ក្រសួងសាធារណការ និង ដឹកជញ្ជូន បានធ្វើការតភ្ជាប់ប្រព័ន្ធស្វ័យប្រវត្តិកម្មដឹកជញ្ជូនផ្លូវគោក ជាមួយប្រព័ន្ធទិន្នន័យពន្ធគយរបស់អគ្គនាយកដ្ឋានគយ និង រដ្ឋាករនៃក្រសួងសេដ្ឋកិច្ច និង ហិរញ្ញវត្ថុរួចហើយ ហើយក៏បានដាក់ឱ្យដំណើរការរួចហើយដែរ កាលពីថ្ងៃទី២១ ខែឧសភា ឆ្នាំ ២០១៨ ក្រោមការចូលរួមពីលោកជំទាវ កុយ សុដានី អនុរដ្ឋលេខាធិការក្រសួងសាធារណការ និង ដឹកជញ្ជូន និង ឯកឧត្តមបណ្ឌិត គុណ ញឹម អគ្គនាយកនៃអគ្គនាយកដ្ឋានគយ និង រដ្ឋាករ ។ ការតភ្ជាប់ប្រព័ន្ធនេះគឺដើម្បីធ្វើការផ្ទៀតផ្ទាត់ លេខសម្គាល់សន្លឹកពន្ធនាំចូល ដើម្បីទាញយកព័ត៌មានយានយន្ត មកប្រើប្រាស់ សម្រាប់ការចុះបញ្ជីយានយន្ត ដែលចូលរួមចំណែកយ៉ាងសំខាន់ ក្នុងការបង្កភាពងាយស្រួលក្នុងការផ្តល់សេវា ទប់ស្កាត់ការក្លែងបន្លំឯកសារសាធារណៈ ចំណេញពេលវេលាក្នុងការចុះបញ្ជីយានយន្ត និង បង្កើនការប្រមូលចំណូលពន្ធគយចូលរដ្ឋផងដែរ។ គួរបញ្ជាក់ផងដែរថា គិតចាប់ពីថ្ងៃដាក់ឱ្យដំណើរការសាកល្បងកាលពីថ្ងៃទី១២ ខែមីនា ឆ្នាំ២០១៨ មកដល់ថ្ងៃដាក់ឱ្យដំណើរការជាផ្លូវការនេះ មានរយៈពេលប្រមាណជាង ២ខែមកហើយ ដែលបានផ្ទៀងផ្ទាត់គល់បញ្ជីយានយន្តប្រមាណជិត ១០ម៉ឺនគ្រឿង ក្នុងនោះរថយន្តមានប្រមាណជា ១៣.០០០គ្រឿង ៕