ថ្ងៃពុធ ៨រោច ខែជេស្ន ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០៦ ខែមិថុនា ឆ្នាំ២០១៨ ឯកឧត្តម តូច ចាន់កុសល រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញចូលរួមជាអធិបតី ក្នុងកិច្ចប្រជុំគណៈកម្មការសម្របសម្រួលរួមលើកទី៤ (4th JCC) ស្តីពី “គម្រោងទំនើបកម្មប្រព័ន្ធចុះបញ្ជី និងត្រួតពិនិត្យលក្ខណៈបច្ចេកទេសយានយន្ត (MVRI)” នៅ សណ្ឋាគារភ្នំពេញ ដោយមានការចូលរួមពី លោក តាណាកា កូតារ៉ូ អនុប្រធានតំណាងការិយាល័យ JICA ប្រចាំប្រទេសកម្ពុជា សមភាគីដែលជាសមាជិករបស់គម្រោង និងមន្រ្តីក្រសួងសាធារណការ និងដឹកជញ្ជូន តំណាងអន្តរក្រសួងមកពី អគ្គនាយកដ្ឋានពន្ធដារ និងអគ្គនាយកដ្ឋានគយ និងរដ្ឋាករ នៃក្រសួងសេដ្ឋកិច្ច និងហិរញ្ញវត្ថុ អគ្គស្នងការនគបាលជាតិ និងអគ្គនាយកដ្ឋានអត្តសញ្ញាណកម្ម នៃក្រសួងមហាផ្ទៃ និងក្រុមអ្នកជំនាញការគម្រោង JICA ដែលអ្នកចូលរួមប្រជុំសរុបទាំងអស់ប្រមាណ ៥០នាក់។ គោលបំណង នៃកិច្ចប្រជុំគណៈកម្មការសម្របសម្រួលរួមលើកទី៤ នៃគម្រោងនេះ គឺដើម្បីពិនិត្យឡើងវិញលើសមិទ្ធិផលរបស់គម្រោង ដែលសម្រេចបានកន្លងមក និងដើម្បីធ្វើការអនុម័តលើសកម្មភាពបន្ទាប់នៅពេលខាងមុខ ដែលពាក់ព័ន្ធទៅនឹងការធ្វើអោយប្រសើរឡើងនូវប្រព័ន្ធស្វ័យប្រវត្តិកម្ម រួមមានការចុះបញ្ជីយានយន្ត និងត្រួតពិនិត្យលក្ខណៈបច្ចេកទេសយានយន្ត ប្រកបដោយភាពរលូន មានសុវត្ថិភាពខ្ពស់ កាត់បន្ថយពេលវេលាផ្តល់សេវា និងកាត់បន្ថយភាពស្មុគស្មាន ក្នុងការផ្តល់សេវា។ បន្ថែមពីនេះទៅទៀត គម្រោងនេះក៏នឹងចូលរួមចំណែកក្នុងការពង្រឹងការ ប្រមូលចំណូលពន្ធរដ្ឋ ការពង្រឹងសុវត្ថិភាពចរាចរណ៍ និងចូលរួមកាត់បន្ថយបទល្មើសនៃការប្រើប្រាស់យានយន្តខុសច្បាប់។ ការរៀបចំពង្រឹងនូវបទដ្ឋានគតិយុត្តិ និងការផ្សព្វផ្សាយការយល់ដឹងអំពីប្រព័ន្ធក៏ត្រូវបានរួមបញ្ជូលក្នុងក្នុងគម្រោងនេះផងដែរ។