កំពង់ចាម៖ «គ្មានគម្រោងសាងសង់ផ្លូវ និងស្ពានណាមួយ ត្រូវបានពន្យារ ឬលុបចោល ដោយសារតែវិបត្តិកូវីដ-១៩ និងវិបត្តិសេដ្ឋកិច្ចនោះឡើយ»។ នេះជាការបញ្ជាក់យ៉ាងច្បាស់ៗរបស់ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ដ្រីក្រសួងសាធារណការ និងដឹកជញ្ជូនទៅកាន់អ្នកកាសែតកាលពីថ្ងៃទី០៩ ខែមករា ឆ្នាំ២០២៣។ វិបត្តិជំងឺកូវីដ-១៩ ក៏ដូចជាវិបត្តិសេដ្ឋកិច្ចសកលបណ្តាលពីសង្គ្រាមនៅអ៊ុយក្រែន បានបង្កផលប៉ះពាល់ជាខ្លាំងដល់សេដ្ឋកិច្ចបណ្តាប្រទេសនានានៅលើពិភពលោក រួមទាំងកម្ពុជាផងដែរ។ តែបើទោះបីជាយ៉ាងណា វិបត្តិទាំងនោះ មិនបានបង្កការរាំងស្ទះដល់គម្រោងកសាងផ្លូវ និងស្ពាននៅក្នុងប្រទេសកម្ពុជានោះឡើយ។ ប្រទេសដែលផ្តល់កម្ចីលើគម្រោងសាងសង់ហេដ្ឋារចនាសម្ព័ន្ធនៅកម្ពុជា មានដូចជាចិន ជប៉ុន និងកូរ៉េខាងត្បូង ក៏មិនបានលុបចោលគម្រោងនៃការផ្តល់កម្ចីណាមួយនោះដែរ។ ឯកឧត្តមទេសរដ្ឋមន្ត្រី ស៊ុន ចាន់ថុល បានបញ្ជាក់បន្ថែមថា «សូមជម្រាបថាអត់មានគម្រោងណាមួយដែលបានលុបចោល ដោយសារវិបត្តិនៃជំងឺកូវី-១៩នោះទេ។ ជាឥណទានមកពីប្រទេសចិន កូរ៉េ ជប៉ុន ធនាគារពិភពលោក ឬធនាគារអភិវឌ្ឍន៍អាស៊ី ADB គឺមិនមានឥណទានណាមួយ បានលុបចោលដោយសារវិបត្តិនៃជំងឺកូវី-១៩នោះទេ»។ ឯកឧត្តមទេសរដ្ឋមន្ត្រី បានថ្លែងយ៉ាងនេះទៀតថា ក្នុងកំឡុងពេលជួបវិបត្តិកូវិដ-១៩នេះ មិនត្រឹមមិនបានប៉ះពាល់ដល់គម្រោងសាងសង់ផ្លូវ និងស្ពានប៉ុណ្ណោះទេ តែរាជរដ្ឋាភិបាលកម្ពុជា បានប្រែក្លាយវិបត្តិនេះ ទៅជាឱកាសសម្រាប់ការកសាងហេដ្ឋារចនាសម្ព័ន្ធមួយចំនួនទៀតថែមទៀតផង។ ឯកឧត្តមបានបន្តថា «នៅក្នុងកំឡុងនៃវិបត្តិកូវីដ១៩នេះ រាជរដ្ឋាភិបាលក្រោមការដឹកនាំរបស់សម្តេចតេជោ ហ៊ុន សែន ក៏បានយកថវិកាសន្សំរបស់រាជរដ្ឋាភិបាល ទៅជួសជុលពង្រីកពង្រឹងផ្លូវចំនួន ៣៧ខ្សែ នៅក្រុងព្រះសីហនុ និងសាងសង់ផ្លូវលេខ ១៤៦បេ ដែលតភ្ជាប់ពីកំពង់ផែ មកផ្លូវជាតិលេខ៤។ យកថវិកាសន្សំ ១៥០លានដុល្លារ កសាងផ្លូវចំនួន ៣៨ខ្សែ នៅខេត្តសៀមរាប ដូច្នេះមិនមានគម្រោងណាមួយដែលបានបាត់បង់ដោយសារជំងឺកូវីដ១៩ ឬការមិនឱ្យខ្ចីឥណទានមកពីបរទេសនោះទេ»។ ឯកឧត្តមទេសរដ្ឋមន្ត្រី ស៊ុន ចាន់ថុល បានគូសបញ្ជាក់យ៉ាងនេះថា ការជួសជុលពង្រីកពង្រឹងផ្លូវនៅក្រុងព្រះសីហនុ និងខេត្តសៀមរាប ជាការចាប់យកឱកាសមួយនៅក្នុងវិបត្តិកូវីដ១៩ តាមរយៈការចាប់ផ្តើមពង្រីកនិងលើកកម្ពស់កម្រិតគុណភាពផ្លូវ ស្របពេលដែលមានវិបត្តិកូវីដមិនមានភ្ញៀវទេសចរច្រើនធ្វើដំណើរ និងដើម្បីបង្ករភាពងាយស្រួលក្នុងការសាងសង់ ហើយមកដល់ពេលនេះក្រោយការបើកដំណើរកាសេដ្ឋកិច្ចឡើងវិញ និងបើកទទួលភ្ញៀវទេសចរឡើងវិញដែរនោះ គឺផ្លូវបានធ្វើរួចរាល់ និងបានបង្កើតភាពងាយស្រួលសម្រាប់អ្នកទេសចរធ្វើដំណើរកម្សាន្តផងដែរ។ ឯកឧត្តមទេសរដ្ឋមន្ត្រី បានបញ្ជាក់យ៉ាងនេះថា «បើរាជរដ្ឋាភិបាលយើងមិនមានថវិកា សន្សំសំចៃ គឺមិនបានធ្វើផ្លូវ ៣៨ខ្សែនៅក្នុងក្រុងសៀមរាបនោះទេ។ ឥលូវផ្លូវបានពង្រីកធំ មានផ្លូវជិះកង់ មានផ្លូវថ្មើជើង ដូចគ្នានឹងផ្លូវក្រុងព្រះសីហនុ ដែលនេះគឺបង្ហាញឆន្ទះរបស់រាជរដ្ឋាភិបាល ភាពខ្លាំងដែលមានថវិកាសន្សំរបស់ខ្លួនផង»។ គួរជម្រាបជូនថា ការកសាងហេដ្ឋារចនាសម្ព័ន្ធផ្លូវ និងស្ពាន នៅតែជាគោលនយោបាយអាទិភាពសម្រាប់រាជរដ្ឋាភិបាលកម្ពុជា ដឹកនាំដោយសម្តេចតេជោ ហ៊ុន សែន។នៅមុនដំណាច់ឆ្នាំ២០២២ និងដើមឆ្នាំ២០២៣ គម្រោងផ្លូវ និងស្ពានចំនួន៤ ដែលប្រើប្រាស់ប្រាក់កម្ចីរបស់ចិន ត្រូវបានបើកការដ្ឋានសាងសង់ជាបន្តបន្ទាប់ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្ត្រីកម្ពុជា និងលោក វ៉ាង វិនធៀន ឯកអគ្គរដ្ឋទូតចិនប្រចាំនៅកម្ពុជា។ គម្រោងទាំង៤នោះរួមមាន៖ ការដ្ឋានស្តារ និងលើកកម្រិតគុណភាពផ្លូវជាតិលេខ៤១,ផ្លូវជាតិលេខ៣១ និងផ្លូវជាតិលេខ៣៣, ការដ្ឋានសាងសង់ស្ពានឆ្លងទន្លេមេគង្គខេត្តក្រចេះ និងការដ្ឋានពង្រីក និងលើកកម្ពស់គុណភាពផ្លូវជាតិលេខ៧ ពីស្គន់ ទៅក្រុងកំពង់ចាម។ គម្រោងសាងសង់ផ្លូវ និងស្ពានទាំង៤គម្រោងនេះ ចំណាយថវិកាសរុបសរុបជាង ៤០០លានដុល្លារ ហើយនឹងត្រូវបញ្ចប់ការសាងសង់ព្រមៗគ្នានៅឆ្នាំ២០២៦៕