កិច្ចប្រជុំក្រុមការងារសម្រាប់វិស័យសេវាកម្មភស្ដុភារកម្ម និងដឹកជញ្ជូនលើកទី៣ (33rd Logistics and Transport Services Sectoral Working Group Meeting) ទីស្ដីការក្រសួង៖ ថ្ងៃអង្គារ ១២រោច ខែពិសាខ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី១៦ ខែឧសភា ឆ្នាំ២០២៣ លោកស្រី សន សុភាវត្តី អគ្គនាយករង តំណាងឯកឧត្តម ឈៀង ពេជ្រ អគ្គនាយក នៃអគ្គនាយកដ្ឋានភស្ដុភារកម្ម និងជាឧត្តមមន្រ្តីដឹកជញ្ជូនកម្ពុជា បានអញ្ជើញដឹកនាំកិច្ចប្រជុំក្រុមការងារសម្រាប់វិស័យសេវាកម្មភស្ដុភារកម្ម និងដឹកជញ្ជូនលើកទី៣ (33rd Logistics and Transport Services Sectoral Working Group Meeting) តាមរយៈប្រព័ន្ធវីដេអូពីចម្ងាយ ដោយមានការចូលរួមពីប្រទេសសមាជិកអាស៊ាន និងសហគ្រាសឯកជនអនុវត្តការងារលើវិស័យដឹកជញ្ជូនមួយចំនួនផងដែរ។ កិច្ចប្រជុំនេះត្រូវបានរៀបចំឡើងស្របតាមវិសាលភាពការងារ របស់ក្រុមការងារសម្រាប់វិស័យសេវាកម្មភស្ដុភារកម្ម និងដឹកជញ្ជូន (Logistics and Transport Services Sectoral Working Group) ដើម្បីពិភាក្សាលើការអនុវត្តកម្មវិធី និងកិច្ចសហការ លើវិស័យភស្ដុភារកម្ម និងដឹកជញ្ជូន សំដៅធ្វើយ៉ាងណាឱ្យវិស័យនេះមានភាពរីកចម្រើនស្របតាមបច្ចេកវិទ្យា និងការប្រើប្រាស់ធនធានធម្មជាតិ។ សូមជម្រាបជូនថា៖ ក្រុមការងារសម្រាប់វិស័យសេវាកម្មភស្ដុភារកម្ម និងដឹកជញ្ជូន ត្រូវបានបង្កើតឡើងដោយគណៈកម្មាធិការសម្របសម្រួលអាស៊ានស្តីពីសេវាកម្ម (Coordinating Committee on Services (CCS) ដែលមានតួនាទី៖ ១) ដើម្បីពិភាក្សា បង្កើត និងអនុវត្តកម្មវិធីសម្រាប់សមាហរណកម្មកាន់តែច្រើននៃវិស័យភស្តុភារកម្ម និងដឹកជញ្ជូនអាស៊ាន តាមរយៈកម្មវិធីសេរីភាវូបនីយកម្ម ការសម្របសម្រួល និងកិច្ចសហប្រតិបត្តិការ ២) ពិភាក្សា បង្កើត និងអនុវត្តកម្មវិធីសម្រាប់ការអនុវត្តផែនទីបង្ហាញផ្លូវសម្រាប់សមាហរណកម្មសេវាភស្តុភារកម្ម ៣) ពិភាក្សា រៀបចំផែនការ និងអនុវត្តសកម្មភាពកិច្ចសហប្រតិបត្តិការសេដ្ឋកិច្ចពាក់ព័ន្ធក្នុងវិស័យភស្តុភារកម្ម និងដឹកជញ្ជូន ៤) ដើម្បីពិភាក្សា និងអនុវត្តកម្មវិធីសម្រាប់កិច្ចសហប្រតិបត្តិការលើវិស័យសាធារណៈ និងឯកជនកាន់តែធំ លើសមាហរណកម្មភស្តុភារកម្ម និងការដឹកជញ្ជូន និង ៥) អនុវត្តការងារផ្សេងទៀតតាមការចាត់តាំងរបស់CCS៕