ពិធីបិទ “ការប្រកួតកីឡាហែលទឹកជ្រើសរើសជើងឯកថ្នាក់ជាតិ ប្រចាំឆ្នាំ២០២២” ភ្នំពេញ៖ ថ្ងៃសុក្រ ១៤រោច ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២០ ខែមករា ឆ្នាំ២០២៣ ឯកឧត្តម បុង ប៊ុនហួន រដ្ឋលេខាធិការ តំណាងដ៏ខ្ពង់ខ្ពស់ ឯកឧត្តមទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានសហព័ន្ធខ្មែរកីឡាហែលទឹក បានអញ្ជើញជាអធិបតីភាពក្នុងពិធីបិទ “ការប្រកួតកីឡាហែលទឹកជ្រើសរើសជើងឯកថ្នាក់ជាតិ ប្រចាំឆ្នាំ២០២២” ដែលក្នុងពិធីបិទការប្រកួតនេះ ក៏មានការអញ្ជើញចូលរួមពីឯកឧត្ដម លោកជំទាវ ប្រតិភូតំណាងក្រសួង ថ្នាក់ដឹកនាំរាជធានី-ខេត្ត ភ្ញៀវកិត្តិយសជាតិ-អន្តរជាតិ មាតាបិតា អាណាព្យាបាល គ្រូបង្វឹក ក៏ដូចជាកីឡាករ-កីឡាការិនីផងដែរ។ សូមបញ្ជាក់ថា៖ ការប្រកួតកីឡាហែលទឹកជ្រើសរើសជើងឯកថ្នាក់ជាតិ ប្រចាំឆ្នាំ២០២២ នេះ បានប្រព្រឹត្តទៅចាប់ពីថ្ងៃទី១៨ ដល់ថ្ងៃទី២០ ខែមករា ឆ្នាំ២០២៣ នៅអាងហែលទឹក នៃពហុកីឡដ្ឋានជាតិអូឡាំពិក ដោយមានកីឡាករ-កីឡាការិនីចំនួន ១០៣នាក់ ក្នុងនោះស្រី ៤៦នាក់ មកពីក្លឹបហែលទឹកចំនួន ០៨ស្ថាប័ន ១) ក្លឹបហែលទឹកក្រសួងសាធារណការ និងដឹកជញ្ជូន ២) ក្លឹបហែលទឹកក្រសួងមហាផ្ទៃ ៣) ក្លឹបហែលទឹកក្រសួងសេដ្ឋកិច្ច និងហិរញ្ញវត្ថុ ៤) ក្លឹបហែលទឹកក្រសួងព័ត៌មាន ៥) ក្លឹបហែលទឹកនាគរាជកំពង់ចាម ៦) ក្លឹបហែលទឹកខេត្តបាត់ដំបង ៧) ក្លឹបហែលទឹកព្រឹទ្ធាចារ្យហែមថុន និង ៨) សាលាអន្តរជាតិ Decart France ដែលបានចូលរួមប្រកួតប្រជែងលើវិញ្ញាសាចំនួន ២០វិញ្ញាសារួមមាន៖ វិញ្ញាសាហែលរបៀបសេរីផ្នែកបុរស-នារី ចម្ងាយ១០០ម និង២០០ម វិញ្ញាសាហែលរបៀបកង្កែបផ្នែកបុរស-នារី ចម្ងាយ១០០ម និងវិញ្ញាសាហែលរបៀបមេអំបៅបុរស-នារី ចម្ងាយ ៥០ម ផងដែរ។ តាមរយៈកម្មវិធីនេះផងដែរ ឯកឧត្តមរដ្ឋលេខាធិការ បានបង្ហាញពីកិច្ចខិតខំរបស់រាជរដ្ឋាភិបាលក្នុងការអភិវឌ្ឍប្រទេសជាតិឱ្យបានរីកចម្រើនលើគ្រប់វិស័យ រួមទាំងវិស័យកីឡានេះផងដែរ ជាក់ស្តែងបច្ចុប្បន្នរាជរដ្ឋាភិបាលកម្ពុជា តាមរយ:ក្រសួងអប់រំ យុវជន និងកីឡា បាននិងកំពុងបន្តការយកចិត្តទុកដាក់ខ្ពស់លើវិស័យកីឡានេះ ដោយហេតុថាកម្ពុជានឹងធ្វើជាម្ចាស់ផ្ទះរៀបចំការប្រកួតកីឡាអាស៊ីអាគ្នេយ៍ (SEA GAME) លើកទី៣២ នៅឆ្នាំ២០២៣។ ឯកឧត្តមរដ្ឋលេខាធិការ បានលើកឡើងថា កម្ពុជាគឺដើរក្រោយប្រទេសជាសមាជិកអាស៊ានប្រមាណ ៣០ឆ្នាំចំពោះវិស័យកីឡាហែលទឹកនេះ ចាប់តាំងពីការខកខានដោយសារកម្ពុជាធ្លាក់ក្នុងភ្លើងសង្រ្គាមនាឆ្នាំ១៩៧០ ហើយរហូតដល់ឆ្នាំ១៩៩៨ ទើបវិស័យកីឡាជាតិចាប់ផ្ដើមមានសកម្មភាពឡើងវិញ តែនាពេលនោះគឺពុំទាន់មានសកម្មភាពធំដុំនៅឡើយទេ។ ឯកឧត្តម បានបន្តថា រហូតដល់ឆ្នាំ២០១៤ ក្រោយពេល ឯកឧត្តមទេសរដ្ឋមន្ត្រី ស៊ុន ចាន់ថុល បានក្លាយជាប្រធានសហព័ន្ធកីឡាហែលទឹក ទើបយើងបានចាប់ផ្ដើមរៀបចំវិស័យកីឡាហែលទឹកនេះឡើងវិញ ដែលពីដំបូងគឺផ្ដោតលើការរៀបចំអាងហែលទឹក ដែលមកទល់ពេលនេះមានចំនួន៤អាងនៅតាមបណ្ដារាជធានី-ខេត្ត រួមមាន៖ (ភ្នំពេញ បាត់ដំបង កំពង់ចាម និងខេត្តកណ្ដាល)។ ទទ្ទឹមនឹងការរៀបចំហេដ្ឋារចនាសម្ព័ន្ធនេះ ក៏មានរៀបចំគ្រូបណ្ដុះបណ្ដាល និងការចាត់តាំងឱ្យមានការប្រកួតរាល់ឆ្នាំដើម្បីជាវិញ្ញាសាឱ្យកីឡាករ-កីឡាការិនីអាចអនុវត្តបានផងដែរ។ បានបន្ថែមពីនេះ សហព័ន្ធកីឡាហែលទឹកបានបញ្ជូនកីឡាករ-កីឡាការិនីទៅបង្វឹកបន្ថែមត្រៀមសម្រាប់ SEA GAME ដែលក្នុងនោះមានបញ្ជូនទៅប្រទេសថៃ ប្រទេសចិន និងប្រទេសវៀតណាមជាដើម ហើយជាមួយគ្នានេះសហព័ន្ធក៏មានក្ដីសង្ឃឹមផងដែរថាកីឡាករ-កីឡាការិនីរបស់យើងនឹងអាចទទួលបានមេដាយជូនជាតិនាឱកាសនោះ។ កម្ពុជាត្រូវការធនធានមនុស្ស និងគ្រូបង្វឹកកីឡា ដែលមានចំណេះដឹង និងជំនាញកីឡាប្រភេទផ្សេងៗ ច្បាស់លាស់ជាច្រើន ដើម្បីជួយបង្ហាត់បង្រៀនយុវជនឱ្យមានសមត្ថភាពក្នុងការដណ្តើម មេដាយលើឆាកអន្តរជាតិ។ ជាកិច្ចបញ្ចប់ ឯកឧត្តមរដ្ឋលេខាធិការ បានសង្កត់ធ្ងន់ថា ការអភិវឌ្ឍវិស័យកីឡានេះមិនអាចកាត់ផ្ដាច់ចេញពីសន្តិភាពពេញលេញនៅក្នុងប្រទេសជាតិទេ មានសុខសន្តិភាពទើបយើងអាចអភិវឌ្ឍប្រទេសបានគ្រប់វិស័យទាំងអស់ ដូចនេះសុខសន្តិភាពជាតម្លៃដែលត្រូវការពារថែរក្សាឱ្យបានគង់វង្ស៕