ទីស្តីការក្រសួង៖ នាព្រឹកថ្ងៃចន្ទ ៩កើត ខែមាឃ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី៣០ ខែមករា ឆ្នាំ២០២៣ ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារេណការ និងដឹកជញ្ជូន បានអនុញ្ញាតឱ្យប្រតិភូក្រុមហ៊ុន Minconsult Sdn Bhd ដឹកនាំដោយ លោក​ Dr. Dennis Ganendra - CEO​ អញ្ជើញចូលជួបសម្តែងការគួរសម និងជម្រាបជូនពីលទ្ធផលការងារ ដោយមានការចូលរួមផងដែរពី ឯកឧត្តមរដ្ឋលេខាធិការ ឯកឧត្តមអគ្គនាយក និងមន្ត្រីជំនាញជាន់ខ្ពស់ពាក់ព័ន្ធ។ ក្នុងជំនួបនាឱកាសនេះ តំណាងក្រុមហ៊ុន Minconsult Sdn Bhd បានជម្រាបជូនអង្គប្រជុំឱ្យបានជ្រាបអំពីលទ្ធផលការងាររបស់ខ្លួន ក្នុងនាមជាអ្នកត្រួតពិនិត្យ និងវាយតម្លៃបច្ចេកទេសលើគម្រោងសាងសង់ផ្លូវល្បឿនលឿនភ្នំពេញ-ក្រុងព្រះសីហនុ ដែលសព្វថ្ងៃកំពុងបើកដំណើរការ។ តំណាងក្រុមហ៊ុន Minconsult Sdn Bhd បានថ្លែងអំណរគុណចំពោះ ក្រសួងសាធារណការ និងដឹកជញ្ជូន ដែលបានផ្តល់ឱកាស និងទំនុកចិត្តសម្រាប់ការបំពេញការងារត្រួតពិនិត្យ និងវាយតម្លៃផ្នែកបច្ចេកទេស លេីគម្រោងកន្លងមក ការផ្តល់ឱកាសការងារសម្រាប់គម្រោងផ្សេងៗទៀត។ ក្រុមហ៊ុនបានសំដែងការតាំងចិត្ត យ៉ាងមុតមាំ​ បន្តខិតខំប្រឹងប្រែងឱ្យអស់ពីសមត្ថភាព និងលទ្ធភាព ដេីម្បីជំរុញការអភិវឌ្ឍហេដ្ឋារចនាសម្ព័ន្ធកម្ពុជា​ កាន់តែមានប្រសិទ្ធភាព៕