ភ្នំពេញ៖ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងថា ក្រសួងនឹងជំរុញឱ្យប្រជាពលរដ្ឋប្រើប្រាស់រថយន្តប្រើដោយថាមពលអគ្គិសនីបន្ថែមទៀត ខណៈក្រសួងបានធ្វើការជាមួយផ្នែកឯកជនត្រៀមដាក់ទីតាំងបញ្ចូលអគ្គិសនីរថយន្ត ២០០កន្លែងនៅទូទាំងប្រទេស។ ក្នុងកម្មវិធីបើកសន្និបាតបូកសរុបលទ្ធផលការងារឆ្នាំ២០២២ និងលើកទិសដៅការងារឆ្នាំ២០២៣ របស់ក្រសួងសាធារណការ និងដឹកជញ្ជូន លើប្រធានបទ “បន្តលើកកម្ពស់គុណភាព នៃការកសាងហេដ្ឋារចនាសម្ព័ន្ធ និងប្រព័ន្ធដឹកជញ្ជូន ប្រកបដោយប្រសិទ្ធភាព ចីរភាព បរិយាប័ន្ន និងការអភិវឌ្ឍធនធានមនុស្ស” នាព្រឹកថ្ងៃទី១៥ ខែកុម្ភៈ ឆ្នាំ២០២៣ ឯកឧត្តមទេសរដ្ឋមន្ត្រី ស៊ុន ចាន់ថុល បានឱ្យដឹងថា ពីមួយឆ្នាំទៅមួយឆ្នាំ ចំនួនពលរដ្ឋប្រើប្រាស់រថយន្ត មានការកើនឡើងច្រើន ដោយសារបងប្អូនប្រជាពលរដ្ឋយល់អំពីអត្ថប្រយោជន៍នៃការប្រើប្រាស់រថយន្តដើរដោយថាមពលអគ្គិសនី។ មូលហេតុនៃការកើនឡើងការប្រើប្រាស់នេះ គឺដោយសារ ទី១-ពន្ធនាំចូលរថយន្តដើរដោយថាមពលអគ្គិសនីត្រូវបានកាត់បន្ថយ និងទី២-តម្លៃនៃការធ្វើដំណើរតាមរថយន្តគឺថោកជាងរថយន្តចាក់ប្រេង។ឯកឧត្តមទេសរដ្ឋមន្ត្រី បានឱ្យដឹងទៀតថា ឆ្នាំ២០២២ ជាឆ្នាំដែលយើងបើកទំព័រថ្មី លើការជំរុញឱ្យប្រើប្រាស់រថយន្តប្រើអគ្គិសនី ដោយក្រសួងបានសហការជាមួយ UNDP ហើយUNDP បានផ្តល់ស្ថានីយបញ្ចូលថាមពលអគ្គិសនីចំនួន៤ ឱ្យមកក្រសួង ដាក់នៅក្រសួងចំនួន ១ ដាក់នៅក្រុងព្រះសីហនុចំនួន ១ ដាក់នៅសៀមរាបចំនួន ១ និងដាក់នៅបាត់ដំបង ចំនួន ១។ បន្ថែមពីនេះ ផ្នែកឯកជនក៏បាន ផ្តល់៣គ្រឿងបន្ថែមទៀត។ បើតាមឯកឧត្តមទេសរដ្ឋមន្ត្រី មកដល់ពេលនេះ មានរថយន្តប្រើប្រាស់អគ្គិសនីជាង ៧០០គ្រឿងហើយ​ដែលបានចុះបញ្ជី។ ស្របពេលជាមួយគ្នានេះ នាយករដ្ឋមន្ត្រីកម្ពុជា សម្តេចតេជោ ហ៊ុន សែន ក៏បានជំុរញការប្រើប្រាស់រថយន្តដើរដោយអគ្គិសនីផងដែរ ដោយសម្តេចបានចេញអនុក្រិតមួយ ឱ្យក្រសួងសាធារណការសិក្សាបង្កើតគោលនយោបាយយុទ្ធសាស្ត្រប្រើប្រាស់រថយន្តដ់ើរដោយថាមពលអគ្គិសនី៕