អាជ្ញាធរខេត្តកំពង់ធំ កំពុងពន្លឿនសម្អាតផ្លូវសំខាន់ៗ និងសួនច្បារក្នុងក្រុងស្ទឹងសែន ត្រៀមបុណ្យទន្លេលើកទី៧ ដែលនឹងចាប់ផ្តើមនៅថ្ងៃទី៨ ដល់ថ្ងៃទី១០ ខែមិនា ឆ្នាំ២០២៣ ក្រោមអធិបតីភាពសម្តេចអគ្គសេនាបតីតេជោ ហ៊ុន សែន។ នៅថ្ងៃទី២៨ ខែកុម្ភៈ ឆ្នាំ២០២៣ អាជ្ញាធរខេត្តកំពង់ធំ ដែលអនុវវត្តដោយអាជ្ញាធរក្រុងស្ទឹងសែន បាននិងកំពុងបោស​សម្អាតផ្លូវ និងសួនច្បារក្នុងក្រុងស្ទឹងសែន។ ក្នុងប្រតិបត្តិការនេះដែរលោក ទេព សោភ័ណ្ឌ អភិបាលរងក្រុងស្ទឹងសែន លើកឡើងថា ក្រោមការចង្អុលបង្ហាញរបស់ឯកឧត្តម ងួន រតនៈ អភិបាលខេត្តកំពង់ធំ បានចាត់ឲ្យអាជ្ញាធរក្រុងស្ទឹងសែន ចុះបោសសម្អាតផ្លូវសំខាន់ៗ និងបន្តលៀងសម្អាតសួនច្បារ ដែលមានសួនស្ទឹងសែន សួនវិមានឯករាជ្យ និងសួនដំរីជាន់ខ្លាផងដែរ។ លោកបន្តថា ស្ថានភាពបន្ទាន់នាពេលបច្ចុប្បន្ន ក្រុមការងារអនាម័យក្រុង បាននិងកំពុងបោសសម្អាតដីដែលមាននៅផ្លូវ សំ​ខាន់ៗ រហូតអស់ធូលីដីចេញពីផ្លូវជាតិលេខ៦ ក្នុងក្រុង ចាប់ពីរង្វង់មូលលោកតាក្រហម “ក” រហូតដល់សួនស្ទឹងសែន។ ​ទន្ទឹមនឹងការបោសសម្អាតនេះផងដែរ អាជ្ញាធរក្រុង រួមជាមួយអាជ្ញាធរសង្កាត់ទាំងប្រាំបី កំពុងមមាញឹក ចុះពិនិត្យការតុបតែងភ្លើងរបស់ប្រជាពលរដ្ឋការចងទង់ជាតិនៅតាមផ្ទះ ការលៀបថ្នាំផ្ទះមុខសួនស្ទឹងសែន រួមជាមួយការចុះផ្សព្វផ្សាយពីការតាំងលក់ទំនិញនៅតាមដងផ្លូវឲ្យមានរបៀបរាបរយ និងមានសណ្តាប់ធ្នាប់ល្អ។ ទាំងអស់នេះ គឺជាការត្រៀមលក្ខណៈសម្រាប់ធ្វើជាម្ចាស់ផ្ទះក្នុងពិធីបុណ្យទន្លេលើកទី៧ ក្រោមវត្តមាននៃការអញ្ជើញដ៏ខ្ពង់ខ្ពស់ពីសំណាក់សម្តេចអគ្គសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងសម្តេច​គតិព្រឹទ្ធបណ្ឌិត ប៊ុន រ៉ានី ហ៊ុនសែន។ ក្នុងរយៈពេលនៃបោសសម្អាតនេះ ក្នុងនាមរដ្ឋបាលក្រុងស្ទឹងសែន សូមសម្តែងនូវការយោគយល់ និងអធ្យាស្រ័យពីសំណាក់បងប្អូនប្រជាពលរដ្ឋដែលរស់នៅតាមដងផ្លូវ ក៏ដូចជាអ្នកដំណើរទាំងអស់ ក្នុងករណីការកកស្ទះចរាចរណ៍ ក៏ជាផលរំខានដោយធូលីហ៊ុយជាដើម៕