កិច្ចប្រជុំគណៈកម្មការពិនិត្យវាយតម្លៃការអនុវត្តការងាររបស់មន្ទីរសាធារណការ និងដឹកជញ្ជូន រាជធានី /ខេត្ត ដែលមានស្នាដៃការងារឆ្នើម និងត្រូវផ្តល់បណ្ណសរសើរក្នុងពិធីសន្និបាតបូកសរុបលទ្ធផលការងារ ខាងមុខ ទីស្តីការក្រសួង៖ នារសៀលថ្ងៃព្រហស្បតិ៍ ១៣រោច ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវនឹង ថ្ងៃទី១៩ ខែមករា ឆ្នាំ២០២៣ ឯកឧត្តម ស៊ុយ សាន រដ្ឋលេខាធិការ ក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំគណៈកម្មការពិនិត្យ វាយតម្លៃការអនុវត្តការងាររបស់មន្ទីរសាធារណការ និង ដឹកជញ្ជូន រាជធានី/ខេត្ត ដែលត្រូវផ្តល់បណ្ណសរសើរ ដោយមានការចូលរួមពីសំណាក់ឯកឧត្តម អនុរដ្ឋលេខាធិការ នាយកខុទ្ទកាល័យ និងតំណាងអគ្គនាយកដ្ឋានជំនាញពាក់ព័ន្ធ។ កិច្ចប្រជុំនេះ ត្រូវបានរៀបចំឡើងក្នុងគោលបំណងដើម្បី ពិនិត្យពិភាក្សាលើនីតិវិធីនៃការវាយតម្លៃ ការអនុវត្តសកម្មភាពការងារ ក្នុងរយៈពេលមួយអាណត្តិទី៦ របស់មន្ទីរសាធារណការ និងដឹកជញ្ចូន រាជធានី/ខេត្ត ស្ថិតនៅក្រោមឱវាទក្រសួង ដើម្បីជាមូលដ្ឋានក្នុងការដាក់ពិន្ទុ និងកំណត់និទ្ទេស សម្រាប់ រៀបចំបណ្ណសរសើរចំពោះមន្ទីរណាដែលមានភាពសកម្ម និងលទ្ធផលការងារឆ្នើម។ ការផ្តល់ជូនបណ្ណសរសើរចំពោះមន្ទីរសាធារណការ និងដឹកជញ្ចូន រាជធានី/ខេត្ត ដែលមានស្នាដៃឆ្នើម ក្នុងការបំពេញការងារ គឺជាគំនិតផ្តួចផ្តើមដ៏ខ្ពង់ខ្ពស់របស់ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រី ក្រសួងសាធារណការ និងដឹកជញ្ជូន ដើម្បីចូលរួមជំរុញលើកទឹកចិត្តដល់ថ្នាក់ដឹកនាំអង្គភាព ក៏ដូចជា មន្ត្រីរាជការ ព្រមទាំងបុគ្គលិក កម្មករ ក្រោមឱវាទទាំងអស់ ដែលបានខិតខំប្រឹងប្រែងបំពេញតួនាទីភារកិច្ចយ៉ាងសកម្ម ធ្វើឱ្យការងារនៅក្នុងមន្ទីររបស់ខ្លួនទទួលបានលទ្ធផលល្អប្រសើរ។ សូមជម្រាបជូនថា៖ ការប្រគល់បណ្ណសរសើរជូនដល់មន្ទីរដែលមានស្នាដៃឆ្នើម គ្រោងនឹងប្រព្រឹត្តទៅក្នុង ឱកាសដែលក្រសួងរៀបចំពិធីសន្និបាតបូកសរុបលទ្ធផលការងារប្រចាំឆ្នាំ២០២២ និងលើកទិសដៅ ការងារឆ្នាំ២០២៣ នាដើមខែកុម្ភៈ ខាងមុខនេះ៕