រទេសជាតិដែលកំពុងរីកចម្រើន” នេះជាការលើកឡើងក្នុងពិធីបើកវគ្គបណ្តុះបណ្តាលស្តីពី “បទដ្ឋានបច្ចេកទេសទូទៅសម្រាប់ការងារប្រព័ន្ធទឹកកខ្វក់ និងគោលការណ៍ណែនាំជាតិអាងចម្រោះភក់បង្គន់ប្រភេទ Planted Drying Bed, PDB" ភ្នំពេញ៖ ថ្ងៃអង្គារ-ពុធ ៤-៥កើត ខែជេស្ឋ ឆ្នាំថោះ បញ្ចស័ក ព.ស ២៥៦៧ ត្រូវនឹង ថ្ងៃទី២៣-២៤ ខែឧសភា ឆ្នាំ២០២៣ ឯកឧត្តមរដ្ឋលេខាធិការ រស់ វណ្ណា តំណាងដ៏ខ្ពង់ខ្ពស់ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាសហអធិបតីក្នុងពិធីបើកវគ្គបណ្តុះបណ្តាលស្តីពី “បទដ្ឋានបច្ចេកទេសទូទៅសម្រាប់ការងារប្រព័ន្ធទឹកកខ្វក់ និងគោលការណ៍ណែនាំជាតិអាងចម្រោះភក់បង្គន់ប្រភេទ Planted Drying Bed, PDB "។ វគ្គបណ្តុះបណ្តាលដែលមានរយៈពេលពីរថ្ងៃនេះ ត្រូវបានរៀបចំឡើងក្រោមកិច្ចសហប្រតិបត្តិការរវាងអគ្គនាយកដ្ឋានប្រព័ន្ឋចមោះទឹកកខ្វក់នៃក្រសួងសាធារណការ និងដឹកជញ្ជូន រួមជាមួយ ធនាគារអភិវឌ្ឍន៍អាស៊ី (ADB) ដឹកនាំដោយលោក MICHEAL WHITE អ្នកជំនាញឯកទេសផ្នែកអភិវឌ្ឍទីក្រុងនៃធនាគារអភិវឌ្ឍន៍អាស៊ីប្រចាំនៅទីក្រុងម៉ានីឡា ប្រទេសហ្វីលីពីន ចូលរួមតាមប្រព័ន្ធវីដេអូពីចម្ងាយ និងសម្របសម្រួលផ្ទាល់ពីលោក តាំង សុផាន់ណារ៉ា អនុប្រធានក្រុមសិក្សា(KCC)នៃធនាគារអភិវឌ្ឍន៍អាស៊ីប្រចាំនៅកម្ពុជា និងមានការចូលរួមពីគ្រប់អង្គភាពពាក់ព័ន្ធក្រោមឱវាទក្រសួង និងមន្ទីរទាំង២៥ រាជធានី-ខេត្ត ដែលមានអ្នកចូលរួមសរុបប្រមាណ ៧០នាក់។ គោលបំណងនៃវគ្គបណ្តុះបណ្តាលនេះផ្តោតសំខាន់លើការចែករំលែកបទពិសោធន៍ បច្ចេកវិទ្យាថ្មីៗ នៅក្រៅប្រទេស ពាក់ព័ន្ធប្រព័ន្ធចម្រោះទឹកកខ្វក់ និងការគ្រប់គ្រងប្រព័ន្ធលូ និងផ្សព្វផ្សាយសមិទ្ឋិផលថ្មីថែមទៀតលើបទដ្ឋានគតិយុត្ត និងពង្រឹងបន្ថែមសមត្ថភាពដល់មន្ត្រីពាក់ព័ន្ឋថ្នាក់ជាតិ ថ្នាក់ក្រោមជាតិទាំង ២៥ រាជធានី-ខេត្ត លើការងារដែលត្រូវអនុវត្ត។ ថ្លែងក្នុងពិធីបើកវគ្គបណ្តុះបណ្តាលនេះ ឯកឧត្តមរដ្ឋលេខាធិការ បានលើកឡើងអំពីការអភិវឌ្ឍប្រព័ន្ធចម្រោះទឹកកខ្វក់ ប្រព័ន្ធលូ ទីលានចាក់សំរាម និងការងារពាក់ព័ន្ធការរៀបចំផែនការមេ លិខិតបទដ្ឋានច្បាប់ និងបច្ចេកទេសនានា ដែលក្រសួងបាន និងកំពុងអនុវត្ត។ ឯកឧត្តមរដ្ឋលេខាធិការ ក៏បានគូសបញ្ជាក់ពីការខិតខំប្រឹងប្រែងអភិវឌ្ឍហេដ្ឋារចនាសម្ព័ន្ធផ្លូវថ្នល់ ស្ពាន និងការពង្រីកការអភិវឌ្ឍលើការគ្រប់គ្រងវិស័យប្រព័ន្ធចម្រោះទឹកកខ្វក់ ដើម្បីឱ្យសមស្របដំណាក់កាលប្រទេសជាតិដែលកំពុងរីកចម្រើន។ ឯកឧត្តមបានបន្ថែមថា មានតែការចូលរួមពីគ្រប់មជ្ឈដ្ឋាន ទើបអាចជួយឱ្យការគ្រប់គ្រងវិស័យទឹកកខ្វក់ មានភាពល្អប្រសើរ ក៏ដូចជាជួយដល់ការអភិវឌ្ឍប្រទេសកាន់តែមានភាពរីកចម្រើនខ្លាំងក្លាបន្ថែមទៀត។ ឯកឧត្តមរដ្ឋលេខាធិការ បានថ្លែងអំណរគុណយ៉ាងជ្រាលជ្រៅចំពោះ ធនាគារអភិវឌ្ឍន៍អាស៊ី(ADB) ដែលតែងតែចូលរួមជួយដល់កម្ពុជា ពិសេសលើវិស័យប្រព័ន្ធចម្រោះទឹកកខ្វក់ ក្រោមការគ្របគ្រង់របស់ក្រសួងសាធារណការ និងដឹកជញ្ជូន។ ជាមួយនោះ ឯកឧត្តម ក៏បានសំណូមពរឱ្យសិក្ខាកាមទាំងអស់ចូលរួមជាយោបល់ឱ្យបានផុលផុស និងយកចំណេះដឹងដែលទទួលបានពីវគ្គបណ្តុះបណ្តាលនេះទៅចែករំលែកបន្តដល់ក្រុមការងារនៅតាមអង្គភាពរបស់ខ្លួន ដើម្បីពង្រឹងដល់ការអភិវឌ្ឍលើវិស័យប្រព័ន្ធចម្រោះទឹកកខ្វក់ ឱ្យកាន់តែមានភាពល្អប្រសើរឡើង ។ សូមជម្រាបផងដែរថា បន្ទាប់ពីបញ្ចប់វគ្គបណ្តុះបណ្តាលរួចមក សិក្ខាកាមក៏បន្តចុះធ្វើទស្សនកិច្ចផ្ទាល់នៅទីតាំងអាងប្រព័ន្ធចម្រោះភក់បង្គន់ (ស្ថានីយទី១) ក្នុងតំបន់កំបូល នៅក្បែរតំបន់សេដ្ឋកិច្ចពិសេសភ្នំពេញ ដើម្បីឈ្វេងយល់ស្ថានភាពជាក់ស្តែងផងដែរ៕