សិក្ខាសាលាផ្សព្វផ្សាយអនុសញ្ញាស្ដីពីការលុបបំបាត់រាល់ទម្រង់ នៃការរើសអើងប្រឆាំងនឹងនារីភេទ(CEDAW) និងច្បាប់ពាក់ព័ន្ធ ដើម្បីលើកកម្ពស់សមភាពយេនឌ័រឱ្យកាន់តែសកម្មឡើង ទីស្តីការក្រសួង ៖ ថ្ងៃអង្គារ ៤កើត ខែជេស្ឋ ឆ្នាំថោះ បញ្ចស័ក ព.ស ២៥៦៧ ត្រូវនឹង ថ្ងៃទី២៣ ខែឧសភា ឆ្នាំ២០២៣ លោកជំទាវ មឹន មាណវី រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីបើកសិក្ខាសាលាផ្សព្វផ្សាយស្ដីពី៖ "អនុសញ្ញា ស៊ី-ដ (CEDAW) និងអនុសាសន៍១២ចំណុច របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ព្រមទាំងច្បាប់ពាក់ព័ន្ធមួយចំនួន " ដោយមានការចូលរួមពីមន្ត្រីជាន់ខ្ពស់ក្រសួង លោកជំទាវ ប៊ុន ឈិតវាសនា អគ្គលេខាធិការ នៃអគ្គលេខាធិការដ្ឋានអចិន្ត្រៃយ៍ក្រុមប្រឹក្សាជាតិកម្ពុជាដើម្បីស្ត្រី (ក.ជ.ក.ស) អង្គភាពពាក់ព័ន្ធក្រោមឱវាទក្រសួង និងមន្ត្រីនៃមន្ទីរសាធារណការ និងដឹកជញ្ជូនខេត្តស្វាយរៀង ព្រៃវែង កណ្តាល តាកែវ និងកំពង់ស្ពឺ សរុបប្រមាណ៦០នាក់។ សិក្ខាសាលានេះរៀបចំឡើងក្នុងគោលបំណង ដើម្បីផ្សព្វផ្សាយឱ្យបានទូលំទូលាយអំពី៖ "អនុសញ្ញា ស៊ី-ដ និង អនុសាសន៍១២ចំណុច របស់សម្ដេចតេជោនាយករដ្ឋមន្ត្រី ក៏ដូចជាបង្កើនការយល់ដឹង ការគាំទ្រ និងការចូលរួមចំណែកយ៉ាងសកម្មពីគ្រប់អង្គភាពក្រោមឱវាទក្រសួងក្នុងយុទ្ធនាការលុបបំបាត់រាល់ទម្រង់ នៃការរើសអើងប្រឆាំងនឹងនារីភេទ ព្រមទាំងពង្រឹងការតាមដានការអនុវត្តអនុសញ្ញា និងច្បាប់ពាក់ព័ន្ធឱ្យកាន់តែមានប្រសិទ្ធភាពថែមទៀត។ ថ្លែងក្នុងសុន្ទរកថាបើក លោកជំទាវរដ្ឋលេខាធិការ បានមានប្រសាសន៍ថា៖ រាជរដ្ឋាភិបាល បាន និងកំពុងយកចិត្តទុកដាក់យ៉ាងខ្លាំងលើការលើកកម្ពស់សិទ្ធិរបស់នារី តាមរយៈការជំរុញការចូលរួមរបស់ស្ត្រីក្នុងជីវភាពនយោបាយ សង្គមកិច្ច សេដ្ឋកិច្ច វប្បធម៌ និងបង្កើនសមាសភាពស្ត្រីក្នុងជួរថ្នាក់ដឹកនាំតាំងពីថ្នាក់មូលដ្ឋានដល់ថ្នាក់ជាតិ តួយ៉ាងនៅក្រសួងសាធារណការ និង ដឹកជញ្ជូន មានស្ត្រីដែលមានឋានៈជារដ្ឋលេខាធិការចំនួន៤រូប។ លោកជំទាវរដ្ឋលេខាធិការ បានបន្តថា៖ រាជរដ្ឋាភិបាលដឹកនាំដោយសម្ដេចតេជោនាយករដ្ឋមន្ត្រី មានចក្ខុវិស័យវែងឆ្ងាយក្នុងការជំរុញឱ្យមានថ្នាក់ដឹកនាំជាស្ត្រីនៅតាមស្រុក/ខណ្ឌ-ខេត្ត ទូទាំងព្រះរាជាណាចក្រកម្ពុជា ពោលគឺយ៉ាងហោចណាស់ឱ្យមានអភិបាលរងស្រុក/ខណ្ឌ/ក្រុង និងអភិបាលរងខេត្ត ឬរាជធានីផងដែរ។ ឆ្លៀតក្នុងឱកាសនោះដែរ លោកជំទាវរដ្ឋលេខាធិការ បានសម្តែងនូវការកោតសរសើរចំពោះវាគ្មិន និងសិក្ខាកាមទាំងអស់ដែលបានអញ្ជើញមកចូលរួមកម្មវិធីនេះ និងបានផ្ដាំផ្ញើឱ្យសិក្ខាកាមទាំងអស់ចូលរួមសួរសំណួរ ផ្លាស់ប្តូរផ្តល់មតិយោបល់ និងចែករំលែកចំណេះដឹងពាក់ព័ន្ធឱ្យបានផុលផុស ដើម្បីឱ្យសិក្ខាសាលានេះប្រព្រឹត្តទៅដោយរលូន និងទទួលបានផ្លែផ្កាតាមការគ្រោងទុក។ ជាមួយគ្នានោះផងដែរ លោកជំទាវរដ្ឋលេខាធិការ បានថ្លែងអំណរគុណ និងកោតសរសើរដល់គ្រប់មន្ទីរសាធារណការ និងដឹកជញ្ជូន រាជធានីខេត្តទាំងអស់ និងមន្រ្តីពាក់ព័ន្ធ នៃអនុគណៈកម្មការសុវត្ថិភាពចរាចរណ៏រាជធានីខេត្ត ដែលបានខិតខំអប់រំផ្សព្វផ្សាយលើកកម្ពស់សុវត្ថិភាពចរាចរណ៏ឱ្យទទួលបានលទ្ធផលល្អ និងសូមអំពាវនាវដល់ថ្នាក់ដឹកនាំមន្ទីរអង្គភាពទាំងអស់អនុគ្រោះតែងតាំងលើកកម្ពស់តួនាទីស្រ្តីឱ្យបានផុសផុលដែរ ស្របតាមអនុសាសន៍របស់សម្តេចតេជោនាយករដ្ឋមន្រ្តី និងរបស់ឯកឧត្តមទេសរដ្ឋមន្រ្តីកន្លងមក ព្រោះថាចំនួនមន្រ្តីរាជការនារីរបស់ក្រសួងមានចំនួនកាន់តែតិច បន្ទាប់ពីការចូលនិវត្តច្រើន។ ជាមួយនឹងការជូនពរបញ្ចប់កម្មវិធី លោកជំទាវក៏សំណូមពរសមាជិកអង្គប្រជុំជួយបន្ថែមការផ្សព្វផ្សាយដល់ប្រជាពលរដ្ឋទាំងអស់គោរពច្បាប់ចរាចរណ៍ឱ្យបានខ្ជាប់ខ្ជួនក្នុងស្មារតីទទួលខុសត្រូវខ្ពស់ និងប្រកាន់យកគោលការណ៍សុវត្ថិភាពជាចម្បង ដើម្បីជៀសផុតពីគ្រោះថ្នាក់ចរាចរណ៍ទាំងឡាយ៕