ភ្នំពេញ​ ៖​ លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន បានសហការជាមួយលោក​ គង់ វិបុល ប្រតិភូរាជរដ្ឋាភិបាល ទទួល​បន្ទុក​ជា​ អគ្គនាយកពន្ធដារ តភ្ជាប់ប្រព័ន្ធចុះ បញ្ជីយានយន្ត ជាមួយប្រព័ន្ធទិន្នន័យពន្ធដារ ។ នៅក្នុងជំនួបពិភាក្សាការងារ​ជាមួយ​លោក​ ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន កាលពីថ្ងៃទី១០​ ខែឧសភា​ ឆ្នាំ២០១៨​ ស្ដីពី​ ការពង្រឹងយន្តការ នៃការគ្រប់គ្រងការចុះបញ្ជីយានយន្ត ការផ្ទេរកម្មសិទ្ធិយានយន្ត ការបង់ពន្ធប្រថាប់ត្រា និងការបង់ពន្ធប្រចាំឆ្នាំលើមធ្យាបាយធ្វើដំណើរ​ លោក​ គង់ វិបុល​ បានមានប្រសាសន៍​ថា​ ការជំរុញទៅលើយន្តការនៃការប្រមូលពន្ធ ទាំងពន្ធប្រថាប់ត្រាលើការផ្ទេរកម្មសិទ្ធិយានយន្ត និងពន្ធលើមធ្យោបាយធ្វើដំណើរដើម្បីឲ្យកាន់តែមានប្រសិទ្ធភាព​ ។ ចំណែក​ លោក​ ស៊ុន​ ចាន់ថុល​ ក៏បានលើកឡើងដែរថា​ សារៈសំខាន់នៃការគ្រប់គ្រងយានយន្តឲ្យមានភាពកាន់ តែប្រសើរឡើង សំដៅលុបបំបាត់នូវការប្រើប្រាស់យានយន្តដែលមិនបានចុះបញ្ជីត្រឹមត្រូវ លុបយានយន្ត ទាំងឡាយណាដែលឈប់ប្រើប្រាស់ចេញពីបញ្ជីយានយន្ត ជំរុញការផ្តល់សេវាកាន់តែមានភាពងាយស្រួល និងការចំណាយរយៈពេលតិចជូន​ ប្រជាពលរដ្ឋ។ លោកបន្ដថា​ “ ដោយយល់ឃើញពីសារៈសំខាន់ខាងលើ អង្គប្រជុំបានសម្រេចធ្វើការតភ្ជាប់ប្រព័ន្ធចុះបញ្ជីយានយន្ត ជាមួយនឹងប្រព័ន្ធទិន្នន័យពន្ធដារ ក្នុងគោលបំណងចែករំ លែកទិន្នន័យគល់បញ្ជីជាមួយគ្នាទៅវិញទៅមក ក៏ដូចជាការផ្ទៀងផ្ទាត់គល់បញ្ជីមុននឹងអនុញ្ញាតឲ្យផ្ទេរកម្មសិទ្ធិយានយន្ត បង់ពន្ធទៅលើមធ្យោបាយធ្វើដំណើរ ក៏ដូចជាធានាឲ្យបានថា យានយន្តដែលមកផ្ទេរកម្មសិទ្ធិ សុទ្ធតែបានបង់ពន្ធប្រថាប់ត្រាត្រឹមត្រូវ ចំពោះយានយន្តដែលមិនបានបំពេញកាតព្វកិច្ចបង់ពន្ធលើមធ្យោបាយធ្វើដំណើរត្រឹមត្រូវនោះ ក៏ត្រូវប្រឈមមុខនូវការលុបឈ្មោះចេញពីបញ្ជីយានយន្តផងដែរ”។ រដមន្ដ្រីក្រសួងសាធារណការ​ បានបន្ថែមថា​ ការតភ្ជាប់ទិន្នន័យនេះ ក៏នឹងផ្តល់លទ្ធភាពឲ្យអគ្គនាយកដ្ឋានពន្ធដារ ធ្វើការជូនដំណឹងទៅដល់ម្ចាស់យានយន្តដែលជាប់កាតព្វកិច្ចបង់ពន្ធទៅលើមធ្យោបាយធ្វើដំណើរជាប្រចាំឆ្នាំផងដែរ។ ជាមួយ​គ្នា​នេះ​ដែរ​ ក្រសួងសាធារណការ​ និងអគ្គនាយកពន្ធដារ មានសង្ឃឹមយ៉ាងមុតមាំថា ការតភ្ជាប់ប្រព័ន្ធនេះ នឹងដំណើរការទៅបានយ៉ាងរលូន នឹងជួយចូលរួមទៅដល់ការពង្រឹងនូវសន្តិសុខជាតិ ជួយបង្កើនចំណូលពន្ធរដ្ឋ និងជួយជំរុញទៅដល់ការគ្រប់គ្រងទៅលើមធ្យោបាយធ្វើដំណើតឲ្យបានកាន់តែប្រសើរឡើង៕