ឯកឧត្ដម ឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូនផ្លូវគោក បានដឹកនាំកិច្ចប្រជុំ ដើម្បីជំរុញការប្រើប្រាស់រថយន្តក្រុងអគ្គិសនី នៅថ្ងៃពុធ ១២រោច ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១៨ ខែមករា ឆ្នាំ២០២៣ វេលាម៉ោង៩:០០នាទីព្រឹក ឯកឧត្ដម ឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូនផ្លូវគោក បានអញ្ជើញដឹកនាំកិច្ចប្រជុំជាមួយសមាគមដឹកជញ្ជូនអ្នកដំណើរផ្លូវគោកកម្ពុជា និងបណ្តាក្រុមហ៊ុននាំចូលយានយន្តអគ្គិសនីនៅកម្ពុជា ដើម្បីពិភាក្សាពីការជំរុញការប្រើប្រាស់រថយន្តក្រុងអគ្គិសនីនៅកម្ពុជា សម្រាប់មធ្យោបាយដឹកជញ្ជូនសាធារណៈ ស្របតាមអនុសាសន៍ណែនាំដ៏ខ្ពង់ខ្ពស់របស់ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ដែលបានជួបពិភាក្សាការងារជាមួយសមាគមដឹកជញ្ជូនអ្នកដំណើរផ្លូវគោកកម្ពុជា កាលពីថ្ងៃទី ១១​ ខែ មករា ឆ្នាំ២០២៣​ កន្លងទៅ ដោយកិច្ចប្រជុំនេះ មានការចូលរួមពីលោកប្រធាន អនុប្រធាននាយកដ្ឋានដឹកជញ្ជូនសាធារណៈក្រុង និង លោក លោកស្រីប្រធាន អនុប្រធានការិយាល័យ និងមន្រ្តីពាក់ព័ន្ធផងដែរ។ នៅក្នុងកិច្ចប្រជុំពិភាក្សានេះ បានផ្ដោតសំខាន់លើការលើកទឹកចិត្តក្រុមហ៊ុនផ្គត់ផ្គង់យានយន្តអគ្គិសនីនាំចូលយានយន្តក្រុងអគ្គិសនីសម្រាប់ធ្វើមធ្យោបាយដឹកជញ្ជូនអ្នកដំណើរ ដើម្បីបំពេញតម្រូវការរបស់សមាគមដឹកជញ្ជូនអ្នកដំណើរ និងបណ្ដាក្រុមហ៊ុនដឹកជញ្ជូនអ្នកដំណើរមួយចំនួនផងដែរ។ ជាពិសេស គឺលើកទឹកចិត្តវិស័យឯកជនសហការដំឡើងស្ថានីយបញ្ចូលថាមពលយានយន្តអគ្គិសនីនៅតាមបណ្ដាខេត្ត និងតំបន់សំខាន់ៗ មួយចំនួន។ ទន្ទឹមគ្នានេះដែរ ក្រុមហ៊ុនផ្គត់ផ្គង់យានយន្តអគ្គិសនី បានស្នើសុំរាជរដ្ឋាភិបាល កាត់បន្ថយពន្ធនាំចូលយានយន្តអគ្គិសនីឱ្យបានកាន់តែទាបតាមដែលអាចធ្វើបាន៕