គម្រោងសាងសង់ និងកែលម្អផ្លូវរថភ្លើងនៅកម្ពុជាឲ្យក្លាយទៅជាផ្លូវរថភ្លើងល្បឿនលឿនដែលមានល្បឿនយ៉ាងតិច ១៦០ គីឡូម៉ែត្រក្នុង១ម៉ោង គិតមកដល់ពេលនេះត្រូវបានសិក្សារួចរាល់មួយចំនួនធំហើយ។ តាមការសិក្សាបានឲ្យដឹងថា គម្រោងនេះនឹងសាងសង់ខុសពីទម្រង់ដើម និងត្រូវប្រើដើមទុនខ្ទង់ ៤ ពាន់លានដុល្លារឯណោះ។ នេះបើតាមការបង្ហើបឲ្យដឹងពីឯកឧត្ដម ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងដឹកជញ្ជូនកាលពីពេលថ្មីៗកន្លងទៅ។ថ្លែងនៅក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆ្នាំ២០២២ និងលើកទិសដៅការងារឆ្នាំ២០២៣ កាលពីថ្ងៃទី៣០ ខែមករា ឆ្នាំ២០២៣ ឯកឧត្ដមទេសរដ្ឋមន្រ្ដីមានប្រសាសន៍លើកឡើងថា គម្រោងផ្លូវរថភ្លើងល្បឿនលឿននេះបានសិក្សាចប់មួយជំហានធំហើយ ហើយក៏ដឹងថាត្រូវធ្វើដូចម៉្ដេចដើម្បីឲ្យផ្លូវរទេះភ្លើងនេះបើកបរបានក្នុងល្បឿនពី ១៦០ ទៅ ២០០ គីឡូម៉ែត្រក្នុង១ម៉ោង។ ផ្លូវរថភ្លើងនេះគឺប្រហាក់ប្រហែលផ្លូវរថភ្លើងល្បឿនលឿនពីវៀងច័ន្ទន៍ទៅប្រទេសចិនផងដែរ ដោយសារយើងប្ដូរទំហំផ្លូវពី ១ ម៉ែត្រទៅ ១.៤៣៥ ម៉ែត្រ ដែលជាស្ដង់ដារផ្លូវរថភ្លើងល្បឿនលឿន។ទាក់ទងការសាងសង់ផ្លូវនេះ ឯកឧត្ដម ស៊ុន ចាន់ថុល ក៏បានបញ្ជាក់ដែរថា «យើងមិនអាចឲ្យរថយន្ដបើកកាត់ មានរបាំង ឈប់ឡានដើម្បីឲ្យរទេះភ្លើងឆ្លងកាត់បានទេ ត្រូវតែធ្វើនៅខាងលើទាំងអស់ អត់មានធ្វើក្រោមទេ។ ផ្លូវរទេះភ្លើងនៅលើទាំងអស់ ឡានបើកនៅក្រោមចុះ»។ ឯកឧត្ដមបន្ដថា តាមការសិក្សាផ្លូវរថភ្លើងល្បឿនលឿននេះនឹងត្រូវចំណាយថវិកាប្រមាណ ៤ ពាន់លានដុល្លារសម្រាប់ការសាងសង់។ ដោយក្នុងនោះនឹងត្រូវចំណាយជិត ១១ លានដុល្លារនៅក្នុងការសាងសង់ ១ គីឡូម៉ែត្រ។ ឯកឧត្ដមបន្ថែមថា សម្រាប់ការដឹកជញ្ជូនទំនិញ​ និងអ្នកដំណើរ តាមផ្លូវរថភ្លើងល្បឿនលឿននេះយើងនឹងកាត់ ពេលវេលា កាត់បន្ថយគ្រោះថ្នាក់ចរាចរណ៍ កាត់បន្ថយការខូចខាតផ្លូវផងដែរ។ តាមការវាយតម្លៃរបស់ក្រុមហ៊ុនដែលបានសិក្សាថានៅឆ្នាំ២០៣៥ ការដឹកជញ្ជូនតាមរទេះភ្លើង ប្រៀបធៀបតម្លៃដឹកជញ្ជូនតាមរថយន្ដគឺចំណេញ ៥៣០ លានដុល្លារនៅក្នុង១ឆ្នាំ និង ៨០០ លានដុល្លារក្នុង១ឆ្នាំនៅឆ្នាំ២០៤៥។ សូមជម្រាបផងដែរថា គម្រោងសាងសង់ និងកែលម្អផ្លូវរថភ្លើងល្បឿនលឿននៅកម្ពុជានេះគឺមានពីរដំណាក់កាល។​ ដោយដំណាក់កាលទី១ គឺចាប់ពីប៉ោយប៉ែត មករាជធានីភ្នំពេញ និងដំណាក់កាលទី២ តភ្ជាប់ពីភ្នំពេញទៅកាន់ខេត្ដព្រះសីហនុ៕