កិច្ចប្រជុំពិភាក្សាសកម្មភាពការងារនារី និងផែនការយុទ្ធសាស្ត្របញ្ជ្រាបយេនឌ័រ ក្រោមការដឹកនាំផ្ទាល់ លោកជំទាវ មឹន មាណវី ទីស្ដីការក្រសួង៖ ថ្ងៃព្រហស្បតិ៍ ១៣រោច ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៩ ខែមករា ឆ្នាំ ២០២៣ លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជា ប្រធានសមាគមនារីក្រសួងសាធារណការ និងដឹកជញ្ជូន បានអញ្ជើញដឹកនាំកិច្ចប្រជុំពិភាក្សាសកម្មភាព ការងារនារី និងផែនការយុទ្ធសាស្ត្របញ្ជ្រាបយេនឌ័រ ដោយមានការអញ្ជើញចូលរួមពីថ្នាក់ដឹកនាំក្រសួង តំណាងនារីមកពីអង្គភាពចំណុះឱ្យក្រសួង ស្ត្រីជាអគ្គនាយករង និងជាប្រធាន-អនុប្រធាននាយកដ្ឋាន។ កិច្ចប្រជុំនេះធ្វើឡើងដើម្បីពិភាក្សាផ្ដោតទៅលើរបៀបវារៈស្ដីពីការត្រៀមរៀបចំប្រារព្វពិធីអបអរសាទរខួប លើកទី១១២ ទិវាអន្តរជាតិនារី ៨មីនា ឆ្នាំ២០២៣ ខាងមុខ និងផែនការយុទ្ធសាស្ត្របញ្ជ្រាបយេនឌ័រ និង បញ្ហាផ្សេងៗមួយចំនួនទៀតផងដែរ។ ថ្លែងក្នុងចំណាប់អារម្មណ៍នាឱកាសនោះ លោកជំទាវរដ្ឋលេខាធិការ បានលើកឡើងពីសារសំខាន់នៃកត្តា សុខសន្តិភាពក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងបានស្នើឱ្យតំណាងជាស្ត្រីគ្រប់អគ្គនាយកដ្ឋាន នាយកដ្ឋាន និងអង្គភាពក្រោមឱវាទក្រសួងពិនិត្យមើលអត្តសញ្ញាណបណ្ណរបស់ក្រុមការងារសមាគមនារី ដើម្បីត្រៀម ចូលរួមការបោះឆ្នោតនាពេលខាងមុខនេះឱ្យបានគ្រប់ៗគ្នា។ បន្ថែមពីលើនេះ លោកជំទាវរដ្ឋលេខាធិការ បានថ្លែងកោតសរសើរដល់ក្រុមការងារសមាគមនារីក្រសួង ដែលបានខិតខំប្រឹងប្រែងប្រកបដោយឆន្ទៈក្នុងការអនុវត្តផែនការសកម្មភាពការងារចុះមូលដ្ឋានកន្លងមក និងបានណែនាំឱ្យតំណាងជាស្ត្រីគ្រប់អគ្គនាយកដ្ឋាន នាយកដ្ឋាន និងអង្គភាពក្រោមឱវាទក្រសួង រៀបចំ បូកសរុបរបាយការណ៍លទ្ធផលការងារឱ្យបានរួចរាល់ ដើម្បីរៀបចំធ្វើបច្ចុប្បន្នភាពស្ថិតិមន្ត្រីរាជការជានារី។ លោកជំទាវរដ្ឋលេខាធិការ ក៏បានជំរុញលើកទឹកចិត្តផងដែរឱ្យតំណាងស្ត្រីរួបរួមគ្នា និងពង្រឹងសាមគ្គីភាព ផ្ទៃក្នុងឱ្យបានរឹងមាំ បំពេញភារកិច្ចឱ្យបានសកម្មតាមផែនការសកម្មភាព ដែលបានលើកឡើងប្រកប ដោយភាពច្នៃប្រឌិត និងបត់បែនទៅតាមស្ថានការវិវត្តន៍ជាក់ស្តែងរបស់ប្រទេសជាតិ និងអន្តរជាតិ សំដៅរួមចំណែកដល់ការកសាងហេដ្ឋារចនាសម្ព័ន្ធជាតិឱ្យតែកាន់តែរឹងមាំ និងរីកចម្រើនឡើងថែមទៀត។ គួរកត់សម្គាល់ថា៖ រាជរដ្ឋាភិបាលកម្ពុជា បានយកចិត្តទុកដាក់ក្នុងការលើកកម្ពស់សមភាពយេនឌ័រ ការ ពង្រឹងភាពអង់អាចក្លាហានរបស់នារី ដើម្បីឱ្យពួកគាត់ក្លាយជាកម្លាំងចលករដ៏សំខាន់ក្នុងកិច្ចអភិវឌ្ឍ សង្គម និងសេដ្ឋកិច្ចតាមរយៈការដាក់ចេញនូវគោលនយោបាយជាតិស្ដីពីសមភាពយេនឌ័រ សម្រាប់ជា ផែនទីបង្ហាញផ្លូវក្នុងការលើកកម្ពស់ និងបញ្ជ្រាបយេនឌ័រនៅតាមស្ថាប័ន។ ជាលទ្ធផល អង្គប្រជុំបានឯកភាពលើការចងក្រងវីដេអូស្ដីពីផែនការសកម្មភាពការងាររបស់នារី និង ឯកភាពលើការផ្ដល់ជូនជាវត្ថុអនុស្សវរីយ៍ដល់អ្នកចូលរួមនៅថ្ងៃប្រារព្ធពិធីអបអរសាទរខួបលើកទី១១២ ទិវាអន្តរជាតិនារី ៨មីនា ឆ្នាំ២០២៣ ខាងមុខនេះ៕