គម្រោងសាងសង់ផ្លូវក្រវាត់ក្រុងខ្សែទី៣​(ផ្លូវជាតិលេខ៤-ផ្លូវជាតិលេខ១) សម្រេចបាន​ប្រមាណជិត ៩០% ហើយ គិតត្រឹមថ្ងៃទី២៥ ខែកុម្ភ:​ ឆ្នាំ២០២៣​ នេះ នារសៀលថ្ងៃអង្គារ ៩កើត ខែផល្គុន ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៨ ខែកុម្ភៈ ឆ្នាំ២០២៣ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រី ក្រសួងសាធារណការ និងដឹកជញ្ជូន បានអញ្ជើញដឹកនាំគណៈប្រតិភូក្រសួង បំពេញបេសកកម្មចុះពិនិត្យបច្ចេកទេស និងវឌ្ឍនភាពការងារ គម្រោងសាងសង់ផ្លូវក្រវាត់ក្រុងខ្សែទី៣ (ផ្លូវជាតិលេខ៤ - ផ្លូវជាតិលេខ១) ដោយមានការចូលរួមពីសំណាក់ថ្នាក់ដឹកនាំអង្គភាពពាក់ព័ន្ធ មន្ត្រីជំនាញពាក់ព័ន្ធ ព្រមទាំងក្រុមការងារបច្ចេកទេស របស់ក្រុមហ៊ុនសាងសង់ផងដែរ។ យោងតាមរបាយការណ៍វឌ្ឍនភាពការងាររបស់អង្គភាពអនុវត្តគម្រោង (PIU) ផ្លូវក្រវាត់ក្រុងខ្សែទី៣ បានឱ្យដឹងថា គម្រោងសាងសង់ផ្លូវក្រវាត់ក្រុងខ្សែទី៣ (ផ្លូវជាតិលេខ៤ - ផ្លូវជាតិលេខ១) ដែលមានប្រវែងសរុប ៥២,៩៨៣ គីឡូម៉ែត្រ សម្រេចលទ្ធផលបានជិត ៩០% ហើយ គិតត្រឹមថ្ងៃទី២៥ ខែកុម្ភៈ ឆ្នាំ២០២៣ កន្លងទៅ។ ក្នុងនោះដែរ ការងារផ្លូវសម្រេចបាន ៨៩,៣៣% ការងារស្ពានរំលង (Flyover) សម្រេចបាន ៨៤,៣៧% និងការងារស្ពានសម្រេចបាន ៩៧,០៤%។ ថ្លែងក្នុងកិច្ចសម្ភាសន៍ ជាមួយអ្នកសារព័ត៌មាននាឱកាសចុះពិនិត្យផ្លូវនេះ ឯកឧត្តមទេសរដ្ឋមន្ត្រី បានលើកឡើងថា៖ ផ្លូវក្រវាត់ក្រុងខ្សែទី៣ នេះ នឹងត្រូវបញ្ចប់ការសាងសង់នៅក្នុងខែឧសភា ឆ្នាំ២០២៣ខាងមុខ ដោយក្នុងនោះដែរ ផ្លូវក្រាលបេតុងសរសៃដែក មានប្រវែង ៤៧,៦០៨ គីឡូម៉ែត្រ កម្រាស់ ២២ស.ម. និងផ្លូវខ្នែងចូលទៅកំពង់ផែស្វ័យភ្នំពេញ មានប្រវែង ៥,៣៧៥ គីឡូម៉ែត្រ ក្រាលដោយបេតុងកៅស៊ូ (AC) មានកម្រាស់ ៩ស.ម.។ គម្រោងមួយនេះត្រូវបានអនុវត្តការងារសាងសង់ដោយក្រុមហ៊ុន Shanghai Construction Group Co., Ltd. ក្នុងតម្លៃ ២៦៧,៦៧ លានដុល្លារអាមេរិក និងអនុវត្តការងារត្រួតពិនិត្យគម្រោងដោយក្រុមហ៊ុន Guangzhou Wanan Construction Supervision Co., Ltd. ក្នុងតម្លៃ ៥,៣៨ លានដុល្លារអាមេរិក។ នៅក្នុងបេសកម្មពិនិត្យបច្ចេកទេសនេះដែរ គណៈប្រតិភូ និងក្រុមការងារ បានចុះធ្វើតេស្តគុណភាព នៅតាមកន្លែងមួយចំនួន ហើយបានពិនិត្យឃើញថា ក្រុមហ៊ុនម៉ៅការសាងសង់ ពិតជាបានអនុវត្តត្រឹមត្រូវទៅតាមបទដ្ឋានបច្ចេកទេសដែលជាតម្រូវការរបស់ក្រសួង។ ជាមួយគ្នានេះដែរ ឯកឧត្តមទេសរដ្ឋមន្ត្រី បានបញ្ជាក់ថា ផ្លូវមួយខ្សែនេះនៅមិនទាន់ក្រវាត់ជុំវិញក្រុងនៅឡើយទេ (ពាក់កណ្តាលក្រវាត់) ដោយសារប៉ែកខាងកើត ដែលភ្ជាប់ពីផ្លូវជាតិលេខ១ ទៅផ្លូវជាតិលេខ៦ នៅមិនទាន់បានស្ថាបនានៅឡើយទេ ប៉ុន្តែផែនការសាងសង់ ត្រូវបានដាក់បញ្ចូលទៅក្នុងគម្រោងរួចរាល់ហើយ។ សូមជម្រាបជូនដែរថា៖ ផ្លូវក្រវាត់ក្រុងមួយខ្សែនេះ ចាប់ផ្តើមពីផ្លូវជាតិលេខ៤ ត្រង់ចំណុចគីឡូម៉ែត្រលេខ ១៤+១០៥ ស្ថិតក្នុងភូមិជម្ពូវ័ន្ត សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ភ្ជាប់ទៅកាន់ផ្លូវទំនប់កប់ស្រូវ ផ្លូវជាតិលេខ៥ ស្ពានឈ្នះឈ្នះ មហាវិថីឈ្នះឈ្នះ និងផ្លូវជាតិលេខ៦ ហើយនឹងប្រែក្លាយទៅជាផ្លូវក្រវាត់ក្រុងដ៏ធំ និងទំនើបថ្មីមួយសម្រាប់បម្រើឱ្យវិស័យដឹកជញ្ជូនរវាងរាជធានីភ្នំពេញ តភ្ជាប់ទៅកាន់ផ្លូវជាតិលេខ៦ លេខ៥ លេខ៤ លេខ៣ លេខ២ និងផ្លូវជាតិលេខ២១ ដោយឆ្លងកាត់ទន្លេបាសាក់ និងកោះអន្លង់ចិន មកបញ្ចប់ត្រឹមផ្លូវជាតិលេខ១ ត្រង់ចំណុចគីឡូម៉ែត្រលេខ ២៤+៨៤០ ស្ថិតក្នុងភូមិស្តៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្តាល (ផ្លូវមេ)។ ពិសេសជាងនេះទៅទៀត ខ្សែផ្លូវនេះក៏បានភ្ជាប់ទៅចំណតផែកុងតឺន័រថ្មី របស់កំពង់ផែស្វ័យតភ្នំពេញ នៅក្នុងស្រុកកៀនស្វាយ ក៏ដូចជាបំពេញឱ្យការតភ្ជាប់ផ្លូវអាស៊ានហាយវ៉េយ (AH1 និងAH11) និងផ្លូវរបៀងសំខាន់ៗ (របៀងកណ្តាល និងរបៀងសេដ្ឋកិច្ចភាគខាងត្បូង) របស់មហាអនុតំបន់មេគង្គផងដែរ៕